MAṮṮA 23:6-26

⁶Dhali uni eni montaḵ e mo jin yuḵkunuwa yuḵ mo dhali mom ’boron e gu’b gi montul is mo be

⁷dhali en monthe me’d kagahara e mo ma suug mo dhali uni eni mii jin yuḵa ’kwani uni ki gum pem jin caa e ki ca mo.

⁸Hili um mini ’koki ŋap̱ ’kwani mmoyuḵ um ki gum bam kun caa e ki ca mo haali/ um tan ga manṯor gwom bum jin ṯal ’de/ mo dhali um tana waḵa ṯal ’de/ mo be.

⁹Dhali um mini ’koki yuḵ wathiŋ kamu/ ka babam bum e mony’cesh yan mo haali/ um tan ga Babam bum jin ṯal ’de/ mo a’di jin di’d e momis mo be.

¹⁰Walla um yisa minu yuḵ ki itap̱a mo haali/ um tan gi tap̱am bum ṯal ’de/ mo a’di jin ta’da Ḵrisṯẖos mo be.

¹¹A’di jin caaca e bwam um mo tani a’di midi ta c̱iŋkinam bum mo be.

¹²A’diyin jin kar is piti ki ca mo tani minu kar ki gwa’d mo dhali a’diyin jin kar is piti ki gwa’d mo tani minu kar ki ca mo be.

¹³Wayyi e um, ’kwani kun ta iman’kwar to mo dhali ’Kwani P̱arisiyiin mo kun tana he’k e ka he’k e mo. Haali/ um ’dap̱ki bway gi Bampa/ gi Momis ’twa/ mo ap̱o/ ’kwani mo. Haali/ um ki is bum ’koki cic̱ mo walla ’koki dhal uni gwansan bway mo kun mini ’taki cic̱ i a’di mo be.

¹⁴Wayyi e um, ’kwani kun ta iman’kwar to mo dhali ’Kwani P̱arisiyiin mo kun tana he’k e ka he’k e mo. Haali/ um loski gu’b gi up̱ gun wuna ikaṯẖ mo dhali eya por ma pije/ mo tani um ki mii mon’tho mo ki rash rash mo. Wakan um mini bu’th dhan miiwaḵ gun caaca mo be.

¹⁵Wayyi e um, ’kwani kun ta iman’kwar to mo dhali ’Kwani P̱arisiyiin mo kun tana he’k e ka he’k e mo. Haali/ um tani mo mo dhali dhan yi’de/ mo dhali a’cesh mo mmogam jan ṯal ’deŋ kamu/ jin dina e ki she/ mo mmobu’th gwom bum mo, dhali ki a’di warki’d ka manbu’th gwom bum mo tani um ki mii a’di ka ’ci ma al o’d me’di su/ ki nyanye/ mo mmobol is bum gana/ e mo be.

¹⁶Wayyi e um, ’kwani kun tana ja’da/ ka ja’da/ mo kun ṯoshki ta ashu/um bway mo, kun o gwo mo ki: Waḵki/ jan ṯal ’deŋ kamu/ midi thul me’da p̱o/ gu’b gi mondheleladhelel mo tani a’di mii mii ki p̱e’th mo be. Hili waḵki/ wathiŋ kamu/ midi thul me’da p̱o/ ’dolkon gana/ gi gu’b gi mondheleladhelel mo tani a’di deḵu ki gwom piti jin ona a’di is mo be.

¹⁷Um ’kwani kun tana ja’da/ kun ta p̱us mo. Haali/ to jin ca’d ita’da ta mo, ta ’dolkon ’taa? walla gu’b gi mondheleladhelel jin kar ’dolkon ki a’di jin ḵogu mo?

¹⁸Dhali um kun o gwo mo ki: Waḵki/ jan ’de/ midi thul me’da p̱owa gwaṯa/ jin miinuwa bas mo tani a’di mii’d ki p̱e’th mo be. Hili waḵki/ wathin ’deŋ kamu/ thul me’da p̱o/ to jin c̱inu ki me’d mo ap̱owa gwaṯa/ jin miinuwa bas mo tani a’di deḵa gwom piti jin ona a’di is mo be.

¹⁹Um ’kwani kun tana ja’da/ mo. Haali/ to jana ica’d mo, to jin c̱inu ki me’d mo ’taa? walla gwaṯa/ jin miinuwa bas a’di kar to jin c̱inu ki me’d ki jin ḵogu mo?

²⁰Wakan a’di jin thuli me’da ap̱owa gwaṯa/ jin miinuwa bas mo tani a’di thulki me’di a’di mo dhali aris to ’baar kun ’koni a’di mo be.

²¹Dhali a’di jin thuli me’da p̱o/ gu’b gi mondheleladhelel mo tani a’di thulki me’di a’di mo dhali ki a’di jin c̱a’bki’d e a’di mo be.

²²Dhali a’di jin thuli me’da p̱o/ momis mo tani thulki me’da p̱owa ḵursi ma Arumgimis mo dhali ki a’di jin c̱a’bki’da p̱o/ a’di mo be.

²³Wayyi e um, ’kwani kun ta iman’kwar to mo dhali ’Kwani P̱arisiyiin mo kun tana he’k e ka he’k e mo, haali/ um c̱ina nana/ ki to jin c̱inu Arumgimis mo dhali anuŋkure/ mo dhali toŋ kuyga/ jin miinuwa ’tash jin ta’da akammun mo dhali um ki ta p̱iny is e ton tiya kun ’bitha mii ’ba/ ki ’bi’th mo me’d gwoŋḵan jin c̱inu mo dhali momii ma ḵar/e mo dhali momiimii mo dhali moŋgam gwo is mo. Aris to gwansan ḵa ba/ mmina umi mii mii mo mmodar ga p̱iny isi cine/ ki miin tiya mo.

²⁴Um kun ṯoshki ta ashu/um bway kun tana ja’da/ mo, um ki dhim e ka pije/ mo dhali um ki los kalman ki ’kolo’c mo be.

²⁵Wayyi e um, ’kwani kun ta iman’kwar to mo dhali ’Kwani P̱arisiyiin mo kun tana he’k e ka he’k e mo, haali/ um lamki ’ko’d gwar ma ḵubbaaya mo dhali asahan mo, hili e bwaman mo tani uni ’tu’dkunu mo ki mondil to mo dhali ki mii kun ’coḵa’coḵ mo.

²⁶/E Wathim P̱arisi jin ta’da ja’da/ mo. Lami bwamana ḵubbaayam pini nṯwa/a/ mo ma dhali asahan mo, wakan ki ’ko’d gwar ma pije/ si’da/ midi dheleladhelel mo be.