A Umana Kakailai 38:1-14

¹A kakailai kai David, upi ra varvanuknuk. Luluai, koko una pit iau ta kaum ngala na kankan; Ma koko una virit iau ta kaum ngangal na kulot.

²Tago kaum umana pu dia tur vadekdek iau, Ma ra limam i mamat i tagu.

³A pal a pakagu pa i lagar bulu ure kaum kankan, Ma pa ta bo na nilaun ta ra urugu ure kaugu varpiam.

⁴Tago iau tar dudu ta kaugu bilak na mangamangana, Da ra mamat na kinakap dia mamat i tuna tagu.

⁵A umana manuagu dia ang na bubu ma dia ngangar, Tago iau a papaua.

⁶I talikun ra murugu ma iau pa rururu tuna, I tabun ra balagu ra bungbung parika.

⁷A lugu i oao tuna, Ma ra pal a pakagu pa i lagar.

⁸Iau bilua, ma iau dala tuna, Iau tar kukukula tago i purpuruan ra balagu.

⁹Luluai, u tar matoto ta kaugu mamainga par, Ma kaugu oir pa i ki ivai kan u.

¹⁰I pipipidil ra balagu, i panie ra dekdekigu, Ma ra matagu bula i pula.

¹¹Diat dia mari iau, ma ra umana talaigu, dia tur irai kan kaugu kaina minait; Ma ra umana turagu bula dia tur aro vailik.

¹²Diat bula dia mainge ba ina virua, dia kapi kun ure iau, Ma diat dia mainge ba ina kadik, dia vatang ra vinirua, Ma dia nununuk ta ra vartuam ra bungbung parika.

¹³Ma iau da ra vaut, pa iau valavalongor, Ma iau da ra bombom na tutana ba pa i tatata.

¹⁴Maia, iau da ra tutana ba pa i valavalongor, Ma pa ta tinata na varbat i irop ta ra ngiene.