Marcos 8:11-38

¹¹Tsa mzin re fariseo ne mndelo zha mbyodiz zha kon Jesús, tak nlaaz zha ne zha naa chu wli kuu ni Jesús. Tsa nzhab re zha lo Jesús: ―Tsow thib kwaa kuu beeta Diox tak tsow, tsa ne nee lee Diox mtaala.

¹²Jesús mndii leettsoo ne nzhab: ―¿Chebee naab re men ree thib seny kuu gagt tsow re men? Wlipaa na kuu nin lo goo, neeka thib kuu thoz tsowtʼn lo re men nal tyemp ree.

¹³Tsa mlaa Jesús re men, ne mre Jesús mndaab leen kano ne ndya re zha tedib lad roo nitdoo.

¹⁴Ne mtelaazt re zha kuu ngeteed lo Jesús gagwe zha kuu wu zha, thibka zha ne tsaka pan.

¹⁵Ne leettsa nda re zha leen kano, tsa nzhab Jesús lo re zha: ―Bkenap goo goo lo lebadur chaan re fariseo ne lo lebadur chaan rey Herodes.

¹⁶Ora lee re zha mndelo nzhab lo altaa: ―Tbaa ne zha, tak mtelaaztaa gagweʼaa pan.

¹⁷Jesús myeen kuu ngetediz re zha, tsa mnaabdiz Jesús lo re zha, ne nzhab Jesús: ―¿Chebee mbez goo napt goo pan? ¿Chu bee ter yen gooy? ¿Chu thitanax mkow yek goo par yen gooy?

¹⁸¿Nap goo ngutlo goo ne nyenite lo goo, nap goo nza goo ne nzhont gooy? ¿Chu thitanax ntelaazt goo?

¹⁹Leettsa mtsow rolʼn pan ndow thib gaay mil mbyi, ¿plal chekwite mrozhoob? ―Tsiibchope ―nzhab re zha.

²⁰―Ne leettsa mtsow rolʼn pan ndow thib thap mil mbyi, ¿plal chekwite mrozhoob? ―Gaze ―nzhab re zha.

²¹Tsa nzhab Jesús: ―¿Chu terka yen gooy?

²²Leettsa mzin re zha yez kuu le Betsaida, tsa lee thiban zha ndyaadno thib mbyi syeg lo Jesús, ne nzhab re zha lo Jesús: ―Tsow yalwen bxoob yaaʼa dits mbyi ree, tsa gwe mbyi.

²³Tsa mzhen Jesús yaa syeg ne mloo Jesús zha thib lad roo yez, ne mtenit Jesús lo zha kon nzuk, ne mxoob Jesús yaa Jesús yek zha, oraaka mnaabdiz Jesús lo zha, ne nzhab Jesús: ―¿Chu nyeniʼa loʼa?

²⁴Lee syeg mndelo mwii ne nzhab: ―Nloo re zha lon, taxal ya nloo zha.

²⁵Tsa mre Jesús mdiinn ngutlo syeg, ¡ora lee syeg mwii, tak mgweʼa ngutlo zha ne reta kuu mloo lo zha!

²⁶Tsa mtaal Jesús zha liz zha, ne nzhab Jesús lo zha: ―Ridta leen yez.

²⁷Leettsa lee Jesús ne re zha kuu ngeteed lo Jesús, ngwa re ranch chaan yezlyu kuu le Cesarea-Filipo. Ne or ndo re zha net, tsa mnaabdiz Jesús lo re zha kuu ngeteed lo Jesús, ne nzhab Jesús: ―¿Cho nakʼn ni re men?

²⁸Lee re zha nzhab: ―Thib net zha mbez lee lu nak Juan kuu mtsowleyy, tedib net zha mbez lee lu nak profet Lí zha ndala, ne lee tedib net zha ni lee lu nak thib re profet.

²⁹―Lee re goo, ¿cho nakʼn ndak goo? Pey mkab ne nzhab: ―Lu nak Crist Kuu Mtaal Diox Nabee.

³⁰Per lee Jesús mnabee lo re zha ne nzhab: ―Neeka thib lo zha gabt goo koree.

³¹Jesús mndelo mloo lo re zha kuu ngeteed lo Jesús, ne nzhab Jesús lo re zha: ―Na nak xgann mbyi, Kuu Mzin Ngok Men, ne ndoblo ridʼn yalti, ne neeka kayaat re zha gol na neeka re ngwleyy kuu nabee lo re ngwleyy, neeka re maestr chaan ley. Ne kuth re zha na, per leettsa tsaal tson wiz lee na roban.

³²Nambi nzhab Jesús koree. Tsa mloo Pey Jesús thib lad, ne mndelo mkox Jesús lo Pey.

³³Per lee Jesús mtsere lo mwii lo re zha kuu ngeteed lo Jesús, ne mkox Pey lo Jesús ne nzhab Jesús: ―¡Beche lon, lu nak taxal Maxuuy! Ntsowta xgab taxal ntsow Diox xgab; lu ntsow xgab taxal ntsow re men xgab.

³⁴Tsa mrez Jesús re zha kuu ngeteed lo Jesús ne re men, ne nzhab Jesús: ―Os lee thib goo nlaaz teke ditsʼn, ndoblo laa goo reta kuu nap goo, ne reta kuu nzo yek goo tsow goo, ne ndoblo thib ko goo leettsoo goo gath goo, tak nyelaaz goo na.

³⁵Os lee thib zha nzeb zha gath zha, tak nyelaaz zha na, tsowt zhaʼa gan yalnaban kuu thitanax. Per lee zha kuu nzebt gath, tak nyelaaz zha na, zhaʼa tetsow gan yalnaban kuu thitanax.

³⁶Per kwan tsow zha gan keno zha reta kwaa nzo yezlyu ree, ne tsowt zha gan yalnaban yibaa.

³⁷Neeka thib kwaa gagt taa zha lo Diox, par tsow zha gan yalnaban kuu thitanax yibaa.

³⁸Os lee thib zha nthoy zha ne zha na ne xkizʼn xid re men tyemp ree, re men kuu thitanax mlaa Diox ne thitanax went nak, noga na Kuu Mzin Ngok Men, tethoyʼn nen zhaʼa, leettsa bretabʼn kon xni chaan Xutʼn ne kon re mandad Xutʼn kuu nayon.