Números 26

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

¹Wama'eahy re Tupàn Tuweharupi Wiko Ma'e uze'eg Moizez pe Ereazar xaxeto Àràw ta'yr pe no.

²— Pepapar awa Izaew 20 kwarahy henataromo hereko har paw wà nehe. Pepapar awa uzeànàm ma'e wainuromo har paw rupi pe wà nehe, aze upuner zauxiapekwer romo weko haw rehe wà nehe, i'i wanupe.

³Moizez a'e, Ereazar a'e no, weruzar ize'eg wà. Omono'og awa zauxiapekwer romo wiko haw upuner ma'e paw rupi wà. Uzemono'og Moaw ywy rehe ywytyr heta 'ymaw rehe wà, Zotàw yrykawhu izywyr wà, Zeriko tawhu henataromo wà. Amume'u putar Izaew Ezit ywy wi uhem ma'e kwer waner xe ihe wà nehe:

⁵Humen izuapyapyr uzeànàm ma'e wanu waner wà (Humen wiko Zako ta'yr ipy romo): Enok, Paru,

⁶Ezerom, Karomi.

⁷Awa a'e teko wainuromo har wapapar mehe heta 43.730 wà.

⁸Paru umuzàg amo wà: Eriaw,

⁹ta'yr wà no: Nemuew, Nàtà, Àmiràw. (A'e 'ym mehe teko wexaexak Nàtà Àmiràw rehe we wà. Uzàmàtyry'ym Moizez wà. Uzàmàtyry'ym Àràw wà no. Uzemono'og Kora hemiruze'eg wanehe we Tupàn Tuweharupi Wiko Ma'e iàmàtyry'ym mehe wà.

¹⁰Ywy uzepupeka wamokon pà a'e. Umàno Kora rehe we hemiruze'eg wanehe we wà. Tata uzuka 250 awa wà. Teko wexak a'e ma'e izeapo mehe wà. — Aze xiàmàtyry'ym Tupàn nehe, zanezuka putar nehe, i'i uzeupeupe wà.

¹¹Tupàn nuzuka kwaw Kora ta'yr wà.)

¹²Ximeàw izuapyapyr uzeànàm ma'e wanu waner wà: Nemuew, Zamim, Zakim,

¹³Zera, Xau.

¹⁴Awa a'e teko wainuromo har wapapar mehe heta 22.200 wà.

¹⁵Kaz izuapyapyr uzeànàm ma'e wanu waner wà: Zepon, Agui Xuni,

¹⁶Ozini, Eri,

¹⁷Aroz Areri.

¹⁸Awa a'e teko wainuromo har wapapar mehe heta 40.000 wà.

¹⁹Zuta izuapyapyr uzeànàm ma'e wanu waner wà: Xera, Perez, Zera, Ezerom, Amu. Mokoz Zuta ta'yr umàno Kànàà ywy rehe wà. (Er, Onà waner wà.)

²²Awa a'e teko wainuromo har wapapar mehe heta 76.500 wà.

²³Ixakar izuapyapyr uzeànàm ma'e wanu waner wà: Tora, Puwa,

²⁴Zazu, Xinirom.

²⁵Awa a'e teko wainuromo har wapapar mehe heta 64.300 wà.

²⁶Zemurom izuapyapyr uzeànàm ma'e wanu waner wà: Xerez, Erom, Zareew.

²⁷Awa a'e teko wainuromo har wapapar mehe heta 60.500 wà.

²⁸Manaxe a'e, Eparai a'e no, wiko Zuze ta'yr romo wà.

²⁹Manaxe izuapyapyr uzeànàm ma'e wanu waner wà: Makir Manaxe ta'yr wiko Zireaz tu romo. Zireaz umuzàg 'aw uzeànàm ma'e wà:

³⁰Zezer, Erek,

³¹Aziriew, Xikez,

³²Xemi, Eper.

³³Zeropeaz Eper ta'yr nata'yr kwaw. Xo tazyr zo heta izupe wà. Na'aw tazyr waner xe wà: Makira, Noa, Ogira, Miwka, Xiza.

³⁴Awa a'e teko wainuromo har wapapar mehe heta 52.700 wà.

³⁵Eparai izuapyapyr uzeànàm ma'e wanu waner wà: Xutera, Meker, Tàà.

³⁶Erà izuapyapyr wiko Xutera izuapyapyr romo azeharomoete wà.

³⁷Awa a'e teko wainuromo har wapapar mehe heta 32.500 wà. Amume'u Zuze izuapyapyr uzeànàm ma'e wanu waner kwez xe ihe wà.

³⁸Mezàmi izuapyapyr uzeànàm ma'e wanu waner wà: Mera, Azimew, Airàw,

³⁹Xupa, Upà.

⁴⁰Arize izuapyapyr wà, Nààmà izuapyapyr wà no, wiko Mera izuapyapyr romo azeharomoete wà.

⁴¹Awa a'e teko wainuromo har wapapar mehe heta 45.600 wà.

⁴²Nà izuapyapyr uzeànàm ma'e tu her: Xuàw.

⁴³Awa a'e teko wainuromo har wapapar mehe heta 64.400 wà.

⁴⁴Azer izuapyapyr uzeànàm ma'e wanu waner wà: Imina, Iziwi, Meri.

⁴⁵Emer izuapyapyr wà, Mawkiew izuapyapyr wà no, wiko Meri izuapyapyr romo azeharomoete wà.

⁴⁶Azer tazyr a'e, Xera her romo a'e.

⁴⁷Awa a'e teko wainuromo har wapapar mehe heta 53.400 wà.

⁴⁸Napitari izuapyapyr uzeànàm ma'e wanu waner wà: Zazeew, Kuni,

⁴⁹Zezer, Xirez.

⁵⁰Awa a'e teko wainuromo har wapapar mehe heta 45.400 wà.

⁵¹Awa Izaew paw wainuromo har wapapar mehe heta 61.730 wà.

⁵²Tupàn Tuweharupi Wiko Ma'e uze'eg Moizez pe.

⁵³Emuza'aza'ak ywy nehe, ipegegwer wamono pà Zako ta'yr wazuapyapyr wanupe nehe. Aze heta tetea'u wà, emono ywy pehegwer uhua'u ma'e wanupe nehe.

⁵⁴Emuza'aza'ak ywy ita'i ma'e ipapar haw hereko har momor haw pupe nehe. Ywy pehegwer uhu wera'u ma'e emono Zako ta'yr izuapyapyr heta tetea'u ma'e wanupe nehe. Ywy pehegwer pixik wera'i ma'e emono Zako ta'yr izuapyapyr heta wewer ma'e wanupe nehe.

⁵⁷Erewi izuapyapyr uzeànàm ma'e wanu waner wà: Zeroxon, Koat, Merari.

⁵⁸Amo Àràw izuapyapyr uzeànàm ma'e wanu waner wà: Irimini, Emerom, Mari, Muzi, Kora. Koat umuzàg Ànàràw.

⁵⁹Àriràw wereko Zokemez Erewi tazyr wemireko romo. Zokemez uzexak kar Ezit ywy rehe. Zokemez omono mokoz ta'yr Ànàràw pe wà: Àràw, Moizez waner romo wà. Umur pitài tazyr izupe no: Mirià her romo a'e.

⁶⁰Àràw umuzàg 4 wa'yr wà: Nanaw, Amiu, Ereazar, Itamar.

⁶¹Nanaw a'e, Amiu a'e no, umàno tata iapo katu pyrer 'ym Tupàn Tuweharupi Wiko Ma'e pe imono mehe a'e wà.

⁶²Upapar awa Erewi izuapyapyr pitài zahy henataromo hereko har wà. Heta 23.000 wà. Nupapar kwaw amogwer Izaew izuapyapyr wainuinuromo wà. Ta'e Izaew waiwy imuza'aza'ak mehe nupyhyk kwaw ywy pehegwer wà xe.

⁶³Moizez a'e, xaxeto Ereazar a'e no, upapar Izaew wà, ywytyr heta 'ymaw Moaw ywy rehe har rehe wà, Zotàw yrykawhu izywyr Zeriko henataromo wà.

⁶⁴A'e 'ym mehe Xinaz ywyxiguhu rehe wiko mehe Moizez a'e, Àràw a'e no, upapar Izaew a'e wà. Wapapar haw pitài haw romo a'e. Upapar Izaew ywytyr heta 'ymaw Moaw ywy rehe har rehe wà, Zotàw yrykawhu izywyr Zeriko henataromo wà. Wapapar haw mokoz haw romo a'e. Naheta kwaw teko pitài haw ipapar pyrer mokoz haw ipapar pyrer wainuinuromo wà.

⁶⁵— Paw rupi umàno putar ywyxiguhu rehe wà nehe, i'i Tupàn Tuweharupi Wiko Ma'e ipapar pyrer izypy mehe arer wanupe. Umàno azeharomoete wà. Karew Zepone ta'yr a'e, Zuzue Nun ta'yr a'e no, xo a'e zo numàno kwaw wà.