Numbers 10:8-29

⁸Fapi pumo’on ni pifak Aron ni yad e prist e yad e maruwel rorad ni ngar thothey e yabul. “Re motochiyel ni ba’aray e ngu’un rin’ e chiney i yan ngaram.

⁹Nap’an nra yib e mael ngomed u lan tafenmed ni gimed be ayweged gimed rok e re to’ogor nike yib ni mael ngomed, migmed thoy e gali yabul ney ni pow riy ni keyib e mael. I Gag SOMOL ni Got romed e gu ra ayuwegmed u pa’ e pi to’ogor romed.

¹⁰Ma ku er rogon e pi madnom ko felfelan’ — u ngilan’ e Madnom ko M’ug e Pul nge ku boch e madnom romed ko liyor — ma ngam thoyed fa gali yabul ko ngiyal’ ni ngam pi’ed e maligach romed ni mo’oruf nge maligach nma gapaseg thilin Got nge girdi’. Ma aram e gu ra ayuwegmed. I Gag SOMOL ni Got romed.”

¹¹Re rran ni rliw’ fen ngay ko bin l’agruw e pul u lan e bin l’agruw e duw nike chuw yu Israel u lan yu Egypt, me langlang fare gi manileng ngalang u daken fare Tent u p’eowchen SOMOL

¹²me tabab piyu Israel ko milekag ni ngar chuwgad u lan fare gi ted u Sinai. Me yan fare gi manileng i gif nga daken e ted nu Paran.

¹³Me yog SOMOL ngorad u l’ugun Moses ni ngar tabobgad ko milekag,

¹⁴ma gubin ngiyal’ ni yad ra mithmith, ma yad beyan nikyad ba yaram. Pi’in bay u tan e flak ko fare raba’ i girdi’ ni be gafaliyrad fare ganong rok Judah e yad e som’on ko yan, ni yad be yan ni yu raba’, ni Nahshon nib mo’on ni fak Amminadab e ir e be gafaliyrad.

¹⁵Me Nethanel nib mo’on ni fak Zuar e be gafaliy fare ganong rok Issakar,

¹⁶me Eliab nib mo’on ni fak Helon e be gafaliy fare ganong rok Zebulun.

¹⁷Ma aram min pilig fare Tent nga but’, ma fa gal ke girdi’ rok Gershon nge Merari ni yad e yad ma fek, e yad e som’on ni ngar feked ngranod.

¹⁸Ma pi’in migid ni ngranod e pi’in ni bay u tan e flak ko fare raba’ i girdi’ ni be gafaliyrad fare ganong rok Ruben, ni yad be yan ni yu raba’, ni Elizur nib mo’on ni fak Shedeur e be gafaliyrad.

¹⁹I Shelumiel nib mo’on ni fak Zurishaddai e be gafaliy fare ganong rok Simeon,

²⁰me Eliasaf nib mo’on ni fak Deuel e be gafaliy e ganong rok Gad.

²¹Me migid ma fare ke girdi’ rok Kohath ni yib ko ganong rok Levi ni yad be fek fa pin’em nib thothup e yad ra yan. Nap’an ni yad ra taw ko gin ni migid ni ngar pired riy ma fare Tent e kem’ay i n’uf ngalang.

²²Ma pi’in migid ni yad ra yan e pi’in ni bay u tan e flak ko fare raba’ i girdi’ ni be gafaliyrad fare ganong rok Efraim, ni yad be yan ni yu raba’, ni Elishama nib mo’on ni fak Ammihud e be gafaliyrad.

²³I Gamaliel nib mo’on ni fak Pedahzur e be gafaliy e ganong rok Manasseh,

²⁴me Abidan nib mo’on ni fak Gideoni e be gafaliy e ganong rok Benjamin.

²⁵Ma pi’in nth’abi tomur ni yad ra yan e pi’in ni bay u tan e flak ko fare raba’ i girdi’ ni be gafaliyrad fare ganong rok Dan. Maruwel rorad e yad e matnag u wuryal ko gubin fa yu raba’ i girdi’. Mranod ni yu raba’ ni Ahiezer nib mo’on ni fak Ammishaddai e be gafaliyrad.

²⁶Me Pagiel nib mo’on ni fak Okran e be gafaliy fare ganong rok Asher,

²⁷me Ahira nib mo’on ni fak Enan e be gafaliy fare ganong rok Naftali.

²⁸Aram e irera’ yarmen e yan ni i tay e girdi’ nu Israel ni gubin ngiyal’ ni ngar chuwgad ma yad be yan ni yu raba’.

²⁹Me ga’ar Moses ngak Hobab nib mo’on ni fak Jethro nu Midian ma le’engin be’ ni bpin ni walagen Moses, “Chiney e aram e ke chugur ni nggu chuwgad u roy nggu warod ko fare gin’en nike yog SOMOL ni bayi pi’ ngomad. Ke micheg SOMOL nra tow’athnag yu Israel nge fel’ rograd, ere mu’un ngomad, ma tin nra fel’ rogomad riy e gamad ra pi’ boch ngom.”