Mumutara Ŋic 4:15-22

¹⁵Ehame Wofuŋzi Sisera â ʒikare keretac â momorifâc‐ticne Barakire meo râec‐jopame ʒikazi jopawec. Eme Sisera e ʒikare keretac‐ticnaonec wiserâ waha kikezi rawec.

¹⁶Barakizi ʒikare keretâc â Sisera momorifâcne jâpec‐joparâ raku Harose‐Goim haeo fisirâ ʒikazi jopa‐fârewec. Ŋic moc mi akic‐jopambiŋ.

¹⁷Ehame Sisera e wiserâ raku Keniŋic Hebere ŋonâŋ‐ticne Jaele ere bozeo fisiwec. I ʒiŋucte: Hazoro ŋicwofuŋ Jabiŋ â Keniŋic Hebere gurufâcne ŋondeŋ‐jeŋicko wama fowec.

¹⁸Irec Jaelezi waha rarâ Sisera bâfuahuc âzâcnerâ muwec: “Bomboŋ‐nane, ʒira norao warec, mi hâwicguoc.” Eme Sisera e manarâ ere bozeo raʒiwec. Ehame ŋokac e qoruc ɋâfoŋnezi rufacnewec.

¹⁹Eme Siserazi ŋokac ʒiŋuc âzâcnewec: “Opâre hâmokopacte piticne mac moc naretec nazapo.” Eme ŋokac e susu ʒopo moc tapane rorâ râcneme nâme mocwâc rufacnewec.

²⁰Iŋuc eme ŋic e ŋokac âzâcnerâ muwec: “Motâcko domazemec. Eme ŋic i me i moczi fisirâ wio‐gareocmu: ‘Ʒira ŋic moc juŋgopieŋ me?’ Eme muzemec, aricne.”

²¹Iŋuc âzâcneme Hebere ŋonâŋ‐ticne Jaele e bozere fâzâ moc â hama rorâ kamic kamic jaha rarâ fâzâ i nakinao heme fotâcnerâ ŋifec mâreŋko kiwec. Ŋic e betaŋkerâ guŋ qâŋɋâŋne fowecte iŋuc ecneme hâmowec hâcne.

²²Ehame Baraki e Sisera jâperâ raku fisime Jaelezi waha ra bâfuarâ ʒiŋuc âzâcnewec: “Waretec noni ŋic basakic e gowatupe.” Eme e ŋokacte bozemaŋko raʒiwec. Raʒirâ Sisera e hâmocnezi nakinao bozere fâzâ kisoŋhec fome honewec.