Soukapwüng 4:15-22

¹⁵Iwe, ewe Samol mi Lapalap a eniwa Sisera me nöün sounfiu meinisin mi wawa woken, lupwen Parak a maun ngeniir. Mürin, Sisera a tötiu seni wan woken o süla.

¹⁶Nge Parak a tapweri ekewe woken me ekewe sounfiu tori Haroset-hakoim. Iwe, nöün Sisera sounfiu ra mäla meinisin ren ketilas. Esap wor eman a chüen manau.

¹⁷Nge Sisera a sü ngeni imwen Jael pwülüen Heper ewe re Ken. Pun mi wor kinamwe lefilen Japin ewe kingen Hasor me ewe familien Heper ewe re Ken.

¹⁸Iwe, Jael a towu seni imwan pwe epwe churi Sisera. A üreni, “Kopwe pwereto, ai samol, kopwe pwereto rei, nge kosap niuokus.” Iei mine a pwere ngeni o tolong lon ewe imw. Nge Jael a pwölüela fän echö planket.

¹⁹Iwe, Sisera a üreni, “Kose mochen kopwe ngeniei ekis koluk pwe üpwe ünümi, pun üa kaka.” Nge neminewe a suki ewe lenien milik o aünü ngeni. Mürin a pwal pwölüela.

²⁰Nge Sisera a üreni Jael, “Kopwe ütä leasamalapen ewe imw, nge are eman aramas epwe feito o aisinuk ika eman a nom ikei, kopwe üreni, ‘Ap.’”

²¹Mürin Jael pwülüen Heper a angei efoch chüfölün imw me efoch ama, a anifelong ren lupwen a kon o möürüchou ren an malülü, a amaanätiu ewe chuföl won esen mongön tori a pweretiu lepwül. Iwe, Sisera a mäla.

²²Lupwen Parak a tapweri Sisera, a tori imwen Jael. Neminewe a towu seni imwan pwe epwe churi. Iwe, a üreni, “Kopwe etto, üpwe apii ngonuk ewe mwän ka kütta.” Iei mine Parak a tolong lon imwan. Ikenan a küna Sisera a kon o mäla, nge efoch chüfölün imw a fotolong won esen mongön.