Namba 26:5-28

⁵Lain bilong Ruben, em namba wan pikinini man bilong Jekop, i gat ol lain wanblut olsem, Hanok na Palu

⁶na Hesron na Karmi.

⁷Ol dispela 4-pela lain wanblut i gat 43,730 man olgeta.

⁸Pikinini man bilong Palu em Eliap.

⁹Na ol pikinini man bilong Eliap i olsem, Nemuel na Datan na Abiram. Bipo ol manmeri i bin makim Datan tupela Abiram long kamap lida, tasol tupela i bikhet long Moses na Aron na tupela i bung wantaim ol lain bilong Kora na olgeta i mekim bikhetpasin long Bikpela.

¹⁰Orait na graun i op olsem bikpela hul na olgeta i pundaun long hul na graun i pas na karamapim ol. Ol i dai long taim paia i bagarapim Kora wantaim ol 250 man i bihainim em. Long dispela pasin God i givim strongpela tingting long ol manmeri, bai ol tu i no ken bihainim dispela kain pasin nogut.

¹¹Tasol ol pikinini man bilong Kora i no bin dai long dispela bagarap.

¹²Lain Simeon i gat ol lain wanblut olsem, Nemuel na Jamin na Jakin

¹³na Sera na Saul.

¹⁴Ol dispela 5-pela lain wanblut i gat 22,200 man olgeta.

¹⁵Lain Gat i gat ol lain wanblut olsem, Sefon na Hagi na Suni

¹⁶na Osni na Eri

¹⁷na Arot na Areli.

¹⁸Ol dispela 7-pela lain wanblut i gat 40,500 man olgeta.

¹⁹Lain Juda i gat ol lain wanblut olsem, Sela na Peres na Sera, Hesron na Hamul. Peres em i papa bilong Hesron na Hamul. Bipo tupela arapela pikinini man bilong Juda, em Er na Onan, i bin i dai long kantri Kenan.

²²Ol dispela 5-pela lain wanblut i gat 76,500 man olgeta.

²³Lain Isakar i gat ol lain wanblut olsem, Tola na Puva na Jasup na Simron. Ol lain bilong Puva i kolim ol yet ol Pun.

²⁵Ol dispela 4-pela lain wanblut i gat 64,300 man olgeta.

²⁶Lain Sebulun i gat ol lain wanblut olsem, Seret na Elon na Jalel.

²⁷Ol dispela tripela lain wanblut i gat 60,500 man olgeta.

²⁸Lain bilong Josep i gat tupela lain wanblut olsem, Manase na Efraim.