Ola Saam 38:1-14

¹YAWEI, wen yu gitwail, nomo dalimof mi. Nomo panishim mi wen yu brabli einggri.

²Yubin shudum mi garram yu erro en meigim mi leimwan. Yubin kilim mi en meigim mi buldan langa graun.

³Dumaji yubin gitwail langa mi main bodi ardim nomo lilbit. Mi jidan brabli sikwan dumaji brom ol main nogudbalawei.

⁴Mi jidan giltiwan en im gaburrumap mi brabliwei, jis laik fladwoda. Im tumatj blanga mi blanga hendulum. Im jis laik det hebiwan loud weya mi garrimap.

⁵Ol main sowa im smeliwan en rotinwan na, dumaji aibin siliwan.

⁶Mi garram detmatj pein en ai kaan adli wok, en mi gulijap buldan langa graun. Mi oldei krai insaid langa main hat.

⁷Mi barnbarn detmatj en mi gulijap dai.

⁸Mi nokap na en ai kaan dum enijing. Mi jingat dumaji mi ardimbat detmatj en mi fil nogudbinji.

⁹YAWEI, yu sabi wanim mi wandim brabli. Yu lisinbat langa mi wen mi jingat langa yu.

¹⁰Main hat im pamping nomo lilbit. Ai nomo strongbala enimo. En main dubala ai nomo luk gudwei na.

¹¹Ol main fren en detlot pipul hu jidan wansaid langa mi kaan kaman gulijap langa mi, dumaji ai garram loda sowa, en ol main femili kipawei brom mi du.

¹²Detlot pipul hu wandim kilim mi ded, olabat pudumbat ola trep blanga mi. En detlot pipul hu wandim kilim mi, olabat toktok blanga meigim ebrijing nogud blanga mi. Olabat kaan stap toktokbat blanga dum nogudbala ting langa mi.

¹³Mi jis laik defwan en kaan irrim enijing, en jis laik ai nomo garram mawus en kaan tok langa enibodi.

¹⁴Mi jis laik detlot hu nomo ensim dumaji dei kaan lisin.