Ntendwa 2:7-40

⁷Mokwehelwa kwawo, wagambana, “Togola wantu wano wakusimwila vino sawo Wagalilaya!

⁸Vyatenda vivihi naho chose chaweva wakasimwila mwe semo zetu?

⁹Chalawa Patiya na Mediya na Elamu, kulaila Mesopotaniya na Yudeya na Kapadokiya, kulaila Ponto na Asiya,

¹⁰Kulaila Filigiya na Pamfiliya, kulaila Misili na mizi ya Libiya hajihi na Kilene. Watuhu chiwajeni chilaila Lumi,

¹¹woseni Wayahudi hamwenga na sawo Wayahudi watimile sila ya Chiyahudi ya kumlonda Chohile, watuhu chilaila Kilete na Uwalabuni, suwe choseni chaweva wakalonga mwe ntendwa zetu wenye mbuli nkulu Chohile adamanye.”

¹²Wehelwa na kususuhala, wauzana chila yumwenga, Vino nivyo mbwani?

¹³Mna watuhu nawakawabela kuwagamba, “Wantu wano wakolwa mpombe pya.”

¹⁴Petulo niyo achimala hamwenga nawasigilwa mlongo na yumwenga kwa izwi kulu, akonga kugutila idifyo dya wantu. Wayahudi weyangu na wose mkwikala Yelusalemu netegelezani niwagambile imbuli ino yagaze.

¹⁵Wantu wano hawakoligwe, mwawafanyanya vihiye, mtondo wa sa ntatu ino.

¹⁶Vino nivyo muwoni ywa Chohile Yoweli alongaga

¹⁷Chohile agamba vino nivyo hunga nitende mwa mazuwa yo uhelo, Nanilavye Muye wangu kwa chila yumwenga. Wana wenyu wa chilume na wachiche nawalonge ulosi wangu, wana wenyu wa chilume nawawone uwoni, wadalahala nawo nawalote sozi.

¹⁸Hata mwa watumwa wangu wose wachigosi na wachivyele, naniwenke Muye Ukukile mwa mazuwa ayo, nawo nawalonge ulosi wangu.

¹⁹Nanidamanye vilagiso kulanga na mpituko hasi heisi. Nakutende na sakame, moto na mosi uzamile,

²⁰zuwa nadijelwe chiza, mnenge nawo nauhitukile winkundu saviya sakame, umo zuwa dikulise naho zuwa dyo kwizila Zumbe hadinati kwiza.

²¹Akajika, wantu wose nawalombeze kwa zina dya Zumbe nawakombolwe.

²²Nyuwe wagosi wa Waizulaeli tegelezani, Yesu ywa Nazaleti nani mntu udahi wakwe kulaila kwa Chohile wikwa holumpe mwenyu kwa vilagiso na mpituko Chohile adamanye mwakwe. Nyuwe wenye muimanya imbuli iyo kwaviya ilaila mwenyu.

²³Chohile amanyaga mzungu wakwe mwenye, kugamba Yesu kenkizwa mwe imikono yenyu, mumkoma kwa kuwalekela wantu wavu wamkome kwa kumtundika mo msalaba.

²⁴Mna Chohile kamuyusa, kamtenda udahi wa file usekumdaha, kwaviya kalekeilwa mwa masulumizo ya file.

²⁵Daudi kamlongela vino, “ ‘Namwonaga Zumbe nkanana zose mwa meso yangu, ehajihi na miye naho sanisingisike.

²⁶Ivyo selelwa vidala, ulosi wangu umema chinyemi. Miye hata uneva umwili naubanike, nanikale na msuhi,

²⁷kwaviya weye Chohile honase mwe si ya wabanike. Homwase mtumwa ywako mkuka awoile kuzimu.

²⁸Kunilagisa sila ikunigala ko ujima, uwiyaho wako wanibwedeza.’

²⁹“Walukolo weyangu, naungwa niwagambile pwilili ichindedi mwa tate mkulu Daudi. Kabanika na kuhambwa, mbila yakwe chinanayo hano mwa mazuwa yano.

³⁰Nani muwoni naho nakavimanya Chohile alongaga namwinke mbwani, Chohile elisaga kugamba nanimwinke yumwenga mo lukolo lwa Daudi chigoda cho useuta saviya Daudi neli.

³¹Daudi nakawona viya Chohile akunga atende, ivyo alonga mbuli za kuyuka kwa Zumbe Yesu Kulisito umo akagamba, ‘Hasigwe kuzimu, mwili wakwe hauwoile mwe mbila.’

³²Chohile kamuyusa yuno Yesu, suwe chose chaukula ichindedi chino.

³³Kenulwa koudahi wa Chohile, Tati yakwe, naho kahokela Muye Ukukile kwakwe saviya Chohile alongaga. Vino mkuwona na kwiva haluse nivyo Muye Ukukile awajuluzize.

³⁴Suyo Daudi aitile kwembingu, mna nuyo agambaga, ‘Zumbe alongaga kwa Zumbe dyangu, Ikala halume hangu

³⁵kubula niwatende wehi wako wekale hasi he viga vyako.’

³⁶“Niyo wantu wose we nyumba ya Izulaeli wamanya kugamba yuno Yesu wamtungikaga mo msalaba nuyo atendigwe Zumbe naho Kulisito Mkombola asagulwe ni Chohile.”

³⁷Umo wantu weze weve imbuli ino niyo wengilwa ni chinyulu mwe myoyo yawo na kulonga kwa Petulo na wasigilwa watuhu, “Walukolo wetu chitende mbwani?”

³⁸Petulo awagamba, “Chila yumwenga ywenyu eile masa yakwe naho abatizwe kwa zina dya Yesu Kulisito, naho mkunga mlekeilwe masa yenyu niyo mwahokela Muye Ukukile uyo ntunyo.

³⁹Chiya Chohile alongaga nawenke nyuwe hamwenga na wana wenyu, na kwa wose wehale, wose Zumbe Chohile ywetu awetange kwakwe mwenye.”

⁴⁰Petulo kawalombezesa naho kwa milosi ilozese akawafunda, “Kwehonyeni mwa maya ya Chohile yakwiza mwa wantu wano wata masa!”