Mark 8:14-34

¹⁴Ba ana nonorayauna bread sita yauni wai si nota wapei, saba karisi yai kesanaikei wata waka kamonai i mamana.

¹⁵Saba Iesu i kaotuneisi, “Ko kinana kabitamnimi Pharisees biyisi ba Herod asi bibeyebeyena nanakasike bage yeast ina nunui.”

¹⁶Ba nikona kosi wata si dimeyanei ba si wona, “Kota bread kega ta yauna kairavina nikasike i sisiya.”

¹⁷Iesu asi bidimeyana i kuiri, wai i toirubaisi, “Awaika kairavina bread kega ko yauna wai ko bisisiyei? Komi ko kinakinani ba ko kuikuiri kona kega? Komi karauwata nuwanuwami padapadasi?

¹⁸Komi matami e mamana ba kega ko kinakinani kona? Ba tainami e mamana ba kega ko nonora kona? Ba ko notanota panani kona kega?

¹⁹Maranai pipiya 5,000 kairavisi bread asi 5 a botomnisi ba si kam botaura wai poga biyamo koi bonuwisi?” Si kaobeyei si wona, “Asi 12.”

²⁰“Ba pipiya 4,000 kairavisi bread asi 7 a botomni maranai si kam botaura wai, poga biyamo si bonuwa, ko yauna?” Ba kosi si wona, “Poga asi 7.”

²¹Ba kurisi i wona, “Mekabage wai komi karaku wata ko biburuburuwei.”

²²Kosi si botu ku Bethsaida, ba sebare mata potapotana kesana si botuwei, ba Iesu si babai kata ita borubai.

²³Ba Iesu sebarena yarona i yauni ba i naovei meyaga si kasibau taveyei. Ba sebarena matana i kanui murinai ba i borubai, ba i toirubai, “Kom kesana awaika ke kitakitai kona?”

²⁴Sebarena i gagawa ba i wona, “Eee! Pipiya a kinakinanisi saba nakasike bage keyama sita yewoyewo neubuwa.”

²⁵Iesu yarona i terei meyei sebare ku matana, ba matana i tamotatara ba i kinana kabitam wai sawara ereonowana i kinana.

²⁶Damanina ba Iesu i porai ana ku yove ba i wonei, “Kega kuna riu ku meyaga.”

²⁷Iesu ana nonorayauna yabata si nae ku Caesarea meyagisi, Philippi kupurinai ba keta dobonai i toirubaisi i wona, “Pipiya te wonawona yauku wai kotoi?”

²⁸Ba kosi si kaobeyei si wona, “Pipiya mutusi te wonawona kom John Babataito biyina, ba mutusi si wona Elijah, ba yebo mutusi te wonawona kom peroveta kesana.”

²⁹Ba ana nonorayauna i toirubaisi i wona, “Komi mekabage ko wonawona, yauku kotoi?” Ba Peter i kaobeyei, “Kom wai Keriso.”

³⁰Ba Iesu i kaotunetuneisi i wona, kega kesana kotoi kona wonei kata yauku kotoi.

³¹Damanina ba Iesu ana nonorayauna i dagui i bibeyebeyisi kata Sebare Natuna wose pesarisi ina paiwara. Ba Jew babadisi, priest kaiwabosi, giugiu biyisi sini sinikikiyei ba sina kasibunui ba kao tonu murinai ina bomsiri mena.

³²Nikona kurisi i sisiyana kabitamni ba Peter Iesu i taina sirei ku parina ba i dagui i kaorumatani, “Kega nikasike kuni sisiya.”

³³Saba Iesu i rusinimura ana nonorayauna i kinanisi ba Peter i kaorumatani i wona, “Satan ku muriku ke nae! Kom am nota kega God karinai te botubotu saba pipiya karisi yai.”

³⁴Damanina pipiya korotosi ba ana nonorayauna yabata i yorisi si botu kurina ba i wonisi, “Kom kotoi wata am waina kuni sununuriku wai ikesim ke kaotaveyim, ba am korosi ke kabari ba ki sununuriku.