Markus 5:9-27

⁹Ayteke nikwe ig Kiyapwiye Jesus ayapri: ―Mmah piw? Igme kaytwa giwn: ―Nuwhu “Pibohram”. Mmanawa usuh wapityempu kaayhsima ay gipit.

¹⁰Ayteke ig amnihswa ta git Kiyapwiye Jesus akiw. Ig awna ta git: ―Ka ba arewepma wothu awahkiswima usuh piyawakad ariwntak inin iwetrit.

¹¹Ayge pahabunene pakirempu axwenekis apit pahá waxri imuwadnene.

¹²Igkis wapityempu hiyapni henne, igkis ayá git Kiyapwiye Jesus: ―Uyá awahkis usuh tahhan gipititkis pakirempu. Isaksanaba usuh parak ta gipititkis.

¹³Igme Kiyapwiye Jesus isakseprikis. Ayteke nikwe nerras wapityempu mbeyepye igkis pesbetwikis gipititak ner awayg. Igkis pareke ta gipititkis ignes pakirempu. Nerras pibohramnene pakir igkis piyana mil (2.000) gikebyikis. Igkisme wapityempu parekwigkis, igkisme pakirempu sigisbetwikis ta asebrikute. Igkis tubohbetwikis ta ahakwate mahakwa. Ayge igkis aniksewbet ahakwa mahakwa.

¹⁴Pakirempu gikapriwtenkis igkis hiyapni henne, igkis sigisbet kibentenwa ta paytwempuit. Igkis danuh atere, igkis kinetihwa nimin muwwapu paytwempuriw muwwapu iwetrit aranwa paytwempu. Nerras hiyeg paytwempuyenepwi timapni henne, igkis tipik atere adahan igkis hiyepnes ku pariye danuh.

¹⁵Igkis danuh atere git Kiyapwiye Jesus, igkis uté ner awayg ku pariye kuwisnene makniw ariw wapityempu. Igme bat ayge. Ig kasimsapu kuri. Gihiyakemni diyuh adukwenewa akiw.

¹⁶Igkis hiyapni henne, igkis apisasew. Nerras ku pariye hiyepnepwi madikte ku pariye kehka gikak ner awayg igkis kinetihwa ta gitkis nerras hiyeg amin madikte ku pariye danuh ta git ner awayg gikakkis nerras pakirempu.

¹⁷Igkis timapni henne, igkis awna git Kiyapwiye Jesus: ―Su tipik aytekihan apititak uwaxri.

¹⁸Igme katapte amadgat gihmun. Igme ner awayg ku pariye kuwisnene makniw ariw wapityempu, ig awna ta git: ―Nah ataka pihapti.

¹⁹Igme Kiyapwiye Jesus awna git: ―Pi kabayte pis msakwa ay. Su ataknate ta pipinwat ta gitkis pikebyupwi. Kinetihwanaba gitkis amin madikte ku samah Uhokri keh pikak ku samah ig amnihpep.

²⁰Igme awayg timapni henne, ig tipik ta apitit paytwempu Dekápolis. Ig danuh atere ig kapusa kinetihwa ta gitkis madikte hiyeg aygnenepwi amin ku samah Kiyapwiye Jesus keh gikak. Igkisme wakaymnibdi kaayhsima.

²¹Igme Kiyapwiye Jesus manuke pahambakat mahakwa akiw amadga umuh. Ig danuh atere, ig utí kaayhsima hiyeg pahadgupu adahan igkis patiptakig ayge akigbimna mahakwa.

²²Ayteke pahapwi awayg danuh atere git Kiyapwiye Jesus. Giw Jayru. Ig leglis akipara, judeyenepwi gileglisalis. Ig hiyapri, ig paberetusaw ta gikimpuit.

²³Ig awna git: ―Kiyapwiye, uyá amnihun. Nukamkayh mihenapyo pahayempi guyekwin. Ba ayta sarayh piwak ta gupitit kahadbe eg makniw eg ka miyó.

²⁴Ig Kiyapwiye Jesus timapni henne, ig tipik gihapti. Kaayhsima hiyeg tipik gihapti. Ig waywe dahebdi gikakkis.

²⁵Ayge nikwe pahapu tino danuh gihapu butte. Eg kuwis hiyá mbeyne akak guminewkan adahan kaayhsima kamukri, madikawkubu akebyi akak pikana arawna (12).

²⁶Eg hiyá mbeyne ay giwakukis kaayhsima mekseh kuwis. Eg sarayhe gukakura madikte adahan gikatiwnihpitnikis. Henneme eg kote makniwte. Guwskawni pi mbayte ariw pitatye.

²⁷Eg kinetni Kiyapwiye Jesus gak. Nikwe eg danuh atere giharaptak gibetimpikis nerras hiyeg, adahan eg dax gisimsa.