Mak 8:11-38

¹¹Foron Farasi ri ka tapiek ke ri ka tipes fapue tura Iesu. Ri ier isi tof u, ke ri ka fas u isi in fatapiek ti fakileng tinbae na kukulii.

¹²Iesu ka mangeh, ma ka tara aragii, “Sanih e wara ae ulul na fanu igii ri ka fas iau isi ian fatapiek ti fakileng? Tekentu kanaka ia fas gam, biil tom ian fatapiek ti fakileng usuf gam.”

¹³Ke ka la koseng ri, ka wof fis na mon, ma ka sopaket dan kawil una nenge buli.

¹⁴Berberat na fafausum kia ri ruruu le rin kep ti fal e beret, isau le ri kep i tikii tutus sau e beret tura ri na mon.

¹⁵Ke Iesu ka fanau ri aragii, “Gamen tumarang isi is ken foron Farasi turan is ke Erot.”

¹⁶Ri ongen u arae, ke ri ka ngurke fafis kamtinan orek ae na fotpoto ri tom, aragii, “I use u arae, wara le biil ti beret arer.”

¹⁷Iesu ka usum tah na sanih ri ngurke u, pesu ka diik ri aragii, “Isi sanih gam ka tara le biil ti beret? Arafah, biil biitom gam iliim u, ke biil biitom gam malal lo? Balmi i kubunor biitom?

¹⁸Imel e matmi, isau le biil ifasih gamen par ini. Ke imel e balbalu gam, isau le biil ifasih gamen wong ini. Gam wol pes u,

¹⁹aunbiing ia sibik ta ilim e beret usuf ilim e arip e fanu. Ifis e kes gam fafuun u ini foron tigan beret ae fanu ri mas tiga?” Ri ka kiliis u aragii, “Sangful ini u.”

²⁰Ke ka diik ri sabin aragii, “Ke aunbiing ia sibik ta ifit e beret usuf ifet e arip e fanu, ifis e kes gam fafuun u ini foron tigan beret ae fanu ri mas tiga?” Ma ri ka kiliis u aragii, “Ifit.”

²¹Ke ka diik ri aragii, “Arafah, biil biitom gam malal?”

²²Iesu turan berberat na fafausum kia ri ka tapiek na Betsaida, ke fal e fanu ri ka tangne nenge kut usuf i, ma ri ka sising u isi in sigil iun mata.

²³Ka pose na liman kut ae, ke ka tangne ufu tina maleh ae. Aunbiing ka ubis ta matan kaltu ae, ke ka luun iun lima na iun mata, ke ka diik u aragii, “O ka par ti tier?”

²⁴Ke kaltu ae ka sake paklu, ke tarah, “Ia par fanu. Isau le ri par arae foron au ri la.”

²⁵Ke Iesu ka luun iun lima sabin na iun mata kut ae, ke ru ka sapeng fis, ke ka par fakasi foron tier tikii.

²⁶Iesu ka wuun ufu una fel kia, ke ka fas u aragii, “Gong o soleng maleh ae.”

²⁷Ke Iesu turan berberat na fafausum kia ri ka la una foron maleh fatat isi Sisaria Filipai. Aunbiing ri toltole sal la, ka diik ri aragii, “Fanu ri tara le iau e seh?”

²⁸Ke ri ka kiliis u aragii, “Fal e fanu ri tara le wo e Jon Tom tel Bapitaiso, fal ri tara le wo Elaisa, ke fal ri ka tara le wo neng lon foron poropet.”

²⁹Ke ka diik ri sabin aragii, “Arafah lo gam, gam tara le iau e seh?” Ke Pita ka kiliis u aragii, “O e Mesaia.”

³⁰Ke ka tikale ri le gong ri fas tikas ini le i e seh.

³¹Ke namih Iesu ka tanwaran fausum berberat na fafausum kia aragii, “Kalalik ken Kaltu in kalsakai in fuun e tatawin, ke foron famfamu, foron laulaumet na pris ke foron tom fafausum ini nagogon rin ta pokta ri usuf i. Rin siimete u, isau le nami na in tuul e biing in aptih fis sabin.”

³²I famalal fakasi tom e orek kia, pesu Pita ka lame ufu koseng ri ma ka tikale u le gong i orek arae.

³³Iesu ka giliim ke ka par berberat na fafausum kia, ke ka fakiing Pita aragii, “Satan! Fin koseng iau! Wara le biil o mi na wolwol ke God, biil. O mi sau na wolwol ken fanu.”

³⁴Ke Iesu ka tawi turim gur na fanu ae turan berberat na fafausum kia usuf i, ke ka fas ri aragii, “Male tikas i ier le in mih lo iau, in fapuh u tom, ma ik kusep aupaket kia, isi ik mi lo iau.

³⁵Wara le seh i gong kale liu kia, ke in mangmangal koseng u, isau le seh i sok ufu liu kia i wara lo iau ke Rokap na Fafas, in liu.

³⁶Male tikas i kep tikii foron tier tina piklinbat, isau le ka falaulau tanwa, in farokap u arafah?

³⁷Ke in ta sanih una fiil kiliis tanwa?

³⁸Fanu na ulul igii, ri liu na palgan sinang laulau ma liu kiri i tapak koseng God. Male tikas lo ri i matlawen lo iau ke na foron orek kiak, Kalalik ken Kaltu sabin in matlawen lo, aunbiing in tapiek ini memeh ke Tama turan foron kalkaluu na angelo.”