Maka 8:11-38

¹¹Pa꞉tisi haliwekima꞉ Yesu pa꞉ta꞉ a꞉pa mineke pi laa ipika꞉ anke yololo alota꞉ Hepeni nane wele pita꞉la꞉eki ma꞉nda꞉ handomono pie lemekeme.

¹²Yesuma꞉ ipika꞉ pukima꞉ pomo tieke wotu homolo hata꞉ alota꞉ Ame do haleme wanda꞉halima꞉ ekipeke wele pita꞉la꞉eki ma꞉nda꞉ weitelemepe leekeme. Iki pa꞉ta꞉ ota꞉ pi alome. Ame do haleme wanda꞉halima꞉ wele pita꞉la꞉eki ma꞉nda꞉ na handilimikie leekeme.

¹³Kutupa mo haliweki mina꞉pa꞉laota꞉ kawasona꞉ pua pita mone tea꞉na꞉ peekeme.

¹⁴Yesuna꞉ disaipolo haliwekima꞉ palaowa hone yonka꞉lao na mea pemekeme. Koto ekina꞉ kawasona꞉ palaowa homekesiki wiekeme.

¹⁵Yesuma꞉ mana꞉ alo hata꞉ iki pa꞉ta꞉ alota꞉ Wotu hapa꞉peke. Pa꞉tisi haliwekina꞉ palaowa pombei yaasa꞉eki make Hetodina꞉ palaowa pombei yaasa꞉eki make wotu handa꞉pa꞉peke leekeme.

¹⁶Ika꞉ ika꞉ kone hone wia pipi lemekeme dupa. Nikita꞉ palaowa dia꞉ya꞉ka꞉ta꞉me lemekeme.

¹⁷Kutupa Yesuma꞉ ika꞉ hone wimikieki handaa iki pa꞉ta꞉ alota꞉ Ne dia꞉ ya꞉leketa꞉ pa ekipeke pipi alemepe. Ika꞉ hone na wiki a̱i̱ na handelemepe. Ika꞉ honemanu taka꞉laalemepe leekeme.

¹⁸Ika꞉ leke hala꞉pate na hando halemepe. Ika꞉ katake hala꞉pate na opu halemepe. Na niminaasemepe.

¹⁹Mo hande palaowa siki yunki hata꞉ 5 daoseni haliwekina꞉ pindi pindi peaowa꞉ pita꞉ma꞉ta꞉ putu pilikima꞉ta꞉ ala꞉ta tieke ekipu tumba mimipe leekeme. Ikana꞉ma꞉ ipiki pa꞉ta꞉ alota꞉ 12 lemekeme.

²⁰Kutupa Yesuma꞉ alota꞉ Mo hande palaowa siki watake hata꞉ mo 4 daoseni wanda꞉halina꞉ pindi pindi peaowa꞉ pita꞉ma꞉ta꞉ putu pilikima꞉ta꞉ ala꞉ta tieke ekipu tumba mimipe leekeme. Ikana꞉ma꞉ ipiki pa꞉ta꞉ alota꞉ Watake hata꞉e lemekeme.

²¹Kutupa ipikana꞉ma꞉ iki pa꞉ta꞉ alota꞉ A̱i̱ na handelemepe leekeme.

²²Ikana꞉ma꞉ Betesaida da opolo pemekeme. Mandane wanda꞉halima꞉ leke holupiki hali ma꞉nda꞉ Yesu pa꞉ta꞉ hatuku a꞉paata꞉ koto hali wataena꞉yeke Yesu pa꞉ta꞉ honke lemekeme.

²³Yesuma꞉ mo hande leke holupiki halina꞉ kiki minaata꞉ da mina꞉pa꞉lao mo pate leke hatuku peekeme. Hatuku pua ipika꞉ leke pa꞉ta꞉ dopi taata꞉ ipika꞉ kiki yaapoma꞉ mo halina꞉ lokena꞉ kiki tapopao lota꞉ pitolo hata꞉ alota꞉ Ala꞉ta꞉ ma꞉nda꞉ handelepe leekeme.

²⁴Mo halima꞉ handa꞉liao alota꞉ Haliweki handolopate pa ti leke ale pominelememe leekeme.

²⁵Kutupa Yesuma꞉ ipika꞉ kiki yaapoma꞉ mo halina꞉ leke yaapo paa wataeyeke mo halima꞉ wotu handaata꞉ ipika꞉ leke telipina꞉ pa epeekeme. Kutupa ala꞉ta꞉ ala꞉ta꞉ paeyao epeke tupa꞉ handeekeme.

²⁶Yesuma꞉ mo hali ipika꞉ da tapaaso hata꞉ alota꞉ Da teke nane a̱i̱ na pua꞉peke leekeme.

²⁷Kutupa Yesuma꞉ ipika꞉ disaipolo haliweki ame̱le̱ mo Sesatia Pilipai nane damanu pa꞉ta꞉ pemekeme. Pota꞉na꞉ pulu hata꞉ ipika꞉ disaipolo haliweki pa꞉ta꞉ lota꞉ piekeme dupa. I̱ta꞉ epiya꞉ka꞉ta꞉pe. Wanda꞉halima꞉ eki lo halemepe laa leekeme.

²⁸Kutupa ikana꞉ma꞉ ipiki pa꞉ta꞉ alota꞉ Bapitaisi peao hayeke hali Dionie. Mandane wanda꞉halima꞉ta꞉ Neketa꞉ Elaidiae. Mandane wanda꞉halima꞉ta꞉ Neketa꞉ potopede hali ma꞉nda꞉e lo halememe lemekeme.

²⁹Kutupa iki pa꞉ta꞉ paa lota꞉ piekeme dupa. Koto lo halemepate ikana꞉ma꞉ta꞉ I̱ta꞉ epi lo halemepe leekeme. Pidama꞉ ipika꞉ pi hombo peaaso alota꞉ Neketa꞉ Ketisoe leekeme.

³⁰Yesuma꞉ iki pa꞉ta꞉ hando alo hata꞉ alota꞉ I̱ pa꞉ta꞉ koto aleme pita꞉ wanda꞉hali ma꞉nda꞉ pa꞉ta꞉ na lapa꞉peke leekeme.

³¹Yesuma꞉ panake pi ma꞉nda꞉ ipika꞉ disaipolo haliweki pa꞉ta꞉ walolo hata꞉ alota꞉ Wanda꞉halina꞉ Eiyeketa꞉ tanda tanda tieke wotu milieke leekeme. Mo tondiki haliwekima꞉ make yeni peao haleme you haliwekima꞉ make wape pea wala꞉tiki pu haleme haliwekima꞉ make ipiki kiao limika꞉na꞉ta꞉ homilieke leekeme. Kutu pimika꞉na꞉ta꞉ hoto tepo wia paa tiaalieke leekeme.

³²Koto leeke ekita꞉ ota꞉ peneme waleekeme. Kutupa Pidama꞉ Yesu hosiki mopate leke hatuku mea pua ipiki pa꞉ta꞉ alota꞉ Kutupiki pi na lapeke leekepate

³³Yesuma꞉ la꞉ka꞉la ipika꞉ disaipolo haliweki handaata꞉ Pida hando alo hata꞉ alota꞉ Sadani neke pue. I̱ teke pa꞉ta꞉ na hapeke leekeme. Neketa꞉ Koda꞉ma꞉ ula꞉ hone tupa꞉ na wiki pa wanda꞉halima꞉ witeleme hone leke wilimee leekeme.

³⁴Yesuma꞉ pota꞉na꞉ titi yola pemeke wanda꞉hali make ipika꞉ disaipolo haliweki make ipiki pa꞉ta꞉ epena꞉yeke wi lemipi peaata꞉ iki pa꞉ta꞉ alota꞉ Ya hoki nane toluekema꞉ hone pa꞉la꞉ halima꞉ ipiki pa꞉ta꞉ kone hone ula꞉ ekimanu tunkulaata꞉ ipika꞉ a꞉ka꞉tei wapepiki ti mea tia ya hoki nane telina꞉e leekeme.

³⁵Kutu pa꞉la꞉ ekima꞉ hali epima꞉ ipika꞉ hao hala꞉eki miniki hao haluekema꞉ hone wia꞉ka꞉na꞉ta꞉ kota꞉ ipika꞉ hao hala꞉eki kone alupilieke leekeme. Kutu piliepate I̱ pa꞉ta꞉ make do handa꞉ Pi Seliapo pa꞉ta꞉ make hone witolo hata꞉ ipika꞉ hao hala꞉eki alupaasa꞉ halima꞉ ota꞉ da꞉taa halieke leekeme.

³⁶Hali epima꞉ do kenke ala꞉ta꞉ ala꞉ta꞉ paeyao ipika꞉eki wina꞉ laa alo hata꞉ ipika꞉ hao hala꞉eki alupia꞉ka꞉na꞉ta꞉ kota꞉ epeke ekita꞉ ekipa miliepe leekeme.

³⁷Koto somema꞉ ipika꞉ hao hala꞉eki paa muluekema꞉ alekema꞉ topo peaalia꞉pe.

³⁸Do hande Koda꞉ pa꞉ta꞉ hone na wiki ti teke yoko haleme wanda꞉hali ame̱le̱ hala꞉ hali ma꞉nda꞉ epima꞉ I̱ pa꞉ta꞉ tonka꞉na꞉ yaka pi alemanu pa꞉ta꞉ tonka꞉na꞉ hunkupuma꞉ homea꞉ka꞉na꞉ta꞉ kota꞉ koto hali pa꞉ta꞉ mo Wanda꞉halina꞉ Eiyekema꞉ hunkupuma꞉ homilieke. Ipika꞉ Atekena꞉ pa̱a̱ pa꞉la꞉eki tukiki pa꞉ta꞉ hao hande yakopiki enisolo tonu ame̱le̱ ipilia꞉ dina꞉ta꞉ kota꞉ koto hali handa꞉peketa꞉ hunkupuma꞉ homilieke.