Ola Saam 99:1-9

¹YAWEI im Bos en ola pipul sheik nomo lilbit. Im jidan langa im speshalwan tjeya deya langa midul langa det dubala golwan sheip garram wing. En dijan wel im sheiksheik.

²YAWEI im jidan strongbalawan langa Jerusalem. Im det boswan blanga ebri kantri.

³Ebribodi garra preisim im haibala neim. Im na holiwan!

⁴Strongbala king yu laigim wanim im rait. Yubin gibit feyagowan lowa langa Isreil. Yubin dum ebrijing raitwei en gibit feyago langa ola pipul langa Isreil.

⁵Preisim YAWEI det trubala God blanga wi. Weship im lida langa im speshalwan tjeya. Im na holiwan!

⁶Mosis en Eran bin im wekinmen, en Semyul bin tharran hubin prei langa im. Olabat bin jingat langa YAWEI det trubala God en imbin ensim olabat.

⁷Imbin tok langa olabat brom det longwan klaud. Deibin lisin en teiknodis langa ol im lowa en wed weya imbin dalim olabat.

⁸YAWEI det trubala God blanga wi, yubin ensim yu pipul olabat. Yubin shoum olabat yu na det God hu oldei fil sori en larramgo pipul fri, nomeda yubin panishim olabat blanga ola nogudbala ting deibin dumbat.

⁹Preisim YAWEI det trubala God blanga wi, en weship im langa im seikridwan hil. YAWEI wi God, im holiwan.