Menge Ininang 2:7-40

⁷Ontò nepela se otaw netipon. Minikagi dan, “Pengkey tege Galiliya se kedita dan,

⁸meneng nekeikagi dan te medita kemolò kagi tadon wedà dan palos peg-ilingi.

⁹Medita se ogpeanan tinikedowan tadon, so doen menge tege Partya, aw tege Medya, aw tege Elam. Doen menge otaw lekat te Mesopotamya, aw Judiya, aw Kapadosya, aw Ponto, aw Asya.

¹⁰Doen heman otaw tikedo te Frigya, aw Pampilya, aw Ehipto, aw menge ogpeanan te Libya medapag te Sirene. Doen menge kedowa tadon Judiyo lekat te Roma. Doen heman menge otaw kenà Judiyo egtolò te ketanem tadon Judiyo.

¹¹Doen tege Kreta aw tege Arabya. Mig-indan se menge tege Galiliya sìyan te mèpiya ininang te Timanem. Ontò kidon mekelabet te inikagi dan, so nekeikagi dan te medita kemolò kagi tadon.”

¹²Ontò dan nepela aw migkebulung se aneng-aneng dan. Migpeinsaay dan, “Eden lay ini?”

¹³Meneng doen heman menge doma otaw migtompuyus, kagi dan, “Nelangot dan te bino.”

¹⁴Timindeg si Pedro sipat doma sempolò tegusà sogounun i Cristo kidoen. Penga niyan, minikagi sikandin amon domineg se kedita te otaw netipon. Kagi din, “Menge kedowa ko Judiyo, aw kedita niyo dini te Jerusalem, penenalan kaw, so doen ikegiyen ko kenyo.

¹⁵Eden niyo aw nelangot kay te bino, so simpana minem se otaw te bino, eked pa kelangot, so medanà pa se aldaw.

¹⁶Meneng sebad se neinang gina, so netoman den se kagi insolat te sebad telekeliwat te kagi te Timanem si Joel gebii,

¹⁷kagi din, ‘Seini se kagi te Timanem. Aw agpet den se temanan te keneyonan, ibegay ko se Espiritu Santo diyà te kedita te otaw. Yan komeliwat se menge batà niyo te kagi ko. Komità se menge kaling pa otaw te ipekità ko kandan. Megtegeinep heman se menge obanen kenyan.

¹⁸Aldaw sìyan, ibegay ko se Espiritu Santo diyà te kedita te otaw egtolò kanak, pengkey meama aw bayi. Komeliwat dan te kagi ko.

¹⁹Ipekità ko se kepelahan doton te langit. Ipekità ko heman dini te tanà se ledyawan te dipanog aw apoy aw ebel.

²⁰Megkengitngit se aldaw. Megkelalag se bolan iling te dipanog. Metoman iyan te eked pa okomi te Pengolo tadon se kedita te otaw. Yan se aldaw ontò medengeg.

²¹Meneng mekelowà lekat te salà se kedita te otaw memoyò diyà te Pengolo tadon.’ Yan se kagi te Timanem ingkeliwat i Joel.

²²“Na, menge kedomaan ko Judiyo, penenalan kaw te ikegiyen ko. Si Jesus tege Nasarit, yan se impetaga-taga te Timanem te sikandin se insogò din. Impetaga-taga din iyan pineokit te peg-inang din te inang metolos, aw kepelahan, aw ledyawan. Ontò niyo netegahan iyan so neinang iyan dini kenyo.

²³Pengkey tapay netegahan te Timanem aw eden se inangen niyo ki Jesus, meneng lekat te ibeg te Timanem se pegdakep niyo ki Jesus. Impelansang niyo sikandin te medaet otaw diyà te kros aw impeimatay niyo,

²⁴meneng inantay sikandin te Timanem lekat te nematay. Impelowà din si Jesus diyà te kemetayun, so eked daeg se kemetayun kandin.

²⁵Simolat se kemonaan tadon si David tepad ki Jesus, kagi din, ‘Netegahan ko te tebangan a te Pengolo aw wedad mekelamit kanak, so gayed a din egtekingan.

²⁶Yan ontò neluba se pedowan ko. Iduyun ko sikandin. Pengkey matay se lawa ko, doen pelimanan ko,

²⁷so eked a din pebeyai doton te lebeng. Eked kepakay diyà kandin aw meledak se lawa ko, so pinemallì a din.

²⁸Entayen a din lekat te nematay. Ontò neluba se pedowan ko so egdomaan a din.’ Yan se kagi ingkeliwat i David.

²⁹“Menge kedowa ko, ontò ko bengalen se kagi ko kenyo. Sìyan inikagi te kemonaan tadon gebii si David, kenà iyan tepad te kandin pegkeotawun, so nematay sikandin aw inlebeng se lawa din doton te ilib inewangan, aw penga niyan neledak. Kidoen pa se linebengan kandin lamig songkani.

³⁰Meneng te wedà pa kematay si David, sikandin se telekeliwat te kagi te Timanem. Doen impakang te Timanem te meinang selotan se sebad bowad-bowad i David, amon doen selotan lomowan iling te peglowan i David.

³¹Migpeliman si David te pegketoman niyan, aw yan minikagi sikandin te meantay se Misiyas pelimanan din, so kagi din, ‘Eked sikandin pebeyai doton te lebeng. Eked kepakay diyà te Timanem aw meledak se lawa te Misiyas isogò din.’

³²Netoman den iyan, so inantay te Timanem si Jesus lekat te nematay, aw kinità te kedita day te neantay sikandin lekat te nematay.

³³Ininang den si Jesus melangkaw doton te langit aw timangkil te Amay din. Tinoman den te Timanem se pakang din ki Jesus te isogò se Espiritu Santo, aw yan se kinità niyo gina aw dinineg niyo.

³⁴Sìyan inikagi i David, kenà iyan tepad te kandin pegkeotawun, so wedà keengat se lawa i David doton te langit, meneng diyà pa te lebeng. Gebii minikagi si David, ‘Minikagi se Timanem diyà te Pengolo ko, Penenoo ka dini te tangkil ko

³⁵lamig dàgen ko se menge poon no aw ipetolò ko dan kamno.’

³⁶Eneng-enengi niyo. Pengkey inlansang niyo si Jesus diyà te kros amon matay, meneng sikandin se ininang te Timanem Pengolo aw Misiyas.”

³⁷Pegdineg te menge otaw te inikagi i Pedro, ontò neantag se pedowan dan. Mig-insà dan ki Pedro aw doma sogounun i Cristo, kagi dan, “Elew, megmeno kay?”

³⁸Timaba si Pedro, “Pegselsel kaw te salà niyo. Pegpebonyag kaw tandà te pegpemenal niyo ki Jesu Cristo. Aw memenal kaw, pegwedaden te Timanem se salà niyo, aw Espiritu Santo se ibegay kenyo.

³⁹Migpakang se Timanem te ibegay din se Espiritu Santo diyà kenyo, aw diyà te batà niyo, aw diyà te otaw mediyò, so ibegay din diyà te kedita te otaw tewalen din.”

⁴⁰Nenamay pa minikagi si Pedro diyà kandan. Migpunù sikandin, kagi din, “Ikà niyo egdoma te kedomaan niyo eg-inang te medaet, amon eked kaw pelumuni.”