Agoago Podo 31:16-31

¹⁶Mee ga gidee ia di gowaa, geia e hui di gowaa, e dogi dana hadagee waini gi ana bahihadu ala ne kumi koia i ana moomee ala ne hai.

¹⁷Mee tangada ngalua hagamadabouli, e noho mau dono ngalua maaloo.

¹⁸Mee e iloo ia nia dahidamee o nia mee huogodoo ala e hai koia, geia e ngalua gaa dae loo gi di boo loo.

¹⁹Mee e bida dui hua ono gahu donu gi ono lima.

²⁰Mee e dumaalia ang gi nia daangada hagaloale, mo digau ala e haingadaa.

²¹Mee hagalee maanadu e logo i di madagoaa ma ga magalillili, idimaa, digau dono hale gu togomaalia nadau gahu mahanahana.

²²Mee e dui ana gili moenge maluu, gei mee e ulu gi nia gahu madamada.

²³Di lodo o maa tangada hagalabagau i di waahale deelaa, gei nia daangada dogologo e iloo ginaadou a mee.

²⁴Mee e dui ana gahu mo di hai ana duu, e hui gi digau huihui mee.

²⁵Mee e maaloo, ge e hagalaamua go nia daangada, gei mee hagalee madagu i nia mee ala ma ga kila aga maalia.

²⁶Mee ga helekai, le e helekai balabala mo di kabemee.

²⁷Mee e daadaamee i nia madagoaa huogodoo, e benebene digau dono hale.

²⁸Nia dama a maa le e hagalaamua a mee, gei dono lodo le e hagaamu hogi a mee,

²⁹e helekai boloo, “Nia ahina dogologo la nia lodo humalia, gei goe le e kaedahi!”

³⁰Di madanga la dono hadinga ai, di madamada le e maa gi daha, gei ogo di ahina dela e hagalaamua Dimaadua la gi hagaamuina.

³¹Haga laamua ina a mee gi ana mee huogodoo ala e hai. Nia daangada huogodoo belee hagalaamua a mee.