MARKOS 9

1

2

3

4

5

6

7

8

9

10

11

12

13

14

15

16

¹Jesusen' bcháḻjḻene' benne' ka' žónḻengake' Ḻe' tẕen, na' wnné': —Da' li žapa' ḻe'e, zej nnita' benne' ka' nga, benne' bi gátgake' kate' ḻé'ežegekle' ža yedjnná bia' Dios yežlyó nga, na' ḻa' ḻaw yeḻa' wnná bia' ẕen chie'.

²Kate' ba wdé x̱ope ža, Jesusen' bchi'e Bedw ḻen Jakob, na' Ẕwa, na' ḻégakze' jake' to ḻaw ya'a sibe, gan bcha' kan ẕnna' ḻaw Jesusen' ḻawgak yonne' ka'.

³Wyép yes baní' laže' da' nakw Jesusen', na' goken chícheḻe'e. Ẕíla'do'ze goken, na' no benne' žibe' laže' yežlyó nga, bi gak gone' laže' ẕíla'do'ze kan gok ẕen'.

⁴Bḻa' ḻawgak Lías, na' Moisés gan nníta'gake', ẕcháḻjḻengake' Jesusen'.

⁵Naž Bedon' gože' Jesusen': —Benne' wsedle, ba nez ẕen naken chežo zoažo nga. Gona' chonne yo'o laga' nga, to chio', na' yetó che Moisés, na' yetó che Lías.

⁶Ki wnná Bedon' dan' bi nnezle' dan' ẕnne'. Ka' goken dan' ẕžébegak benne' wsedle ka' che Jesusen'.

⁷Naž wžé' to bejw da' wló'on ẕoḻ ḻégake', na' benle chi'i to benne' ẕchaḻje' ḻo bejw na', na' wnné': —Benne' ni nake' Ẕi'na'. Nži'ila' Ḻe'. Le wzé nag chie'.

⁸Ḻa' bwíategake' san biž no benne' bḻé'egekle'. Toze Jesusen' zóaḻene' ḻégake'.

⁹Kate' ne yó'ogake' nez, žétjgake' ḻaw ya'a siben', Jesusen' bchi'le' ḻégake' bi wzéngekle' no benne' kan gok dan' bḻé'egeklen', kate' yebanže' Ḻe', Benne' Golje' Benách, ḻo yeḻa' got.

¹⁰Che ḻen bzoa chóchzegake' dan' wnné' ḻo yichj ḻáẕdo'gake', na' ḻa' ḻégakze' belnnable' ljéžgake' biẕ zejḻás dan' wnné' kate' wnné' yebane' ḻo yeḻa' got.

¹¹Wnnábgekle' Jesusen', na' wnnágake': —¿Biẕ chen' ẕnnagak benne' yodo' wsedle ka' žon byenen ḻa' Lías zga'ale' kate' ḻa' Benne' Criston'?

¹²Bechebe Jesusen', na' wnné': —Da' li ḻa' Líasen' zga'ale', na' yecá'n chawe'e yógo'te kan žaḻa' gákgaken. Na'a, ¿biẕ chen' nyejw ḻe'e yiche la'y da' ẕnna žon byenen Benne' Golje' Benách sáka'ḻi'e, na' wzoagak benách ka' Ḻe' cheḻa'ale?

¹³Žapa' ḻe'e: ba bḻa' Líasen', na' béngake' chie' kan gónegekle', kan nyejw ḻe'e yiche la'y kan žaḻa' gaken chie'.

¹⁴Kate' bežín Jesusen' ḻen benne' ka' nníta'ḻengake' Ḻe' tẕen gan zej nnita' yezíka'gak benne' wsedle chie' ka', bḻé'egekle' zej nnita' benne' zan ga na', na' benne' yodo' wsedle ka' želdíḻ diže'e ḻen benne' wsedle chie' ka'.

¹⁵Kate' benne' zan ka' bḻé'egekle' Jesusen', bebángekle', na' taríaze wzá'gake' gan zi'e, na' wdápegake' Ḻe': “Padiox̱.”

¹⁶Naž Jesusen' wnnable' benne' wsedle chie' ka', na' wnné': —¿Biẕ dan' ẕdíḻ-ḻenle ḻégake'?

¹⁷Bechebe to benne' zoe' ladjw benne' zan ka', na' wnné': —Benne' wsedle, bedjwá'a x̱kwide' byodo' chia' chio' Le', dan' yo'obe' be' x̱iwe' da' žonen ga bi ẕnnabe'.

¹⁸Kate' žo'o be' x̱iwen' ḻebe', ẕžix̱ ẕḻolen ḻebe' ḻo yo, na' ẕbia bžina' zide' žoa'abe', na' žẕej láye'be'. Che ḻen zej ẕžitbe'. Wnnabla' benne' wsedle chio' ka' yebéjgake' be' x̱iwen', san bi wẕáke'gekle'.

¹⁹Bechebe Jesusen', na' wnné': —Ḻe'e, benne' bi žejḻe'le che Dios. ¿Gáka'x̱tekze gon byenen sóaḻena' ḻe'e? ¿Gáka'x̱tekze gon byenen gaka' ẕen ḻaže' ḻen ḻe'e? Le yedjwá'-be' chia'.

²⁰Zá'gake' zej noe'e-be' gan zoa Jesusen'. Kate' be' x̱iwen' bḻe'elen Ḻe', ḻa' bx̱izten ḻebe'. Wže'be' ḻo yo, na' bžix̱ bḻolen ḻebe', na' wžía bžina' zide' žoa'abe'.

²¹Naž Jesusen' wnnable' x̱a x̱kwiden', na' wnné': —¿Gáka'x̱te ba goken žaken ki chebe'? Wnná x̱aben': —Na' náktebe' x̱kwíde'do' žak ki chebe'.

²²Zan chi'i ẕžen' ḻebe' ḻo yi', na' ẕan nis nich goten ḻebe'. Che ḻen, cha' žako' late', beyache' ḻaže'l neto', na' gokḻen neto'.

²³Jesusen' gože' ḻe': —Cha' gak chejḻi'o che Dios, yógo'te waken cha' chejḻi'o chie'.

²⁴Ḻa' wnnete zižje x̱a x̱kwiden', na' wnné': —Žejḻi'a chie'. Gokḻen neda' nich chejḻe'ža' chie'.

²⁵Kate' bḻe'el Jesusen' za'gak benne' zan ka', ẕchígake' Ḻe', gože' be' x̱iwen', na' wnné': —Le', be' x̱iwe', be' žonen ga bi ẕnnagak, na' bi žéngekle benách ka', na'a ẕchi'la' le' yežojo' ḻo x̱kwiden', na' biž chazo' ḻebe'.

²⁶Wžéžeya'a be' x̱iwen', na' bžix̱ bḻol-ḻe'en ḻebe'. Naž ḻa' bežojten, na' bka'nen ḻebe' ka to x̱kwide' gat. Ka' goken, bchaḻjgak benne' zan ka', na' wnnágake': —Ba natbe'.

²⁷Naž Jesusen' bex̱we' na'be', na' bechise'-be', na' beyás x̱kwiden'.

²⁸Naž wyó'o Jesusen' to yo'o, na' ḻa' ḻégakze benne' wsedle chie' ka' wnnábgekle' Ḻe', na' wnnágake': —¿Biẕ chen' bi gok yebejto' neto' be' x̱iwen'?

²⁹Jesusen' gože' ḻégake': —Bi gak yebejle ka'ze be' x̱iwe' ki, san toze cha' wcháḻjḻenle Dios, na' gonle wbás.

³⁰Kate' bezá' Jesusen' ḻen benne' ka' žónḻengake' Ḻe' tẕen ga na', wdégake' gan nbab Galilea. Gónele Jesusen' bi nnezle no benne' gan zoe',

³¹dan' žsedle' benne' wsedle chie' ka'. Gože' ḻégake': —Wdégake' neda', Benne' Golje' Benách, ḻo na'gak benne' ka' gótgake' neda', san te gata', kate' tegak chonne ža, yebana'.

³²Bi bejní'igekle' da' ni da' gože' ḻégake', na' dan' ẕžébegake', bi be wnnábgekle' Ḻe'.

³³Naž bžin Jesusen' ḻen benne' ka' žónḻengake' Ḻe' tẕen ḻo yež Kapernaum, na' kate' ne nníta'gake' to yo'o, Jesusen' wnnable' ḻégake', na' wnné': —¿Biẕ dan' wdíḻ-ḻenle lježle kate' ne yo'ole nez?

³⁴Naž ḻégake' wnníta'gake' žize dan' wdíḻ-ḻengake' ljéžgake' ḻo nezen' cha' nólgake' gake' benne' blo.

³⁵Naž wžé' Jesusen', na' bḻiže' chežínnote benne' wsedle chie' ka', na' gože' ḻégake': —No benne' žénele' gake' benne' blo ládjwle ḻe'e žaḻa' gake' ka to benne' kwíde'ze, na' ḻezka' žaḻa' gake' ka ni'a na'le yógo'tele.

³⁶Naž Jesusen' bex̱we' to x̱kwide', na' bzoe'-be' gachje ḻáwe'le gan nníta'gake'. Wdeḻe'e-be', na' gože' ḻégake':

³⁷—No benne' si' ḻo ne'e to x̱kwide' ki dan' nakbe' chia', ḻezka' si' ḻo ne'e neda', na' no benne' si' ḻo ne'e neda', kege nedza' si' ḻo ne'e, san ḻezka' si' ḻo ne'e X̱a', Bennen' bseḻe'e neda'.

³⁸Naž Ẕwa gože' Jesusen': —Benne' wsedle, bḻe'elto' to benne' žebeje' be' x̱iwe' ka' yo'ogak benne' ka', na' ẕkonle' žin lo'. Bchi'leto'-ne' biž gonen', dan' bi žónḻene' žo'o tẕen.

³⁹Naž Jesusen' gože' ḻe': —Bi wchí'lele-ne', dan' cha' zoa no benne' žone' to yeḻa' wak da' zan' ya'abá che Dios, na' ẕkonle' žin la', bi gak nne zi'e chia'.

⁴⁰Ki naken, no benne' bi ẕži'e chežo, žakḻen bennen' žo'o.

⁴¹No benne' wneẕjwe' chele to ẕíga'do' nis da' ye'jle dan' žónḻenle neda', Benne' Criston', tẕen, si'kze' da' žeyaḻa' chie'.

⁴²Ḻezka' wnná Jesusen': —No benne' gone' ga gon to x̱kwide' ki doḻa', x̱kwiden' žejḻe'be' chia', gakže chawe' che bennen' cha' wcheje' to yiche žotw yene', na' chejžó'n kwine' ḻo nisdo'.

⁴³Cha' to no'o gonen ga gono' doḻa', bchogen'. Gakže chawe' chio' chejo' gan so' nbano' zoa toze no'o, kege zoa chope no'o, na' chejchó'o ḻo yi' gabíl, gan bi yoḻe yi' chen.

⁴⁴Ḻo latjen' bi gatgak bzoga' ka' yo'ogak benne' gat ka', benne' ka' chejnníta'gake' ga na', na' yin' bi yoḻen.

⁴⁵Ḻezka', cha' to ni'o gonen ga gono' doḻa', bchogen'. Gakže chawe' chio', chejo' gan so' nbano' zoa toze ni'o, kege zoa chope ni'o, na' chejchó'o ḻo yi' gabilen', gan bi yoḻe yi' chen.

⁴⁶Ḻo latjen' bi gatgak bzoga' ka' yo'ogak benne' gat ka', benne' ka' chejnníta'gake' ga na', na' yin' bi yoḻen.

⁴⁷Ḻezka' cha' to yej ḻawo' gonen ga gono' doḻa', wlejen. Gakže chawe' chio' chejo' gan ẕnna bia' Dios zoa toze yej ḻawo', kege zoa chope yej ḻawo', na' chejchó'o ḻo yi' gabilen'.

⁴⁸Ḻo latjen' bi gatgak bzoga' ka' yo'ogak benne' gat ka', benne' ka' chejnníta'gake' ga na', na' yin' bi yoḻen.

⁴⁹’Nich gape chi'ižo beḻa' ẕwázježon zede', na' ẕgála'žon žoa'a yi', nich bi kwia yin', na' ẕwázjegake' zede' yógo'te biado' ka' ẕzéygake'-ba' ḻo bkog la'y che Dios. Da' ni žsedlen žo'o kan ga'ngak chawe' yógo'te benách chie' ka'.

⁵⁰Nak chawe' zede', san cha' yenít yeḻa' sna'a chen, ¿nakx̱ gak yeyonžon sna'a? Le gak ḻa' ḻé'ezele ka zede' chawe', na' bga'n cháwe'do' tole ḻen yetole.