Números 2:1-18

¹Bab-Jehová Moisésʼga, degi, Aarónʼga sunmakded, amarga sogded:

²“Israel-dulemala dulemar-anbo-ambikued-neg-ebilis ambikumaloed, na egad-egad, e-dadgan-e-dadgan-e-bander-urba bukwa gumaloed.

³”Wemala, dulemar-anbo-ambikued-neg-siid-dad-nakwedsik ambikumaloed: Gebedgi, Judá-wagan, na e-bander-urba e-sordamarba ambikumaloed. Judá-wagan-e-dummad Naasónʼye nugad. Naasónʼde Aminadab-e-machid.

⁴E-sordamar ebislesmaladba, mili-dulapaa-gakambe-gakabake gaka dulataled-ilanergwa (74,600) mergued.

⁵”Judá-wagan-dikarba, Isacar-wagan ambikuoed. Isacar-wagan-e-dummad Natanaelʼye nugad. Natanaelʼde Zuar-e-machid.

⁶E-sordamar ebislesmaladba, mili-dulabo-gakambe-gakabake gaka dulataled-ilabake (54,400) mergued.

⁷”Baid-dikarsik Zabulón-wagan ambikumarmogoed. Zabulón-wagan-e-dummad Eliabʼye nugad. Eliabʼde Helón-e-machid.

⁸E-sordamar ebislesmaladba, mili-dulabo-gakambe-gakagugle gaka dulataled-ilabake (57,400) mergued.

⁹”Bela Judá-wagan-bukwamaladgi, sordamar-sogapaa-ebislesmaladba, bular mili-dulabakebak-gakanergwa gaka dulataled-ilabake (186,400) mergued. Judá-wagan, na e-sordamar-nanadapmalad idunadapi gumaloed.

¹⁰”Rubén-wagan, na-e-bander-urba, e-sordamarba dulemar-anbo-ambikued-neg-siid-dad-nakwed-argan-nuedsik ambikumaloed. Rubén-wagan-e-dummad Elisurʼye nugad. Elisurʼde Sedeur-e-machid.

¹¹E-sordamar ebislesmaladba, mili-dulabo-gakanergwa gaka dulataled-ilatar (46,500) mergued.

¹²”Rubén-wagan-dikarba, Simeón-wagan ambikuoed. Simeón-wagan-e-dummad Selumielʼye nugad. Selumielʼde Zurisadai-e-machid.

¹³E-sordamar ebislesmaladba, mili-dulabo-gakambe-gakabakebak gaka dulataled-ilapaa (59,300) mergued.

¹⁴”Baid-dikarsik Gad-wagan ambikumarmogoed. Gad-wagan-e-dummad Eliasafʼye nugad. Eliasafʼde Reuel-e-machid.

¹⁵E-sordamar ebislesmaladba, mili-dulabo-gakatar gaka dulataled-ilanergwa gaka dulabo-gakambe (45,650) mergued.

¹⁶”Bela Rubén-wagan-bukwamaladgi, sordamar-sogapaa-ebislesmaladba, bular mili-dulagugle-gakambe-gakagwensak gaka dulataled-ilabake gaka dulabo-gakambe (151,450) mergued. Rubén-wagan, Judá-sordamar-sorba, na e-sordamar-nanaimaladba nadapi gumaloed.

¹⁷”Geb degine, a-sorbali, Levita-dulemar, dulemar-anbo-ambikued-neg semai gumaloed. We-negde, Israel-dulemar-negabargi siidaed. Ar igi Levita-dulemar na bukwa-daniki, deyob na e-bander-e-bander senadapi gumaloed.

¹⁸Efraín-wagan e-bander-urba, dulemar-anbo-ambikued-neg-siid-dad-argwanedsik ambikumaloed. Efraín-wagan-e-dummad Elisamaʼye nugad. Elisamaʼde Amiud-e-machid.