Ola Saam 60:6-12

⁶God bin tok brom im brabli seikridwan pleis, “Gudbinjiwei ai garra kadimat det taun Shekam, en gibit det kantri Sukait Beli langa main pipul olabat.

⁷Det dubala kantri gulum Giliyad en Manesa blanga main. Det kantri Ifreiyim jidan wulijim main speshalwan het, en det kantri Juda im jidan wulijim main seikridwan stik.

⁸Bat ai garra meigim det kantri Moweb jidan wulijim rabishwan pleis weya dei tjakam dardiwan woda, en ai garra tjakam main but langa det kantri Idam blanga shoum mi bos blanga im. Mi jingat gudbinjiwei, dumaji aibin bidim detlot Filistain pipul.”

⁹God, hu garra album mi en deigim mi langa det bigwan taun garram haibala wol? Hu garra album mi en deigim mi langa Idam?

¹⁰Maitbi yubin libum melabat olagijawan na, God. Yu garra stil go garram melabat ami olabat o najing?

¹¹Yu album melabat fait langa dislot enami. Pipul kaan album melabat. Najing! Olabat nomo strongwan.

¹²Oni yu na God garra meigim melabat win. Yu na garra bidim melabat enami olabat.