Proverbios 10:5-20

⁵Dule-binsaed-nikadaedi, yorgine ibmar-gwag-gullemalad na onmaked. Dule ibmar-gwag-weleged-e-ibagangi gabedbi-gudiiddi, we-dule, na dukin binged-amied.

⁶Bab-Dummadi, dule-innikidaedgi, nued binsaed. Gaya-isgana-sunmaklegedi, unnila dule-wiogega emar-imaked.

⁷Dule-innikidaed-e-nuggi nued sunmakledidaed. Dule-isgana-e-nuggindina, bar-egi-binsalesulid.

⁸Dule-binsaed-ibed igar-maidba ibsaed. Dule-binsaedsulidaeddi, e-sunmakedgi na dukin san-wioged.

⁹Dule-nuekwa-nanadiidi, bonisuli nanadiid. Dule-galagwensuli-nanadiiddina, ibagwengi e-isgued magar-daklenonikoed.

¹⁰Dule ibmar-isgana-gunaid baisur-dakedi, emarga naibid-uked. Dule-binsaedsulid e-sunmakedgi na boni-amioed.

¹¹Dule-innikidaed-e-sunmakedi, dulega ibnuedga gued. Dule-isgana-e-sunmakeddina, unnila yamo dule-ourwega sunmaked.

¹²Sae-emar-dakedgi, urwed amileged. Sabgueddina, isgussuliyob emar-dake imaked.

¹³Dule-itoakwaa-gudiid-e-sunmakedgine, binsaed-nikagued amileged. Dule-binsaedsulidaeddina, e-yargan-gordii gued.

¹⁴Dule-binsaed-ibegan, e-ibmar-wisigued bur bule amied. Dule-binsaedsulidaeddina, e-sunmakedgi ukiagwar boni-onogedsedaed.

¹⁵Dule-mani-ibedi, manigi e-gangued siid. Dule-wilegeddina, wileged ega boniga-gumogad.

¹⁶Dule-innikidaed-e-ibmar-imakedi, ega ibnuedga gued. Dule-isgana-e-ibmar-imakeddina, ega ib-isganaga gued.

¹⁷Dule igar-odurdaklegedba-ibsaele, burba-dulad-nikaa gudii gued. Dule igar-odurdaklegedba-ibsasuliddina, igar-isganaba naddaed.

¹⁸Dule-gakansaerbadi, sae-emar-daked odukued. Dule-emargi-isdar-sunmakedi, binsaedsuli gued.

¹⁹Dule-gadi-sunmaked, gege isgued sogsuli gued. Dule gwabinduku-bargaed-nikaddina, we-dule, dule-binsaed-ibedid.

²⁰Dule-innikidaed-e-sunmakedi, mani-nuedyobid. Dule-isgana-e-binsaeddina, ibnuedga gusulid.