Maga 5:9-27

⁹Yesuea ema nabahalea, Dïe ëida nowëla nabi. Ea säla obëgësalea, Nïe ëida yafie, amai nilïda maleimelëla säi.

¹⁰Amala sälahilä ea Yesuma gelolafalï sähalea, Segeweda dïgïla mosalola sämabiola säi.

¹¹Amo gaalu, sugua yafie gau domala moosa nefolalo.

¹²Mugabe amolia Yesuma gelolafalï sähalea, Nilï sugua nefolalebe gagowelima fedamolö mosöla sämola säi.

¹³Yesuea amala mosöla säsebegi, dolö amo dïgïla mugabe amoli sugua nefolalo amolima fedai. Amala nogila fedalahilä gau mogobogi amogi baluluia digafulahilä ödägi digafula sugua amoli sulubadela ödäea mai. Sugua amoli gegedolada dausini äudä gadoi ödäea mai.

¹⁴Amo hamoi amo bealahilä sugua sigi aligilo amoli fisäla awälahilä gaamu dibea amige mosö gägäwila asi dibea amige säsäla awäha nelo. Säi amo nabalahilä udia dolö nefolalo amolia abilia hamoi walebelela fädäla bea asi.

¹⁵Ili Yesu neebea awälahilä beahamelebe dolö dafidi mugabe yafie fedai nelo amo fagulo salugala e asigi hedabi sebe amo bealahilä ili bedäi.

¹⁶Odoaea melï amolia udia dolö misi neebe amea nabuäia mugabe yafie nesiladigi amoge sugua ödäea mai amoge odoama fädäla säla ï.

¹⁷Amala säla ïasebegi, ilia Yesuma sähalea, Dida nilïle segewe dïgïla mosalola säi.

¹⁸Amala sälebe Yesu e ödä dudaia fimolö awäsebegi, dolö mugabe yafie fedai nelo dafidi nesiladigi amea nabahalea, Di awäsebe go gadola ne mudulela nabi.

¹⁹Amala nabasebegi, Yesuea dolö amoma säla obëgësalea, Nebalä moholö made. Dafidilo Geloia dima hamoi amoïege bobasëi amoïege dïe sosogoma säla ïmolö dihï mosöa mosalola säi.

²⁰Amala säsebegi, dolö amea Gaamu Nabülasi dibeamadi awälahilä Yesuea ema hamoi amo udia dolö nefolalo amolima säla ïasebegi, ilile asigigi fudugi.

²¹Yesuea ödä dudaia fila oeabo edefademalä amo dëgëla obëgëla agesua nebegi, udia dolö yafie mafula gegedoi.

²²Amala gedosebe amo gaalu, gedolo mosö beaha aligilo afädëïe ëida Yaulusi maala Yesu beagolelahilä ïe emo mia gumusula dia idogolahilä

²³ema gelola sähalea, Nïe nidiwi holöböda baagomolö ga madefalï dialea. Dofä dia naaboea diigisegi made baagola wahimäia awähadula säi.

²⁴Amala säsebegi, ebalä asi. Udia dolö yafie nefolalo amoliage e bëgëla awähalea dedelela negegila aligi awäha nelo.

²⁵Awäha nebegi, udia afädë gäheo i nabülasi afädëïe odoai äudä heale olo olosamu aligilo amoge asi.

²⁶Udia ameada e wahimäiala alögoda yafie neebea ami aulo gaso, së edefade melï. Alögoda amolima muni ïaha maadelo gaso, olo amo wahila made neala edesa aligilo.

²⁷Amala salea Yesuea hamolo mala säi amo ea nabalahilä udia dolö Yesu e bëgëla asi amolibalä awälahilä e baagido maala ïe fagulogi diigi.