San Marcos 8:11-38

¹¹Ijkuakó n fariseos owalajkeh inawak Jesús iwa opé motlatlajtolkopah íwa. Yejwah okitlajtlaniliayah makinnextili se milagro de ilwikak san para kiyejyekoskeh.

¹²Jesús oelsijsiwik iwa okinmili: —¿Tleka nonkitlajtlanih se milagro? De milajka nomechilia nomejwah mach nonkitaskeh nion se milagro de ilwikak.

¹³Ijkuakó okinkakajte iwa oksepa otlejkok itech barka, iwa opanok ik nepa lado de n lago de Galilea.

¹⁴Itlamachtijkawah n Jesús okilkajkeh kiwikaskeh n tlákuali itech barka iwa sanwel okiwikayah se paj.

¹⁵Ijkuakó Jesús okinmili: —Ximotlachilikah de inlevadura n fariseos iwa de ilevadura n Herodes.

¹⁶Itlamachtijkawah n Jesús opé kimoliah: —Ijkí techilia porke amo otikwalikakeh paj.

¹⁷Pero Jesús okima tlan okimoliayah iwa okinmili: —¿Tleka non kimoliah amo ononkualikakeh nomopáj? ¿Amo nonkitah nion nonkajsikamatih? ¿Ok nonyoltlakuawatokeh?

¹⁸¿Nonkimpiah nonmoixtololowah iwa nomonakaswah, iwa amo nontlachiah nion nontlakakih? ¿Ayakmó nonkilnamikih?

¹⁹Xikilnamikikah ijkuak onikintlakualti mákuili mil tlakah san ika mákuili paj, ¿kechmeh chikimeh ononkoololojkeh ika pantlapanalteh? Yejwah okinankilijkeh: —Májtlaktli iwa ome chikimeh.

²⁰—Iwa ijkuak onikintlakualti nawi mil tlakah san ika chikome paj, ¿kech chikimeh ononkoololojkeh ika pantlapanalteh? Yejwah okijtojkeh: —Chikome.

²¹Jesús oksepa okinmili: —¿Tleka kiné ayamó nonkajsikamatih?

²²Satepa okalakitoh Betsaida, ompa okualikilijkeh n Jesús se tlakatl non amo otlachiaya iwa okitlatlautijkeh ipan makintlalili imawah.

²³Jesús okimatílanki n kókoxki iwa okikixti de altepetl. Ika ichijcha okinsiawili ixtololowah iwa okintlali imawah ipa, iwa okitlajtlani kox itla okitaya.

²⁴Ye opé tlachia, iwa okijto: —Nikinmita tlakah kemi yaskiah miskimeh, pero nejnentiwih.

²⁵Jesús oksepa okintlalili imawah ipan ixtololowah iwa okili matlatlachia, san nima n tlakatl oyektláchixki iwa opajtik. Iwa nochi kuali yokitaya.

²⁶Ijkuakó Jesús okitítlanki icha iwa okili: —Amo xikalaki kan altepetl, nion aka xikmatilti.

²⁷Satepa Jesús iwa itlamachtijkawah oyajkeh kan altepemeh de Cesarea itech tlali de Filipo. Iwa ijkuak oyayah itech ojtli okintlajtlani: —¿Akin Ne, kimoliah n tlakah?

²⁸Yejwah otlanankilijkeh: —Sikimeh kijtoah Tejwatsi ti Juan Bautista, oksikimeh kijtoah Tejwatsi ti Elías noso ok se profeta.

²⁹Ijkuakó Jesús okintlajtlani: —Iwa nomejwah tlan nonkijtoah, ¿Akin Ne? Pedro okili: —Tejwatsi Ti Cristo.

³⁰Pero Jesús okinnawati: —Amaka xikmatiltikah.

³¹Ijkuakó Jesús opé kinmachtia: —Ne Non onimochi ni tlakatl nitlaijyowis miak iwa nechixnamikiskeh n tetajmeh non tlayakantokeh kan tiopa, iwa n tiopixkeh non tlayakantokeh iwa non kitemachtiah n tlanawatílistli nechmiktiskeh, pero ipan eyi tonati nimoyolitis.

³²Jesús ijkó okinmili para makajsikamatikah. Ijkuakó Pedro okiwík ixkoya n Jesús iwa opé kajwa.

³³Pero Jesús omókopki iwa okintlajtlatak itlamachtijkawah, opé kajwa n Pedro iwa okili: —¡Xio de nika, satanás!, porke amo mitstekipachoa tlan Dios kimonekiltia, yej tlan kintekipachoa n tlakah.

³⁴Ijkuakó Jesús okínnotski n tlakah iwa itlamachtijkawah iwa okinmili: —Tla aka kinekis yetos notlamachtijkau, ayakmó makichiwa san tlan ye kineki, yej mawiki nonawak maya makimiktikah por nechtlakita.

³⁵Yika, akin kinekis mopalewis san ye inewia moixpolos. Pero akin kimiktiah por nechtlakita iwa por kitetlapowia itlajtol Dios, Ye kimakixtis.

³⁶Porke ¿tlan ipati tla se tlakatl kitlani nochi tlan onka itech nin tlaltíkpaktli iwa kixpoloa ialma?

³⁷¿Kech weletis kitlaxtlawas se tlakatl para makimakixti ialma?

³⁸Yika, akin pinawa de Ne iwa de notlajtol inmixpa ninteh tlakah tlajtlakolchijkeh iwa mekatánajteh, noiwa Ne Non onimochi ni tlakatl nipinawas de ye ijkuak niwalmuikas itech iweyijkachiwalis Notajtsi iwa iangelwah.