Nahum 3

1

2

3

¹Ke riya’ fare binaw nib sasalap nib tathang e pogofan, nib sug ko fla’ab ni bay ni leag min giliwnag!

²Motoyil! Nga lingan e pi dumow, nge tayapyap ni be grilril, nge lingan e titimo’og ni be tay e pi os, nge lingan e chariot ni be gril u kanawo’!

³Girdi’en e yan u os e kar thay gad nga m’on ni cham, ma be mat ra’en e saydon nge sarey! Pi Idow e ke burey u but, ni bogi yam’ ni dabkiyag i the’eg urngin — be tun ay e girdi’ ngorad!

⁴Nineveh ni fare gathar ni yibe gechignag. Nib gamog ma fel’ngin e ba sug ko yub, ma pingeg lanyan’ e pi nam nge m’agan’rad ngak miyad sib.

⁵I SOMOL ni Gubin ma Rayag Rok e be ga’ar, “Nineveh i gur e bay gu gechig nigem! Bay gu chuweg gubin ban’en rom ngam par u tamilang mug pag e pi nam ngar guyed gur, u fithik’ gubin e tamra’ rom.

⁶Bay gu tem u fithik’ e faneynikan mug tharayem ko tin sonogor. Bay i lik’ath e girdi’ ngom u fithik’ e tamdag.

⁷Gubin e pi’in yad ra guyem ma yad ra sul riy nga tomur. Bay ra ga’ar gad, ‘Nineveh e dakriy waton u but’! Gur mini’ e ramoy bochu’uw i runguy rok ngak?’ Gur, mini’ e ba’adag ni nge fal’eg lanyan’?’”

⁸Nineveh, gur e gabfel’ boch ngak yu Thebes, ni aram e tochuch nu Egypt? Ir ma immoy ba lul’ ni i yororiy ni bod bang i rungrung, fare lul’ ni Nile e i mang rungrung ngak.

⁹Thebes e i gagyag nag yu Ethiopia nge yu Egypt, gelngin e dariy folen; yu Libya e yow nga barba’.

¹⁰Girdi’ nu Thebes e kan fekrad ni kalbus nga wuru’ e nam. Gubin e m’ing ko kanawo’ ma go’ bay pifakrad riy ni kan li’rad karm’ad. Pi pumo’on ni tayugang’ rorad e kan chen nagrad kan fekrad kan graregrad u pa’ e pi to’ogor rorad.

¹¹Nineveh, ku arrogom ni bay i math lanin’um ni bod be’ nib ching nag! Ma ku arita’ ni bay um guy rogon ni ngam mil rok e pi to’ogor rom.

¹²Urngin e pi yoror rom ko mael e bod e gak’iy ni fig nike lol wom’ngin, mu rurug fapi gek’iy me munugun wom’ngin nib pluw ngalan langam!

¹³Pi salthaw rom e dariy ban’en nrayag rorad, ma nam rom e kem’ay gelngin u p’eowchen e pi to’ogor rom. Nifiy e bayi kirebnag e man’ ko garog rom.

¹⁴Mu l’ing e ran ngam fel’eg rogom, mag gelnag e pi yoror rom ni fan ko mael! Mu athkuy e but’ ngan ngongliy e rengnga riy, mag fal’eg rogon e rengnga nge par!

¹⁵Demturug ko mang e ga ra rin’, ma yira’ urfiyem nga mum’ fa ni thangem u fithik’ e mael. Bay ni thirif’em u but’ ni gowa woldug ni languy e asamning! Kam yo’orgad ni bod e asamning!

¹⁶Kam yo’ornag e pi tasiyobay rom ke yo’or ko t’uf u lanelang! Machane chiney e darmoyed, ni bod e asamning ni kar pithged porad kar changaggad karanod.

¹⁷Pi tolang rom e bod ba ran’ i asamning ni yad ma par u fithik’ i faran e rungrung u reb e rran nib garbeb. Machane nap’an nra yib e yal’ ngalang, miyad changag ngranod, ndariy be’ nim nang ko uw e karsorgad ngay.

¹⁸Pilung nu Assyria, pi governor rom e karm’ad, ma pi pilung e kar moled ni dariy n’umngin nap’an! Girdi’ rom e kar wearweargad u daken e pi burey, ma dariy be’ ni ku ra fulwegrad bayay nga tabnaw.

¹⁹Dariy falayin e pi maad’ad rom, ma pi maad’ad rom e dabi fos. Gubin e pi’in yad ra rung’ag murung’agen e gafgow ni kam tay mar waywaygad ko fel’felan’. I mini’ e yag rok ni thay u tan pa’am ni dariy tungun e kireb ni um rin’ ngak?