Dad Fngewe 10:5-20

⁵I to fulung faldam, kamtu kenen di bang i kaktu, bay magagyà i to ku én balingan nimò kudang di bang i kaktu.

⁶I to matlu, nun kafye gdawatan, na i to sasè, gbunin i klabean fagu di kfulungan talù.

⁷I to matlu, fnadlug gafaldam kenen balù tamlo nan mati, bay i to sasè, too malmo i dengegan na too kenen mlal glifet.

⁸I to fulung faldam, too gamdawat i fye fngewe, bay i to talù là man, falmon i kton.

⁹I to matlu landè klikoan du mdà di fye nimoan, bay i to mlimbung, gakfè di klimbungan.

¹⁰I to muni i kaglut, én gumdà i ksamuk, bay i to labè mngak i to mimò sasè, kenen gafatlag i ksamuk.

¹¹I to matlu, galan man i gafye, na gatgal i dad to mlinge imanan, bay i to sasè, gbunin i klabean fagu di kfulungan talù.

¹²I gukel i kasnang nawa, dunan samuk, bay gukel i kakdo, dunan klifet i kdee salà.

¹³Fagu di talù i to nun kaglabat, dnileam i kfulungan, bay i to landè kaglabatan, fye ku fanlayam kenen.

¹⁴I dad to fulung faldam, làla fagfan i gnadèla du funala gal toofandam ku tan i manla, silang talù. bay ku talù i to là fulung faldam, too mlal i ksamuk.

¹⁵I kamlung i to nun knun, dunan i knunan, bay i gafalmo i to landè, dunan i klandean.

¹⁶Mdà di untung i to matlu, nun klawilan, bay mdà di untung i to sasè, nun kaflayaman.

¹⁷I to flinge ku nun mngak kenen, én i to mlawil, bay i to là dmawat i kagsalaan, nun sasè gdawatan.

¹⁸I to muni i knang nawan, én i to tmulen kakakéng, na i to samtugad salék, én i to là fulung faldam.

¹⁹I to too mayè stulen, slaan gsalà du mdà di dee manan, bay i to gadnanan i taluan, kenen i to fulung faldam.

²⁰I dad talù i to matlu too mabtas, salngad i btas i glut salafì, bay i fandam i to sasè landè btasan.