San Marcos 5:9-27

⁹Ta ra Jesús ndaca̱ tuhun ra chi ra, ta catyí ra: ―¿Ñáá nañún? Ta nacaha̱n tatyi ña vaha cuan: ―Legión nañí, vatyi cuaha xaan ndi ―catyí chi chi ra Jesús.

¹⁰Ta chacu̱ ndahvi tatyi ña vaha cuan nuu ra Jesús tacuhva cha ma tachi ra chi chi nu cañi.

¹¹Ta yatyin ri yucu cuan nyicú cuaha xaan quɨnɨ cachachí tɨ.

¹²Yucuan chaha catyí tatyi ña vaha cuan chi ra Jesús tyehe caa: ―Ta̱chi chi ndi na quɨhvɨ ndi quɨnɨ cuan ―catyí tatyi cuan.

¹³Tyicuan ta chaha̱ ra Jesús, ta tatyi cuan quita̱ coyo chi ra cuan, ta quɨhvɨ̱ chi quɨnɨ cuan. Ta cha uvi mil quɨnɨ nyicú cuan, cachino̱ tɨ, ta canacoyo̱ tɨ chichi noo xahva yuhu miñi cuan, ta cachihi̱ tɨ chichi ndutya cuan.

¹⁴Tyicuan ta ra sahá cumi quɨnɨ cuan, chino̱ xaan ra chihin cha yuhví ra, ta chinacatyi̱ ra chi ñáyɨvɨ ñuu cuan ta ñu ñohó nu chiqui. Ta quichi̱ coyo ñáyɨvɨ, quichi̱ nyehe ñu ñáá cha cuvi̱.

¹⁵Cuhva cha chaa̱ coyo ñu nu nyaá ra Jesús, nanyehe̱ ñu chi ra cha yɨhɨ̱ tatyi ña vaha cuan chi. Ta vityin nyaá ra ñihnó ra sahma, ta cachi vaha iyó xiñi ra. Ta yuhví xaan ñu cuví.

¹⁶Ta ñu cha nyehe̱ cha cuvi̱ chi ra cuan ta chi quɨnɨ cuan, canacatyi̱ ñu chi tandɨhɨ ca ñu.

¹⁷Tyicuan ta quichaha̱ chacu ndahvi ñu nuu ra Jesús, na quita ra ñuu ñu.

¹⁸Ta cuhva cha cua quɨhvɨ ra Jesús chichi canoa, ra cha yɨhɨ̱ tatyi ña vaha cuan chi chacu̱ ndahvi ra nuu ra Jesús na cuhva ra cuhun ra chihin ra.

¹⁹Soco ra Jesús ña chaha̱ ra cuhun ra, ta catyí ra chi ra: ―Cua̱nuhu nya vehun, nu nyaá ñáyɨvɨ chuun, ta na̱catyun chi ñu tandɨhɨ cha sacuvi̱ Sutu yo Nyoo chuhun, ta yoso caa cundahvi̱ cuñi ra nyehe ra chuun.

²⁰Ta ra cuan cuahan ra ta quichaha nacatyi ra chi ñáyɨvɨ tandɨhɨ ñuu Decápolis tandɨhɨ cha sacuvi̱ ra Jesús chihin ra. Ta tandɨhɨ ñu, iyo cuñí ñu.

²¹Ta cuhva cha nachaa̱ ra Jesús chihin canoa nya inga chiyo miñi cuan, chaa̱ coyo cuaha ñáyɨvɨ nu nyaá ra. Ta ndoo̱ ra yuhu miñi cuan.

²²Tyicuan ta chaa̱ noo ra cuví nuu vehe ñuhu. Nañí ra Jairo. Ta cuhva cha nanyehe̱ ra chi ra Jesús, chicuiñi chɨtɨ ra nuu ra.

²³Ta chacu̱ ndahvi ra nuu ra ta catyí ra: ―Cha cuñí cúvi sehi. Co̱ho chihin ta tyi̱son ndahun sɨquɨ ña na nduvaha ña ta ma cúvi ña.

²⁴Tyicuan ta cuahan ra Jesús chihin ra, soco cuaha ñáyɨvɨ nyicón chi ra, ta nyacua nañi tahan ri ca maa ñu.

²⁵Ta mahñu ñáyɨvɨ cuan ñohó noo ñaha cha cuhví. Cha quita uchi uvi cuiya ndoho ña cuehe cha chatɨ́ nɨñɨ ña.

²⁶Ta cuaha tɨndoho nyehe ña cha cuaha xaan doctor nyehe̱ chi ña. Ta cha sanaa̱ ña tandɨhɨ maa cha iyó chi ña, soco ñahri maa tyinyee̱ chi chi ña. Soco ñihi ndɨhɨ ca nanduvi.

²⁷Cuhva cha chitó ña tuhun milagru cha sacuví ra Jesús, tuhva̱ ña ityi chata ra ta tɨɨ̱n ña sahma ra.