SAN MARCOS 8:14-34

¹⁴Co chojni que vacao Jesús ndatjañehe na joicaoha na niottja para rrojine na. Co are ongá barco jeho nacoa niottja techonda na.

¹⁵Cottimeja Jesús coetonhe na co ndac̈ho: ―Ttjiho ra cuidado de ixin levaduré xifariseo, co levaduré Herodes.

¹⁶Co cain chojni que vacao Jesús ndache chó na: ―Jehe ndac̈ho jañá ixin ẍonhi niottja chonda na.

¹⁷Pero Jesús chonxin quehe ndache chó na co ndac̈ho ngain na: ―¿Quedonda tendac̈ho ra ixin ẍonhi niottja chonda ra? ¿Aẍa ttinxinha ra, ni ẍa noaha ra? ¿Achonda ra ansean ra anto cha?

¹⁸Masqui dicon ra co ttinhi ra, pero ẍa ttinxinha ra. ¿Ac̈hoha ẍaxaon ra de ixin tti naho niottja?

¹⁹Are janha váña tti naho niottja para joine tti naho mil xí, ¿quejanhi nttaẍa joinchecaon ra de tti xexin joine na? Cottimeja chojni que vacao Jesús ndac̈ho na: ―Tteyó nttaẍa.

²⁰Cottimeja ndac̈ho Jesús iná: ―Co are janha váña tti yáto niottja para joine tti nó mil chojni, ¿quejanhi nttaẍa joinchecaon ra de tti xexin joine na? Co chojni que vacao Jesús ndac̈ho na: ―Yáto nttaẍa.

²¹Cottimeja Jesús ndac̈ho ngain na: ―¿Aco ẍa ttinxinha ra ni ẍa noaha ra tti janha ndattjo ra?

²²Cottimeja joiji na ngain rajna Betsaida. Co canxion chojni nttiha joiaho na ngain Jesús ná xí que c̈hoha vaguicon. Co joinchetsenhe na ñao Jesús para rrocatte co rrojinchexingamehe.

²³Mexinxin Jesús tsehe rá xí mé co sajoicao para ngandehe rajna mé. Co nttiha Jesús cjoatjo nttatté ngain jmacon xa co vaquehe rá ngataha xa, co joanchianguihi xa si aonchao dicon xa.

²⁴Co jehe xa tsjehe xa co ndac̈ho xa: ―Dicon canxion xí satettji co xí yá inchin canxion nttá.

²⁵Cottimeja vaquehe rá Jesús ngain jmacon xa iná. Co rato mé jehe xa tsjehe xa jian co jmacon xa ndaxingamehe. Co xí mé onchao vicon cain cosa jian.

²⁶Cottimeja Jesús coetonhe xa para sacjoi xa nchiandoha xa, co ndache xa: ―Ttjiha ngagaha rajna co ẍonhi chojni ndache ixin quehe conha.

²⁷Cottimeja Jesús conixin chojni que vacao sacjoi na para ngain rajna que te ngain nonttehe Cesarea de Filipo. Co are tettji na ngatja nttiha Jesús joanchiangui ngain chojni que vacao co ndac̈ho: ―¿Quehe ndac̈ho chojni ixin quensen na janha?

²⁸Co jehe na ndac̈ho na: ―Canxion chojni ndac̈ho ixin jaha Juan, tti vancheguitte chojni, co icanxin na ndac̈ho na ixin jaha profeta Elías, co icanxin na ndac̈ho na ixin jaha iná de tti profeta que vacji are saho.

²⁹Cottimeja joanchiangui Jesús ngain chojni que vacao co ndac̈ho: ―Co jaha ra, ¿quehe ndac̈ho ra ixin quensen na janha? Cottimeja ndac̈ho Pedro ngain Jesús: ―Soixin tti Cristo. ―co Cristo rroc̈ho: tti Dios Coinchiehe.

³⁰Pero Jesús coetonhe na ixin ẍonhi chojni rrondache na jihi.

³¹Cottimeja Jesús coexinhi ndac̈ho ngain chojni que vacao ixin jehe, tti Xí que joixin de ngajni, chonda que anto tangui tsonhe. Co cain xittetonha ngain nihngo co cain xidána que ttetonha ngain icha xidána co cain ximaestroe ley anto rroningaconhe na. Co cain chojni mé nasoenxon na jehe pero nchanho ninxin jehe rroxechon.

³²Cain yá nao ndac̈ho Jesús. Cottimeja Pedro joantsjenda Jesús para joinchesattehe Jesús.

³³Pero Jesús ngaria co tsjehe ngain chojni que vacao, co joinchesattehe Pedro co ndac̈ho Jesús: ―¡Sattjixin de nganji na janha, Satanás! Jaha ẍaxaonha inchin ẍaxaon Dios, sino que jaha jeho ẍaxaon inchin ẍaxaon chojni.

³⁴Cottimeja Jesús nichjé chojni que vacao co icha chojni cai co ndac̈ho ngain na: ―Si c̈honja chojni rinao sacjinha na, pero chonda que rrotjañehe cain tti jeho jehe rinao co sacjinha masqui anto tangui tsonhe co hasta nasenxon.