Te Israel Tobolu Bidi Dabe 10:9-18

⁹Tama te Amon dabego te ąį Jordan nogelama, tama te Judago hani me, te Benjamingo hani me, te Efraimgo hani, te hani augwali dali te Amon dabego boi hwįgi pai. Tama tialima, te Israel dabe augwali dwai dene mu sabo sogo pedelai dao.

¹⁰Tialima, te Israel dabego Genuai Bidiba i weyu, tama augwaligo te po wali, “Dago dwai sę nagebolo yali, magi baso meni, dago nage tagalali, te dago God nage dago tagalama, tama dago te Balba lotu wali.” Augwaligo te po wali.

¹¹Tama Genuai Bidigo te Israel dabebolo te tama po wali, “Polobadu te Isip dabe me, te Amor dabe, me te Amon dabe, me te Filistia dabe me,

¹²te Saidon dabe me, te Amalek me, te Maon dabe, te hani augwaligo dage elaluama, tama dageba dwai sę mu ilai. Tama dagego enaba i obaso, tama eno dage te augwaligo nogode ma dobola sai dao.

¹³Tiali goli, dagego ena tagalama, tama gasa tibo godiba lotu wali. Tama tibaso, te eno dage tau ma sogobeo.

¹⁴Dage pelama, te duga digi sa muyu nigilali god i wagi pao. Augwaligo te dage sęgę sabo sogo tau somainu emainao.” Genuai Bidigo te Israel bagebolo te po wai.

¹⁵Tiali goli, te Israel dabego Genuai Bidi dali te po wali, “Dago dwai sę yalio. Te nago dabolo yainogo ebo sę te nago yao. Tiali goli, megi dago nagebolo hanalubo, te magi baso meni, te nago megi e sogo ma dobola somainogo hanalu wali.” Te Israel dabego te po wai.

¹⁶Tialima, augwaligo augwa te tibo godiba lotu wali te tiali te sę dabe sela sąnama, tama augwaligo Genuai Bidiba lotu po wali. Tama agai te Israel dabe homu dene elama, tama agai homugo augwali te sęgę ma tolidali homu yai.

¹⁷Nosali te Amon dabego ami bidi dabe sisinagaselama, tama augwa bidabo pesage te Gileatde nigali. Tama te Israel bidi dabe me sisinagaselama, tama augwa bidabo pesage te Mispa bulude nigalio.

¹⁸Te bidi dabe me te Israel dabe polalubo bidi dabe te Gileatde bidalubo bidi dabe augwa hasi tomode digi hanalua pali, “Te niwai bidi da dali polasa peyu, tama te Amon dabe dali boi hwįaibawe? Te tama tebo bidi aga te Gileatde te tigidali bidigo tobolu bidi bidaibao,” po wali.