Mumutara Ŋic 10:9-18

⁹Eme Amoŋŋic jaŋe Judare guru â Benjamiŋte guru â Eferaimte guru Jordaŋ ʒiŋucnao jumbiŋ i jaŋe jopaniŋte Jordaŋ opâ fotâcnerâ raʒimbiŋ. Iŋuc ejarepie Israe ŋic jaŋe fific guguriŋ faio jujâmbâŋkembiŋ.

¹⁰Eme Israe ŋic jaŋe ʒiŋuc muhuc Wofuŋ kio wâwâsic ecnembiŋ: “Nâŋe Baali kiŋaŋ qajarehuc Anutu‐nâŋec go râpecgurâ sâqocne bahuc bugao bambeŋ.”

¹¹Eme Wofuŋzi Israe ŋic jazarâ muwec: “No Aigita ŋic, Amori ŋic, Amoŋŋic â Filisa ŋic jaŋeraonec mi batarac‐ŋopapo me?

¹²Erâ wâc Sidoŋŋic, Amaleke ŋic â Maoŋŋic jaŋe fific bacŋopambiŋ. Eme no kio wâwâsic enarepie jaŋere meonec batarac‐ŋopapo.

¹³Ehame ŋoŋe sifu no râpecnurâ nemu kiŋaŋ qajarembiŋ. Irec no mocwâc mi batarac‐ŋopapemu.

¹⁴Ŋoŋe rarâ nemu hone wosâc ejarembiŋ jaŋerao kio wâwâsic eniŋ. Eme jaŋe fific guguriŋ dameŋ‐ŋeŋicko batarac‐ŋopanʒepieŋ.”

¹⁵Iŋuc mume Israe ŋic jaŋe Wofuŋ ʒiŋuc âzâcnembiŋ: “Nâŋe sâqocne bambeŋte go gahac manakic sâc enârec. Mocjaha, ʒiŋuc numu‐gareŋgopeneŋ: Dameŋ ʒi batarac‐nâpoc.”

¹⁶Iŋuc murâ nemu jabane i behec‐jopa‐fârerâ Wofuŋ kiŋaŋ qacnembiŋ. Iŋuc epie Wofuŋ e Israe ŋic jaŋerao ʒârâ hâriŋ fowec irec busâqoc mana‐jarewec.

¹⁷Iŋuc fuame Amoŋŋic jaŋe roroc efârerâ Gileade mâreŋko teuŋ âtembiŋ. Eme Israe ŋic jaŋe wâc iŋuc jaha tumaŋne‐fârerâ Mizipa wâneŋko teuŋ âtembiŋ.

¹⁸Ehuc Israe ŋic, Gileade mâreŋte micne bapa jaŋe jaŋaczia wiwioc erâ mumbiŋ: “Mo ŋiczi Amoŋŋic jaŋehec ʒika fuŋkeocmu? Eme ŋic eki hâcne Gileade mâreŋte ŋecjucfâc nâŋâcne micne juzejec.”