Maleko 5:9-27

⁹Na kabo Yesu ye henamai ye wane, “Hesam ede saha?” Na ye hededebui ye wane, “Yau hesagu ede Legiyona, kaniyona ede ka bado.”

¹⁰Na ye kaibwadakalili ye wane, “Tabu ku hetamaligai ka lau kedalohaloha.”

¹¹Kuduli hesau papalina unai meta puwaka yawoina lakilakina se dumudumuli.

¹²Yaluwa yababadi wa se kaibwadalau Yesu unai se wane, “Ku hetamaligai ka lulau tenem puwaka ne yawoina ne udiyedi.”

¹³Yesu ye talam ede yaluwa yababadi wa kabo se pesa na se lulau puwaka wa udiyedi. Na se heloilidilidi padipadi wa unai se dobi ede se bekudobi gabwa wa unai se yoligogoi na se mwaloi. Na puwaka wa badodi ede nuwana 2,000.

¹⁴Puwaka wa taukitahetetedi kabo se wasabu se lau, wasa wa se helaki magai maudoidi udiyedi. Magai wa tamowaidiyao kabo se lau bena laulau wa se kita.

¹⁵Se lage Yesu unai, na tamowai yaluwa yabayababadi se luwuiꞌusei wa se kita ye tulitautaubigai, ma kalekalekona yo ma nuwanamwanamwana. Unai se matausi.

¹⁶Na saha ye tubu tamowai yo puwaka wa udiyedi taukitadi wa wasadiyao se hedededi taulaoma wa udiyedi.

¹⁷Siya kabo se kaibwadalau Yesu unai bena yodi magai ne ye laugabaei.

¹⁸Yesu waga wa unai ye gelu, na tamowai yaluwa yababadi se luwuiꞌusei wa ye kaibwadalau bena iya maiyana se lau.

¹⁹Yesu nige ye henuwa na ye hededelau iya kalinawai ye wane, “Ku lau yom magai yo kehamwao udiyedi na Guiyau yona katekamkamna yo gigibwali ye hemasalahadi kowa kalimwai wa, wasana yodi ku hedehedede.”

²⁰Iya kabo ye lau Dekapolisi tehana unai Yesu saha ye ginauli iya unai wa ye hewasa, ede tamowai maudoidi se nokokalili.

²¹Yesu ye gelu waga wa unai na ye uyo hali tanakawasi wa. Ye duna kabo ye pesa nagali wa unai, na bodalakilaki temenai se tupagogoima iya unai.

²²Kabo sunago tanuwagana hesau, hesana ede Yailo, iya Yesu ye kita ede ye lau ye tulibono Yesu talanuwana unai.

²³Na ye hedede katekamkamnalau iya unai, ye wane, “Natugu waihiu gagilina ye kasiyebwakalili. Taba gonowana ku laoma ku kabilau unai to kabo ye namwanamwa.”

²⁴Unai Yesu maiyana se lau, na bodalakilaki wa se hemuliwatanidi na yodi lau wa unai meta Yesu unai se heduheduna.

²⁵Waihiu hesau temenai, kana kasiyebwa meta kwasina ye miyamiyagabaei bolimai saudoudoi-labui.

²⁶Bolimai ne luwadiyena doketa maudoidi yodi sagu kalinawai meta nige gonowana, na waihiu wa meta ye kamkamnakalili. Na hemaisadi mo udiyedi yona moni maudoina ye hegehe, na kana kasiyebwa wa kabo ye helahelaki mo ye lau.

²⁷Iya Yesu yona laoma wasana ye lapui ede boda luwadiyena ye laoma Yesu dagelana unai na kana kwama ye kabitonogi,