MARCUSI 8:14-34

¹⁴Dai maitʌgito ʌgai isbʌquiagi cuaadagai dai mosaliʌmo paana bʌcaiticatadai vaarcuʌrʌ.

¹⁵Taidʌ ʌSuusi itʌtʌdai gʌmamaatʌrdamiga: ―Gofariseo navaitigadʌ dai Eroodʌsi navaitigadʌ maicʌʌgadu ―astʌtʌdai ʌSuusi.

¹⁶Vaidʌ ʌmamaatʌrdamigadʌ aipaco gʌnaatagidimi daidi caiti: ―Maiviaa aatʌmʌ paana cascʌdʌ pocaiti goovai ―ascaiti.

¹⁷Taidʌ ʌSuusi maí istumaasi aatagaitadai ʌgai daidʌ itʌtʌdai: ―¿Tuimʌsi pocaiti mʌsai maiviaa paana? ¿Maitamʌsquiaa maatʌ caʌ istumaasi gʌnaagidi aanʌ? ¿Tomali maitʌntʌgito nʌidi istumaasi ivueeyi aanʌ? Sʌʌlicʌdʌ maicʌʌga vaavoitudai aapimʌ.

¹⁸¿Maitamʌsnʌnʌeeyi aapimʌ dai maitamʌstʌtʌcaidaga?

¹⁹¿Maitamʌstʌgito aidʌñsi bibi aanʌ ʌtaama mil oodami ʌtaama paana mʌtʌʌqui aasarai ʌmpagi saasaquigadʌ? ―astʌtʌdai ʌSuusi. Taidʌ ʌmamaatʌrdamigadʌ itʌtʌdai: ―Baivustaama dan gooca ―astʌtʌdai.

²⁰―Dai aidʌñsi bibi aanʌ ʌmaacova mil oodami cuvaracami paanacʌdʌ, ¿mʌtʌʌqui aasarai susudacami ʌmpagi? ―astʌtʌdai ʌSuusi. Taidʌ ʌgai itʌtʌdai: ―Cuvaracami ―astʌtʌdai ʌmamaatʌrdamigadʌ.

²¹Taidʌ ʌSuusi itʌtʌdai: ―¿Vʌʌscʌrʌ mʌsmaiquiaa maatʌ caʌ? ―astʌtʌdai. Suusi maiaagaitadai navaiti paana vʌʌtarʌ baiyoma aagaitadai ʌgai ʌmamaatʌtuldaragadʌ ʌfariseo dai Eroodʌsi sai maicʌʌgadu.

²²Dai gooquiʌrʌ aayi ʌgai Betasaidʌrʌ, mʌtai ami vuaapi ʌSuusi ʌmo cʌʌli mainʌaadami, dai daañimi sai taatana.

²³Taidʌ ʌSuusi noviaiñdʌrʌ bʌi ʌcʌʌli dai vaidacai ugidiana ʌBetasaida. Dai ami vuupujiana tʌi gʌsisivaraga dai vuupuidʌ daama darai gʌnoonovi, dai tʌcacai sabaig istuiditadai isnʌaadagi tomasi palʌpi.

²⁴Taidʌ ismaacʌdʌ mainʌaadatadai nʌnʌaava daidʌ itʌtʌdai: ―Nʌidi aanʌ oodami ʌpa maasi uusi dʌmos ajioopai ―ascaiti.

²⁵Taidʌ ʌSuusi ʌpamu vuupuidʌ daama darai gʌnoonovi, vaidʌ ʌcʌʌli cʌʌga gʌtʌgito nʌnʌʌnai dai cacʌʌga istui isnʌnʌaavagi dai cʌʌga nʌidi vʌʌsiaʌcatai.

²⁶Taidʌ ʌSuusi ootoi ʌcʌʌli sai noragʌna daidʌ itʌtʌdai: ―Maiti vaaqui Betasaidʌrʌ, dai tomali maiaagiada imaasi tomali ʌmaadutai ―astʌtʌdai.

²⁷Dai gooquiʌrʌ ii ʌSuusi ʌʌmadu gʌmamaatʌrdamiga vʌʌsi ʌmapʌcʌrʌ Sesareeʌrʌ Filiposi dʌvʌʌriʌrʌ. Dai voiyamu tʌcacai ʌSuusi gʌmamaatʌrdamiga daidʌ itʌtʌdai: ―¿Voorʌ giñaagai ʌoodami? ―astʌtʌdai.

²⁸Tai ʌgai aa noragi daidʌ itʌtʌdai: ―Ʌʌmoco pocaiti pʌsaidʌ ʌrʌVuaana ismaacʌdʌ vapaconaiña oodami dai aa pocaiti pʌsaidʌ ʌrEliiasicaru, dai aa pocaiti pʌsaidʌ ʌrʌmo Diuusi ñiooquituldiadamigadʌ ―astʌtʌdai ʌmamaatʌrdamigadʌ.

²⁹Tai amaasi ʌSuusi itʌtʌdai: ―¿Dai aapimʌo moorʌ giñaagai? ―astʌtʌdai. Taidʌ ʌPiiduru itʌtʌdai: ―Aapiapʌ ʌrʌCristo dai Diuusi gʌootoi ―astʌtʌdai.

³⁰Dʌmos ʌSuusi sʌʌlicʌdʌ daí sai maiaagidiña tomali ʌmaadutai.

³¹Dai amaasi ʌSuusi gʌaagacai mamaatʌtuldimi dai aagidi sai ʌgai viaacatadai ʌmo sʌʌlicami dai viaacatadai issʌʌlicʌdʌ soimaa taatagi dai aagidi sai mosgajiaadʌrʌ viaa agaitadai ʌtʌtʌaanʌdami ʌʌmadu ʌpapaali tʌtʌaanʌdamigadʌ dai ʌʌmadu ʌmamaatʌtuldiadami sʌʌlicami. Dai aagidi ʌʌpʌ mʌsai muaa agaitadai dai aagidi sai bovaica tasaicʌdʌ duaaca agaitadai.

³²Vʌʌsi gomaasi cʌʌ sʌʌli aagidi ʌgai gʌmamaatʌrdamiga. Taidʌ ʌPiiduru ʌcovai vaidacai dai bagaidimi.

³³Taidʌ ʌSuusi ajaco cʌquiva dai nʌnʌidi gʌmamaatʌrdamiga dai bagaimi ʌPiiduru aduucai: ―Maitigiñʌʌmadu aimʌrda aapi Diaavora. Aapi pocaiti sai maitʌaagai isivuaadagi aanʌ istumaasi Diuusi ipʌlidi ―astʌtʌdai.

³⁴Dai amaasi vaí ʌSuusi gʌmamaatʌrdamiga ʌʌmadu ʌoodami daidʌ itʌtʌdai: ―Isʌmaadutai giñoidatucuda ʌliada maitʌaagai isʌʌgi gʌtʌgitocagi, dai gʌaagai isvʌʌscʌrʌ baigʌducagi siʌduñiada gʌmuaatuda giñvaavoitudaitai daida giñoidatucuda.