Mareko 8:11-38

¹¹Farisea azaḡaniꞌa onairo, ebu Iesu teite ḡoere hina naenaetitiro. Iesu soꞌonoga rae, Iesuꞌa, Badiꞌa gigiꞌa hina haḡai nu badeḡa* haḡaoga uratiro.

¹²Iesu ani hereꞌenaꞌa, zamaḡaniꞌa adudaro, ebu ꞌahige reiro. 'Nougadu ꞌahi azaḡaꞌe haḡai nu badeḡa urateꞌohe? E hubehune zae ziꞌohe. ꞌAhi duḡuru veize haḡai nu badeḡaꞌe mene haḡaiꞌuma.'

¹³Ebu aniꞌa muhiziro. Bare ḡasio ehoradu, duꞌura mone afa fare onamiro.

¹⁴Iesu tahiꞌaꞌe |iberedi|r mouga aḡutaro ꞌahine, zeꞌe tiba daꞌo ḡasio ufi odohiro.

¹⁵Iesuꞌa iraduguzenaꞌa ꞌahige reiro. 'Faine ḡianoꞌi! Heroda zu Farisea azaḡa |iisiti|r ḡianoꞌi!'

¹⁶Zeꞌa ḡoꞌaneꞌenaꞌa, “Emeꞌa iberedi mene odoheha ꞌahine, ꞌouge raꞌohe.”

¹⁷Iesuꞌa ze nagini ḡoꞌanirotaꞌaꞌe ederirotene, ziro, raenaꞌa, “Nougadu beredi nu mene odohateꞌeanoꞌo ḡoꞌaneꞌohe? Zaꞌe ize mene ederehehe ga mene zamarehehe? Zamaze uzaboḡahehe?'

¹⁸Ubumazeta, rehano mene ehamuꞌehehe? Teḡazeta, rehano mene igiꞌehehe? Za mene zamareꞌehehe,

¹⁹eḡeꞌa vaze daha fuꞌo (5000) veize, |iberedi|r fuꞌo (5) vahegirotaꞌaꞌe? |iBeredi|r ḡahaꞌa ḡahaꞌaꞌe tunahu nugu irivaꞌoniro?' Zeḡeꞌa ninaꞌa, 'Gaubanana aheu fare (12)' reiro.

²⁰Iesuꞌa zinaꞌa, 'Ebu vaze daha ḡazaḡa (4000) veize, |iberedi|r fuꞌo tu aheu fare (7) vahegirotene, |iberedi|r ḡahaꞌa ḡahaꞌaꞌe tunahu nugu irivaꞌoniro?' Zeḡeꞌa naenaeniꞌenaꞌa, 'Fuꞌo tu aheu fare (7)' reiro.

²¹'Za ize mene zamareꞌehehe?' Iesuꞌa ꞌouge rae ḡadiziro.

²²Iesuꞌa tahiꞌaḡa teite Betesaida neḡano feuriro. Feurirotene, vaze nuꞌa vaze ubumaḡa kuruḡa, Iesu vaḡe abine onairo. Ebu ubumaḡa obonoga rae, umidiro.

²³Iesuꞌa vaze ubumaḡa kuruḡa evoꞌano abinadu, ne huni enoga tutune onamiro. Ebu vaze ubumaḡano soꞌabidadu, evoꞌa ubumaḡa ranatiro. Iesuꞌa ḡadiniro. 'Ḡa ḡau nu horoneꞌehehe?'

²⁴Vaze ubumaḡa kuruḡaniꞌa, dude ehamanadu, ꞌahige naenaeniro. 'Vaze horozeꞌe rehano, ire teige edau ragaveꞌohe.'

²⁵Ebuni Iesuꞌa evoꞌa bare ubumaḡa ranatirotene, vaze ubumaḡa kuruḡa riḡa ehamaro, ebuni ubumaḡa manoriro. Ḡau niduꞌa faine horoniro.

²⁶Iesuꞌa ane ne tuḡune onameꞌenaꞌa, ꞌahige reiro. 'Betesaida neḡa ize ago diuḡoꞌi!'

²⁷Ebu Iesuꞌa tahiꞌaḡa teite Kaisaria Filipi habaꞌa neḡa neḡa onamiro. Onamiroteꞌe zamaḡano, Iesuꞌa tahiꞌaḡa ḡadiziro. ꞌAhige reiro. 'Vaze vazeꞌa raenaꞌa, eꞌe iniu rae raꞌohe?'

²⁸Ebu zeḡeꞌa niro. 'Vaze nu ꞌane, ḡaꞌe Ioane Babatiso rae raꞌohe. Nuꞌe raenaꞌa, Elia* rae raꞌohe, ebu vaze nuꞌe raenaꞌa, peroveta vazeḡa ꞌahoga rae raꞌohe.'

²⁹Aneꞌa ḡadiziro, raenaꞌa, 'Zaꞌa raꞌetene, eꞌe iniu?' Peteroꞌa raenaꞌa, 'Ḡaꞌe Keriso.' reiro.

³⁰Iesuꞌa iraduguziro. 'Peteroꞌa izidi raꞌetaꞌaꞌe, vaze ꞌahoga ꞌahoga ago zoꞌi!'

³¹Ebu Iesuꞌa ḡadahe ihoziro, raenaꞌa, 'Eḡe, Vaze Ubuga*niꞌa aduga ḡehaḡa hidiꞌuma. Ebu vaze boro boro, zuni Badiꞌa ḡahunohauꞌeteꞌe neḡa zuhiꞌaḡa boro boro, ebu Mose goro ḡoeꞌa ihozeꞌeteꞌe azaḡaniꞌa heꞌeheꞌehiꞌuma, ebu uḡuhiꞌuma. Ebuni mada uḡidu zamaḡano bare ḡabode iḡuniꞌuma.'

³²Aniꞌa ḡoere ꞌadi doḡoꞌani rae fureniro. Ebu Peteroꞌa Iesu ane genaḡano mae niro, ebu 'Ḡaꞌe ago ꞌouge roꞌi!' rae roniro.

³³Ronirotene, Iesuꞌa tehadu, ane tahiꞌa tahiꞌa ḡiazeꞌenaꞌa, Petero taꞌiroharo. ꞌAhige reiro. 'Eḡe mazaonoꞌo vaḡinoꞌi! Satani! Ḡaꞌa zamareꞌetaꞌaꞌe, Badiꞌa ibio mene zamareꞌohe, rehano vaze ibio zamareꞌohe.'

³⁴Ebuni aniꞌa vaze ḡuḡuvaḡa zuni ane tahiꞌa huziro. Ebu ꞌahige rae ziro. 'Iniuꞌa eḡe ḡarunio hegotiꞌuma roꞌidene, ane edeḡa haḡaiḡa modoꞌi, ebuni ane satauro* heratadu, eḡe ḡarunio hegotoꞌi!

³⁵Mazaḡa ahiri moneo daꞌo zamareꞌeteꞌe vazeḡaniꞌe, ḡaboneḡa sausauniꞌuma. Eḡe veize zuni Badiꞌa hari manoḡa veize, ahiri moneo mene zamareꞌeteꞌe vazeḡaꞌe, ḡabone manoḡa hidiꞌuma.

³⁶Vaze ꞌahoganiꞌa haba niduꞌa uꞌano, ḡaboneḡa modine, nagini manoḡa hidiꞌuma?

³⁷Aneꞌa ane ḡabone mouga veize, nagini hina eꞌe naeḡa haḡaiꞌuma?

³⁸Izidiꞌe vazeꞌa Badiꞌa mazao mene fieꞌohe, ebu haḡai sauꞌa haḡaeꞌohe. Vazeꞌa eḡe uꞌano zuni eḡe ḡoere uꞌano mazagaronine, eḡe, Vaze Ubuga zuni ani uꞌano mazagarohiꞌuma. Eꞌe madaḡano, eḡe Mama agaḡa manoḡa* zamaḡano, tuḡure viga zaḡoḡa zaḡoḡa teite eḡeꞌa ovaiꞌuma.