SAM 99:1-9

¹Buyambamtapa king kapa yuak. Yuakge aminbamda ie ayamuke gwautnong. Ita sia king dakane pukwiwan angela kautkaut yukumayak. Siwan kepdaka miamun siwikge nataat.

²Sike Buyambamtapa kekekngana buyambam siknga keu Saion komune yuak. Ita umana kopsa siknga akngane aminu kepna kepna nana kuupbam kayuak.

³Siwana umana kopsa waakngae gwauke yatangenatnong. Anutu waapa noman takngakan tasinggaunin. Anutu waapa noman taknga gatu takeaknga ngang kuupbam tasinggaunin.

⁴Kingu kekekngaapa, ga noman takngaekan take siknga nataayak. Ngan, gata ninu Isrel nana aminu sanga take gatu noman taknga ngang tasinimde nimukuyak. Nimi ninda atawakamang.

⁵Ginda Buyambam tapatane umana asiknga yatangenatnong. Wa nisane Anutunin. Ginda ie wesim kuke munu putnong. Sike Anutu waapa noman takngakan tawanggak kapanin.

⁶Sike Moses gatu Aron ngangu Buyambam tapatane pris tapaat dakngake yukumayak. Siwan Samuel kaya Anutue mun puke inikaing aminkat nana tapatu waaminda Buyambam tapae tumuk wam iniwawa tumuk wamna atnatapbut.

⁷Natake ita minga buyambam musaatang yuke waaminde yanikut. Siwan waaminda mama wamu wa Anututa yamukuu kuupbam tawaking.

⁸Anutu, nindane Buyambam tapanin, gata amindabamdane tumuk wamna atnatapbuyak. Sike waiaknganin sandetnimunggayakge atnataamang. Siwan ngana gutonga tasikingge yake meya ayamukuyak.

⁹Anututane umana yatangenatnong. Buyambam tapaninden. Siwan munu inane tawandakane putnong. Anutu, Buyambam tapanin, wa Anutu noman takngakan tasinggak kapanin.