Mak 5:9-27

⁹Eme Jises ndremenyani iy, “Nyaram are lau?” Eme iy anya, “Nyarak badeh, Solo-an, tasah aso nyaran bwe!”

¹⁰Eme ya iy asehek sahou ta tikisiy i ta Jises i buku doh, “Ou satikahei aso sa-au ta kon dah.”

¹¹Eme ya bou rakou buruwen aimon nyamon an ka-u mandrei.

¹²Eme malawin ndra-in tiye sahou tikisiy i ta Jises anya, “Ou tikahei aso ka bwele-e bou.”

¹³Eme Jises tiye i toro, “Abo, ado ka-au.” Eme malawin ndra-in nane dah ame len ma a bwele-e bou. Ya kane oro bou doh, i buku none luwa (2,000), eme oro sakaliye are bwele-e mandrei ame andri ala bolo gwa li, ma oro amak.

¹⁴Eme ma lau ta atondrok iri bou doh atobwak au a kon tinan ma hawe a lokei asehek i tiri lau. Eme ma iri lau ame anyolom.

¹⁵Iri ame hawe Jises ma iri anyolom ndramak nane malawin ndra-in mene udu la-un nane dah manyah udu andri ai. Iy ndratani kolau ma budon tan ndramwenen ja ai. Eme ma iri anoh.

¹⁶Ya oro lau nane anyolom dah, ala asehek nyala iri ta ndramak mene, malawin ndra-in udu la-un badeh, ndramwenen ja, ma hawe bou.

¹⁷Eme iri tiye Jises ta iy ki-iu ki rasi ja ta loboho doh.

¹⁸Suniya Jises anya ki-iu kili bolo ndron, ya ndramak nane malawin ndra-in udu bwele-en eme tiye sahou tikisiy i ta Jises, ta iy anya ki hawen.

¹⁹Arile Jises bwalen, eme iy tiye i tan, “Ou a kon hawe lowam oro, ya ou asehek nyala oro ta lahou tinan Laban ndramesekei ndrawek tam, ma iy tikisi ou, ma iy mesekei ou ndramwenen ja.”

²⁰Ya eme ndramak nane dah, iu ili bolo kon ma ronoh udu loboho Dekapolis asehek ta nyala lahou tinan mene, Jises ndramesekei i tan, ya eme iri lau marakon lomondra solo-an.

²¹Eme Jises i ndron ja iu i kapa gwa bilisiu, eme ya lau solo-an labai, atukum ame le kapa gwa hawen.

²²Eme ndramak ari ta atondrok asiu ta atukum tiri Juwis nyaran Jairus, iy atou Jises ma iy eme taku in katin.

²³Eme Jairus tiye sahou tikisiy i tan i buku doh, “Naduk badih badeh, mirihik ta anya kimek ai, ou ame atehei minem ki tan ya iy kamak ja.”

²⁴Eme Jises i hawen, ma hawe iri lau solo-an an hamon tan ala ale, ma awudi iy udu le alih.

²⁵Eme ya badih ari udu aliy, sik ndra udu tan winiya jaha ma ronoh la-uh.

²⁶Iy ndrakahei luk sabe kolek ndra tiri lau ta anyumor ma amekes iy kamwenen, arile bwe, sik tan bamwenen se bwai. Ya iy akohok sisi-in kahis le, ma sik ja asahan boto-on le gwek.

²⁷Iy ndranuhun nyala Jises bwena, eme iy sokohani iy i ndrokowa iri lau ili in hamon tan, eme iy tawi kiri awin ta Jises,