Numperis 10:8-29

⁸Iwe, nöün Aaron kewe mwän ekewe souasor repwe ettiki ekewe rappwa. Ei epwe eu allük fochofoch ngenikemi seni eu täppin aramas tori eu täppin.

⁹Iwe, lupwen oupwe feila maun ngeni chon oputakemi mi ariaföüükemi me lon fanüemi, oupwe ettiki ewe tikin asilesilen maun ren ekewe rappwa. Mürin, ngang ewe Samol mi Lapalap ämi we Kot üpwe alisikemi o amanauakemi seni chon oputakemi.

¹⁰Oupwe ettiki ekewe rappwa pwal lon ränin ämi pwapwa, lupwen fansoun ämi kewe chulap mi kefilitä me lepoputän ekewe maram. Oupwe ettiki ekewe rappwa lupwen fansoun ämi eäni asoren kek me asoren kinamwe. Mürin üpwe alisikemi. Ngang ewe Samol mi Lapalap ämi we Kot.”

¹¹Iwe, lon aruuen ränin ewe aruuen maram lon aruuen ier mürin än chon Israel towu seni Isip, ewe kuchu a wiitä seni won ewe imwenfel seni mangaku ewe ia ekewe allük ra nom ie.

¹²Iwe, ekewe aramasen Israel ra sai seni ewe fanüapön Sinai lon tettelir. Iwe, ewe kuchu a üla lon ewe fanüapön Paran.

¹³Ekkärän iei aeuin ar sai fän än ewe Samol mi Lapalap allük ngeni Moses.

¹⁴Iwe, ekewe mwich mi nom lon kinikinin Juta ra akom le sai lon tettelir fän ar filäik. Nge Nason nöün Aminatap mwän i souemwenin chon ewe ainangen Juta.

¹⁵Iwe, Netanel nöün Suar mwän i souemwenin chon ewe ainangen Isakar.

¹⁶Nge Eliap nöün Helon mwän i souemwenin chon ewe ainangen Sepulon.

¹⁷Iwe, mürin än ewe imwenfel seni mangaku katomwola, nöün Kerson me Merari kewe mwän mi wisen mwärei ra sai.

¹⁸Mürin ekewe mwich mi nom lon kinikinin Rupen ra sai lon tettelir fän ar filaik. Nge Elisur nöün Seteur mwän i souemwenin chon ewe ainangen Rupen.

¹⁹Iwe, Selumiel nöün Surisatai mwän i souemwenin chon ewe ainangen Simeon.

²⁰Nge Eliasaf nöün Teuel mwän i souemwenin chon ewe ainangen Kat.

²¹Mürin, än Kohat cho ra sai. Ra mwärei ekewe mettoch mi pin. Nge lupwen ra tori ewe leni ia ra asösö ie, ewe imwenfel seni mangaku a fen kaütä.

²²Mürin, ekewe mwich mi nom lon kinikinin Efraim ra sai lon tettelir fän ar filaik. Nge Elisama nöün Amihut mwän i souemwenin chon ewe ainangen Efraim.

²³Iwe, Kamaliel nöün Petasur mwän i souemwenin chon ewe ainangen Manasa.

²⁴Nge Apitan nöün Kiteoni mwän i souemwenin chon ewe ainangen Peniamin.

²⁵Iwe, ekewe mwich mi nom lon kinikinin Tan ra kükümwirifoch seni ekewe mwich meinisin. Ra sai lon tettelir fän ar filaik, nge Ahieser nöün Amisatai mwän i souemwenin chon ewe ainangen Tan.

²⁶Iwe, Pakiel nöün Okran mwän i souemwenin chon ewe ainangen Aser.

²⁷Nge Ahira nöün Enan mwän i souemwenin chon ewe ainangen Naftali.

²⁸Iei tettelin än ekewe aramasen Israel sai lon ar kewe mwich iteiten fansoun ar sai.

²⁹Iwe, Moses a üreni Hopap nöün Setiro we mwän ewe re Mitian, nge Setiro semen pwülüen Moses, “Iei äm aipwe le sai ngeni ewe leni ewe Samol mi Lapalap a pwon pwe epwe ngenikem. Kopwe etikem, nge äm aipwe kirikiröch ngonuk, pun ewe Samol mi Lapalap a pwon pwe epwe awöüü ekewe chon Israel.”