San Marcos 8:11-38

¹¹Xi cafehe me ngajan ne, hacuaha cafehe cha tsëhë partidu fariseo. Hane cavetsihin cha cavisiajmi cha cojo Jesús ta meje cjuahachuva cha me. Cafehya cha cojo rë me xi tsingacun me ngu cjuarcun xi nduva ngahnga, cojo sa xi scuëë cha xi Nina catsingatju jain rë me.

¹²Ngajan xi Jesús ne, cojo cjuachohotacun ne, cachja me cojo cha cuitjin: ―‍¿Mé má cuatjin chjahyun xi sahme ngu cjuarcun xi nduva ngahnga? Cuichjá quixë cojo nuju ta hisca ngu xcusun vëhë ne, sahmee xi xcun cojo xcun.

¹³Ngajan xi caviyuju me cha xi cuacun jan ne, cavisehen me barcu cojo cha ladu rë me. Hane sehe cavuya quiji me ngunda vëhë tsëhë laguna.

¹⁴Peru cha ladu rë me ne, cachaya rë cha xi cjuaha cha pan, hane cahntsua barcu ne, ngu tutu sa pan jiya ndaja.

¹⁵Sehe ngajan xi chja Jesús cojo cha cuitjin: ―‍Nechun cuidadu cojo san rë pan tsëhë cha tsëhë partidu fariseo cojo cha ladu rë Herodes.

¹⁶Sehe ngajan xi cavisiajmicjín cha ngajñi rë cha cuitjin: ―‍¿Há tsëhë xi tsajin naja pan ne, há tsëhë vëhë xi cuatjin chja me?

¹⁷Xi camachaya rë Jesús xi veyanangui cha xi tsajin rë cha pan ne, cachja me cojo cha cuitjin: ―‍¿Mé má cuatjin nújun xi tsajin pan? ¿Há nuhyuun? ¿Há vijnii rcun? ¿Há jemu taja rcun?

¹⁸Tjin nuju túxcun hacuaha tjin tyjavañuju. ¿Mé má matsijin nuju? hacuaha ¿mé má nuhyuun? ¿Há vitsjiin nuju?

¹⁹Hya xi cavótoho langa hñú pan ngajñi rë xi hñú mil xuta, ¿há cjín chajne sa quitsë cachjayun tsëhë pan xi cavangui jan? ―‍Cuatjin cavinenguise me. Ngajan xi cafayangui cha ladu rë me ta: ―‍Tejó.

²⁰―‍Hane hya xi cavótoho langa yatu pan jan xi cajinë ñuju mil xuta, ¿ha cjín nisinya sa cavangui? Ngajan xi cha ladu rë me ne, cuitjin cachja nga cha: ―‍Yatu.

²¹Ngajan xi cavinenguise Jesús cojo cha cuitjin: ―‍¿Há cjëë camahani cuijne rcun cjua xi cachjá tsëhë san rë pan?

²²Hya xi camá ne, cavechu barcu tjehen laguna. Hane xi cavitujne me barcu ne, cafehe me nandya xi hmí Betsaida. Xi cafehe me ngajan ne, cafehe nga xuta cojo ngu cha xi rcá. Hane jercu cachja xuta jan cojo Jesús xi cuetahatsja me cha, hane sehe cumatsejen rë cha.

²³Hya xi camá ne, cafaha me tsja cha hane quijicojo me cha ngajan tjehen nandya. Xi cafehe me cojo cha ngajan ne, cavëhë natya me tuxcun cha hacuaha cavetahatsja me tuxcun cha, sehe cavinenguise me cha cuitjin: ―‍¿Há tsejen ri hitsë quihndë?

²⁴Xi catsiquijin cha xcun cha cavutsejen cha ne, chja cha ta: ―‍Vutsejen xuta. Peru sacuaha tsejen ya, cuatjin tsejen me xi cjui me.

²⁵Ngajan xi Jesús ne, cavetahatsja nga me tuxcun cha. Sehe casahmi cha ngujyë cavutsejen ndaja cha, hane camandaja cha, camatsejen ndaja rë cha. Hane sehe catsingatju me cha cafe cha ndava cha.

²⁶Hacuaha cachja me cojo cha cuitjin: ―‍Xi cavisiin ngajñi nandya xi cuinoje cojo xuta jan xcusun xi casahme cojo ri.

²⁷Hya xi camá ne, cavetju nga Jesús tsëhë ngajan cojo cha ladu rë me ne, quiji me ngujo nandya xi siu tahndee rë nandya xi hmí Cesarea Felipe. Hane ndiya jiya me cojo cha ne, cavinenguise me cha cuitjin: ―‍¿Mé chja xuta, yo ngahan? ―‍Cuatjin cachja me.

²⁸Ngajan xi cafayangui cha ladu rë me cuitjin: ―‍Ngujo me ne, chja me ta ngayun xi cha Juan ngayun, cha xi cavitenda rë xuta. Ngujo nga me ne, chja me ta Elías. Hane ngujo nga me ne, chja me ta ngu profeta xi suacuenda cjua rë Nina. ―‍Cuatjin cafayangui cha.

²⁹Ngajan xi cachja nga Jesús cojo cha ta: ―‍Hane ngayun ne, ¿mé nújun? ¿Yo ngahan? Ngajan xi cha Pedru ne, cuitjin cafayangui cha: ―‍Ngayun xi tjin cjua xi tsingatju nuju Nina. Ngayun xi Cristu.

³⁰Ngajan xi Jesús ne, cavitexa me cha ta tsajin yo xi cuichja cha cojo tsëhë.

³¹Hya xi camá ne, cavetsihin cavicuya me cha tsëhë xi ha ndasa xi Cristu, Quihndi rë Xuta Jain má me ne, peru jemu cjín cjuañihi cuatju me cumá ta tsingatiin xuta changá me, hacuaha tsiquehen xuta changá jan me, peru xi cjuë jyan nixtin ne, cuya nga me cjuahñu.

³²Cjua vëhë ne cachja quixi camahani me cojo cha. Ngajan xi cha Pedru ne, quijixin cha cojo Jesús. Sehe cavetsihin cachja cha cojo me xi ¿mé má cuatjin chja me?

³³Ngajan xi cavuya Jesús cavutsejen me hiscan siu cha ladu rë me. Sehe cachja me cojo cha Pedru cuitjin: ―‍Tihinxin ngaye Satanás, tsëhë xi ningatiintacuin ngaye sacuaha tsingatahacacun Nina ta, ningatehetacuin sacuaha ngu xuta.

³⁴Ngajan xi Jesús ne, cajindaya me xutacjín jan cojo cha ladu rë me xi cuinduva me hiscan tacun Jesús, sehe cachja me cuitjin: ―‍Sá xi tjin yo xi meje cuisehen ladu naha ne, meje rë xi nichuvun cjuatacun nuju, hane hacuaha tejñuhñu xahasen nuju xi cuanguncujun ndiya naha handasa xi cueyun xcun cru.

³⁵Yo ngayun xi mijí cuisuhun ladu naha tsëhë xi rcun xi cueyun ne, cahndë́ xi ndaja ne, nichujun xahasen nuju. Peru yo ngayun xi ngatsë naha o sá xi ngatsë rë cjua rë Nina cueyun ne, hacuiin nichujun xahasen nuju ta Nina ne, cuaxëtje me.

³⁶Mé ndaja cuma nuju xi sacu nuju yëjë xi tjin ngasunhndë, sá xi cueyun hane cuma nuju castigu,

³⁷ta sá xi cuaxintiin Nina xahasen nuju hya xi cueyun ne, ha quihndë tsajin rqui rë.

³⁸Yo ngayun xi ma sava nuju ngatsë naha o sá xi ngatsë rë cjua naha nguehe xcun xuta tsehen xi manguaaincacun cojo cjua rë Nina ne, hacuaha cojo ngahan xi canduvá tsëhë Nina ne, cuma sava ná ngahan ngatsë nuju ngayun, hya xi cuinduvá cojo cjuandajyihi tsëhë nahmi naha ne, hacuaha cojo ángel xi vejña tsëhë Nina cuinduvá cojo.