Hechos 2:7-40

⁷Ocmohcaitayah uan ocmotetzauayah, opeuqueh quihtouah: —¿Quenat amo galileos nochtin tlen tlahtohtoqueh?

⁸¿Uan quenih sehse tehuan itquincaquih tlahtouah ica in totlahtol tlen tehuan ica otnesqueh?

⁹Uan yeh tlen nican itcateh itualeuah itich miqueh tlalmeh: Partia, Media, Elam, siquin nican cateh tlen pouih Mesopotamia, Judea, Capadocia, Ponto, Asia,

¹⁰Frigia, Panfilia, Egipto, uan tlalmeh tlen pouih África tlen cateh ocachi nepa de Cirene, cahcalaquinih romanos, judíos uan tlen ocsilihqueh in tlaniltoquilistli judío,

¹¹cateh nican tlen pouih Creta uan Arabia, uan yeh nochtin itquincaquih tlahtouah ica in totlahtol uan techiluiah in uehueyi chiualisten tlen icchiua Dios.

¹²Nochtin ocmosintetzauihqueh uan amo ocmatiah tlenoh icyoluisqueh, opeuqueh icmosepantlahtlaniah: —¿Tlenoh isqui ictosniqui nochi nin?

¹³Ocsiquin oquinpinauayah uan octouayah: —Necateh iuintitoqueh.

¹⁴Ihcuacon Pedro omoman inuan in mahtlactlanse teotlatitlanten, uan chicauac oquimiluih in tocniuan tlen ompa omonichicohcah: —Judíos uan tocniuantzitzin tlen namonpouih Jerusalén, ixconcaquican notlahtol, innamechonahsicamatiltis tlen panotoc.

¹⁵Ninqueh tlacameh amo iuintitoqueh, quemeh namehuantzitzin nanconyoluiah, pues yaquin chicunaui hora cualcan itcateh.

¹⁶Tla yeh tlen mochiutoc yen tlen oquihtoh in teotlanauatani Joel:

¹⁷Ic itlamiyan in tonalmeh ihquin mochiuas, quihtoua Dios, incualtitlanis noEspíritu itich nochtin in tlacameh; namotelpocauan uan namochpocauan ictematiltisqueh tlahtol tlen neh inquinmactis, namotelpocauan quintasqueh nescayomeh de Dios, uan tlen ya tetahtzitzin iccochihitasqueh nescayomeh de Dios.

¹⁸Itich nonqueh tonalmeh incualtitlanis noEspíritu itich notlaqueualuan, tlacameh uan siuameh, uan yehuan ictematiltisqueh tlahtol tlen neh inquinmactis.

¹⁹Inchiuas uehueyi tetzauimeh iixco in iluicac, uan nescayomeh itich in tlalticpactli: istli uan tlitl, uan mic poctli.

²⁰In tonaltzin mocuipas tlayouilotl, uan metztli mocuipas istli, ihcuac ya ehcotos in tonal ihcuac uitz in toTecotzin, non tonal isqui ueyi uan mouistic.

²¹Uan nochi naquin icmonochilis nitoocaatzin in toTecotzin macmaquixti, Yehuatzin icmaquixtis.

²²’Namonochtintzitzin tlen namonpouih Israel, ixconcaquican nin tlahtol tlen innamechoniluis: Jesús tlen poui Nazaret ocpiaya niteyequitalitzin Dios. Uan Dios onamechonnextilih non ica uehueyi iluicacchiualisten, tetzauimeh uan nescayomeh tlen Jesús oquichiu, quemeh namehuantzitzin ya nanconmatih.

²³Uan nin Jesús namehuantzitzin onancontemactihqueh itich miquilis inmac in tlahtlacouanih, macsohsacan itich cruz. Ohcon oyah tlatemactil ica nitlaniquilitzin Dios, naquin yocmatia nic ohcon mochiuas.

²⁴Masqui ohcon, Dios oconyancuicayolitih uan ocmaquixtih itich in toneualistli den miquilistli. Pues in miquilis amo oquipix chicaualis icmocauis imac.

²⁵Ixconcaquican tlen oquihtoh in totatah David de Jesús: Nochipa inpia Dios queh noteyacancatzin; Yehuatzin metzticah nonauac, amo queman itlah nechuitzitis.

²⁶Ica non paqui noyolo, uan inmitzoncuicatia ica paquilistli. Notlalnacayo moseuis ica mic yolchicaualis;

²⁷nic inmatoc Tehuatzin amo itnechmocauilis campa cateh in miquemeh, uan amo itcomocauilis maihtlacaui nitlalnacayo moTlapihpincatzin.

²⁸Otnechonnextilih moohtectzin campa cah yolilis, uan inyolpaquilistemis nic nisqui monauactzinco.

²⁹’Nocniuan judíos, cuali itmatoqueh nic in totatah David omomiquilih uan octlalitoh itich in ticochtli, uan oc axan nican tooctoc.

³⁰Pero in David ocatca teotlanauatani, uan ocmatoya nic Dios omoyectencau inauac, oquiluih nic se naquin oneuas de yeh isqui in Cristo Temaquixtani uan mocauas ueyitiquiuahqui quemeh yeh.

³¹David yoquitztoya nic in Cristo Temaquixtani yancuicayolis, uan ica non oquihtoh Yehuatzin amo icmocauilis campa cateh in miquemeh uan amo iccauas maihtlacaui nitlalnacayo.

³²Uan Yehuatzin yen Jesús naquin Dios ocyancuicayolitih, nochtin tehuan yec ottaqueh uan ittematiltiah.

³³Uan ohcon Dios ocuehcapantlalih Jesús uan octlalih iyecmapantzinco, uan ocmactih in Espíritu Santo tlen Yehuatzin Dios omoyectencau techonmactis, uan axan Jesús yocoualtemactih nin tlen axan nanconitah uan nanconcaquih.

³⁴Ixconmatican, amo yen David naquin otlehcoc iluicac, pero yeh in David oquihtoh: In toTeco Dios oquiluih noTecotzin: “Xonmotlalihtzino noyecmapan

³⁵uan inquintlalis itlampa mocxitzitzin aquihqueh mitzoncocoliah.”

³⁶’Cuali ixconmatican, namonochtintzitzin tlen namonchanchiuah nican Israel: Yehuatzin Jesús naquin namehuantzitzin onanconsohsaqueh, Dios ocmotlalilihtzinoh mai toTecotzin uan Cristo toTemaquixtihcatzin.

³⁷Tlen ompa omonichicohcah, ihcuac ohcon occaqueh, temohtih oyoltlaocoxqueh. Uan oquintlahtlanihqueh in Pedro uan nocsiquin teotlatitlanten: —Tocniuan, ¿tlenoh moniqui itchiuasqueh?

³⁸Pedro oquinnanquilih: —Xonmoyolcuipacan inauactzinco Dios, uan sehse namehuantzitzin xonmocuatequican ica nitoocaatzin Jesucristo; ohcon nanconahsisqueh tetlapohpoluilis itich namotlahtlacol, uan nanconsilisqueh in Espíritu Santo, tlen Dios namechontlaocolis.

³⁹Pues nin tlen Dios omoyectencau cah para namehuantzitzin uan namoconeuan, uan nochtin naquin cateh uehca, uan nochtin naquin Dios comoniquiltis quinnotzas.

⁴⁰Ica nin uan ocsiquin miqueh tlahtolten, Pedro oquinnonotz uan oquinyolchicauaya, oquimiluaya: —Xonquisacan itzalan ninqueh tlalticpactlacameh tlahtlacouanih, xonmomaquixtican.