Kap 60:6-12

⁶Piŋkop iyɨ da yutnon egek yaŋ yagɨt, “Nak emaron kɨlɨ teban tat. Do nak kɨsɨk kɨsɨk aŋek Sekem dakon mɨktɨm gat ae Sukot dakon galegɨ oba uŋun gat mɨŋat amɨno do kokwinɨk yomdɨsat.

⁷Giliat mɨktɨm gat Manase mɨktɨm gat uŋun nak dakon. Epraim mɨktɨm uŋun busuŋ kutnokno. Ae Juda mɨktɨm uŋun kɨla amɨn madep dakon kɨndap kɨrɨŋno.

⁸Mani Moap mɨktɨm uŋun nak dakon pakbi sogok ɨdap. Ae Idom mɨktɨm uŋun nak dakon kandap gwɨl yopyop tamo. Aŋek nak emaron Pilistia amɨn pabɨŋ yopmaŋek kɨsɨk kɨsɨk aŋek yaŋ tɨdokdɨsat.”

⁹Piŋkop, namɨn da nak aŋaŋ kokup pap dam tebani toŋon aŋkɨsak? Ae namɨn da nak Idom mɨktɨmon emat ak do aŋkɨsak?

¹⁰Piŋkop, gak da nin manji kɨlɨ nimgul, ma? Nin dakon emat amɨn dɨma paŋpulugok do nandɨsal, ma?

¹¹Amɨn dakon paŋpulugok uŋun yo ɨsalɨ gɨn, do nin paŋpulugaŋaki uwal gat emat tagɨ wamneŋ.

¹²Piŋkop da nin paŋpulugaŋakwan emaron teban toneŋ. Iyɨ uwalnin pabɨŋ yopdɨsak.