1David-machi-Salomón Israel-e-rey, we-binsaed-nuegan narmaksad:
2Adi, binsaed-nikaa guega, igarmar-nuegan-mamaidba nanaega, gayaburba-dummagan-mamaid mamarega,
3igar-mamaid-wisguega, itoakwaa ibmar-imakega, igar-innikii-mamaidba ibmar-imakega, igar-nabolegedgi igar-maidba imakega, emarbi-dulemar-dake nanaega.
4Dule-nue-ibmar-wissulid ibmar-dukuar-maid-wisi imakega, sapingan nue-ibmar-wisi guega, sapingan mag-neg-itoakwaa nanaegar. Agala, Salomón, we-binsaed-nuegan narmaksad.
5Dule-binsaed-ibedi, dule-nue-ibmar-wisidi, we-binsaed-nued itodaed, adi, gatik binsaed-nikaa guega, egi durdakbaligar.
6Adi, binsaed-nuegan magar-itogega, e-burbagan-mamaid magar-itogega, dule-binsaed-nikaa-e-ibmar-soged magar itogega, oegedgi-sunmakleged magar-itobaligar.
7Binsaed-nikaguedi, Bab-Jehová-dobee-nanaedgi danikid. Dule-binsaedsurmaladi, binsaed-nikagued abesulid, binsaed-nueganba nanabisulid.
8Machi, be-bab-be-unaed nue be itogo. Be-nan-be-odurdakedba be dao.
9Be-ibmar-durdaksad bega orgurginyobi ibnuedga guoed, bega ordubyobi ibnuedga guoed.
10Machi, dule-isganamar be-yardakbi-gualile, melle ese binsaed galego.
11Bega sokarmalale: “Anmarba be dage. Anmar dule-ibmar-oakalossulid oburgwenae. Anmar binsa-nabir-itogedba dule-baisur-binsadiid oburgwenae.
12Igi napa dule-burgwaled-doe, deyob, anmar dule-neg-oakalossulid oburgwenamoga.
13Anmar ibmar-nuegan ichesuli sumaloed. Anmar ibmar-sumaloedi, anmar-neggi ichesuli urbemaloed.
14Anmarba be akae. Anmar ibmar-suoedi, anmar bega ukmogoed.”
15Machi, melle amarba be akao, amar-igar-isganagi be banguo.
16Ar we-dule-isganamar, ibmar-isgana bur gwae imakbidamalad, gwae dule-oburgwebidamalad.
17Ar sikwimar e-wagab e-gaedsinai daksale, egi gwen dogosulid.
18Ar we-dule-isganamardi, na dukin yardakledimalad, emar na dukin oburgwedimalad.
19Dulemar-dogdar-maniginbi-binsamalad, deyob gunonidamalad. Dulemar-dogdar-maniginbi-binsamalad, dule-baidse burgwenonidamogad.
20Binsaed-Nikaguedi, binnasuli galimbaba goled, dulemar-bukidar-ambikued-abargi isseed sunmaked.
Proverbios 1
Proverbios 1:1-20