Markuj 8:14-34

¹⁴Irail ap monokela prot oko, men kapinwar arail, lopon prot ta ieu mimi re rail nin jop o.

¹⁵I ari kapun on irail majani: Kalaka en Parijär ko ar kalap o en Erodej a kalap.

¹⁶Irail ap lamelame nan pun arail: Jota atail prot oko.

¹⁷Ni en Iejuj a kotin maniada, a majani on irail: Da me komail toutouki a jota kan omail prot? Komail jaikenta dedekila o weweki? Monion omail kapikapitakaita?

¹⁸Maj omail mia, ap jota kilan; jalon omail mia, ap jota ron. O komail jota tamataman,

¹⁹Ni ai pilinon me limekid lopon en prot limau o, kopou en maremor depa, me komail deukada? Re ap potoan on i: Me eijokriau.

²⁰O iju nan pun en me pakid, kopou en maremor depa, me komail deukada? Re ap potoan: Me iju.

²¹A ap kotin kainoma re ’rail: A da me komail jota dedeki?

²²A ap koti don Petjaida. Re ap wa don i majkun amen, poekipoeki en jair i.

²³A ap kotin ale pa en me majkun o kaluala jan ni kijin kanim o; A ap likidi on ni maj a o pwil poa lim a ko ap kainoma re a, ma a kilanada waja de jo?

²⁴I ari jarada potoan: I kilan aramaj akan likamada tuka kai, me alialu jili.

²⁵A pil pwil pon maj a lim a ko, ap kajaradakeda. I ari kelailada ap kilanada mau.

²⁶A ap kotin kadaralan nin im a majani: Koe depa pur won ni kijin kanim o, o pil depa indai on meamen nin kanim o!

²⁷Iejuj i japwilim a tounpadak kan ap kotieila nan kanim en Jäjarea Pilipi ko. Ari, ni a kotikot kowei, ap kotin kainoma ren japwilim a tounpadak kan majani on irail: Ij me aramaj inda me nai?

²⁸Irail japen i potoan on: Ioanej jaunpaptaij; a akai inda, me Eliaj; a akai, me amen jan ren jaukop akan.

²⁹A ap kotin kainoma re irail: A komail, ij me komail kin inda me nai? Petruj ap japen potoan on i: Komui Krijtuj!

³⁰I ari kotin kalik irail edi, re depa indai on meamen i.

³¹A ap kotin tapiada kawewe kin irail, me Nain aramaj en kalokolok toto o jokonekonla pan jaumaj akan, o jamero lapalap akan, o jaunkawewe kan, o pan kamela, ap pan maureda murin ran jilu.

³²Majan wet a kotin majani janjal. Petruj ap ukada i tapiada kapun on i.

³³Iejuj ap kotin jaupeido aupwil jili pon japwilim a tounpadak kan, kapun on Petruj majani: Kola muri, Jatan! Pwe om lamelam kaidin en Kot, a en aramaj.

³⁴A kotin molipedo pokon o japwilim a tounpadak kan, a majani on irail: Meamen pan idauen ia, en tounmeteki pein i, ap wada a lopu, idauen ia.