ᤔᤳᤋᤡ 23:6-26

⁶ᤂᤧᤱᤜᤠ᤹ ᤛᤠᤓᤠᤱᤈᤠ ᤏᤢ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤒᤠ ᤋᤢᤶᤔᤩᤠᤱᤜᤠᤱ ᤕᤢᤰᤏᤠᤜᤠ᤹ᤀᤥ ᤕᤢᤱᤔᤠ ᤂᤢᤏᤡ᤹ ᤛᤡᤖᤠ᤹ ᤌᤠᤱᤗᤥ॥

⁷ᤜᤧᤰᤁᤩᤠᤱ ᤐᤠᤱᤈᤢᤶᤔᤥ ᤔᤏᤠᤜᤠ᤹ᤖᤧ ᤛᤣᤘᤠ ᤔᤧᤔᤧᤳᤋᤢᤛᤡᤒᤠ ᤏᤢ ᤛᤡᤰᤛᤠᤶᤒᤣ ᤗ᤹ᤖᤡᤰ ᤔᤧᤔᤧᤳᤋᤢᤛᤡᤒᤠ ᤂᤢᤏᤡ᤹ ᤛᤡᤖᤠ᤹ ᤌᤠᤱᤗᤥ॥

⁸ᤁᤖ ᤂᤡᤏᤡ᤹ᤃ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤛᤡᤰᤛᤠᤶᤒᤣ ᤗ᤹ᤖᤡᤰ ᤁᤧᤔᤧᤶᤔᤧᤳᤋᤡᤴᤗᤖᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤌᤡᤰᤗᤰ ᤛᤡᤰᤛᤠᤶᤒᤠᤴ ᤁᤧᤃᤳᤋᤢᤶᤗᤥ. ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤖᤧᤰᤁ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ ᤜᤧᤰᤁᤣᤏᤡᤱᤗᤥ॥

⁹ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ‘ᤐᤠ᤺ᤀᤣ’ ᤗ᤹ᤖᤡᤰ ᤘᤣ᤹ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤔᤧᤳᤋᤧᤶᤛᤡᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤌᤡᤰᤗᤰ ᤏᤡᤱᤘᤠ᤹ᤑᤢᤐᤠ᤺ ᤁᤧᤃᤳᤋᤢᤶᤗᤥ. ᤂᤢᤏᤧ᤹ᤃ ᤛᤠᤱᤃᤪᤠᤶᤐᤣᤍᤠᤱᤅᤥ ᤘᤠ᤹ᤖᤥ॥

¹⁰ᤀᤠᤳᤋᤡᤴᤜᤠ᤹ᤖᤧᤀᤠᤱ ‘ᤛᤡᤰᤛᤠᤶᤒᤣ’ ᤗ᤹ᤖᤡᤰ ᤁᤧᤔᤧᤶᤔᤧᤳᤋᤡᤴᤗᤖᤥ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤌᤡᤰᤗᤰ ᤛᤡᤰᤛᤠᤶᤒᤠᤴ ᤁᤧᤃᤳᤋᤢᤶᤗᤥ. ᤂᤢᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤖᤥ॥

¹¹ᤂᤡᤏᤡ᤹ ᤗᤢᤶᤔᤥ ᤁᤧᤖᤧᤰᤏᤢ᤺ᤸᤗᤧ ᤁᤧᤕᤧᤰᤐᤠ ᤔᤏᤠ᤺ᤴ ᤜᤠᤖᤠ᤹ ᤂᤧᤴ ᤂᤡᤏᤡ᤹ ᤛᤣᤘᤠᤖᤥᤒᤠ ᤐᤥ᤺ᤱᤔᤠ ᤐᤥ᤺ᤱᤗᤥ॥

¹²ᤀᤠᤳᤋᤡᤸᤗᤧ ᤕᤶᤒᤠ ᤗᤧᤱᤛᤡᤱᤔᤠ ᤁᤥ᤺ᤳᤋᤢ᤹. ᤂᤧᤱᤃ ᤆᤢᤰᤛᤠ ᤐᤥ᤺ᤱᤗᤥ. ᤜᤧᤰᤁᤩᤠᤱ ᤀᤠᤳᤋᤡᤴ ᤆᤢᤰᤛᤠ ᤗᤧᤱᤛᤡᤱ ᤂᤧᤱᤃ ᤕᤶᤒᤠ ᤐᤥ᤺ᤱᤗᤥ॥

¹³ᤂᤡᤏᤡ᤹ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤛᤣ. ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ᥄ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤸᤗᤧ ᤁᤢᤗᤠᤶᤔᤡᤴ ᤘᤣ᤹ ᤔᤏᤠᤜᤠ᤹ᤖᤧ ᤗᤠᤃᤡ ᤁᤧᤛᤠᤰᤋᤢᤶᤔᤠᤱ ᤁᤧᤘᤕᤡ᤹ᤖᤥ. ᤜᤧᤰᤁᤩᤠᤱ ᤀᤠᤒᤠᤅᤣᤀᤠᤱ ᤂᤧᤵᤔᤥ ᤂᤡᤏᤡ᤹ ᤁᤧᤴᤗᤠᤛᤡᤴ ᤜᤧᤰᤁᤩᤠᤱ ᤗᤠ᤺ᤵᤔᤠ ᤁᤧᤃᤥ᤺ᤵᤐᤠ ᤘᤣ᤹ ᤔᤏᤠᤜᤠ᤹ᤀᤠᤱ ᤗᤠ᤺ᤵᤔᤠ ᤁᤧᤶᤒᤠᤱᤄᤢᤶᤛᤡᤶᤔᤡᤴᤗᤥ॥

¹⁴((ᤂᤡᤏᤡ᤹ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤛᤣ. ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ᥄ ᤂᤡᤏᤡ᤹ᤃ ᤔᤣᤔᤣᤍᤢᤔᤠᤜᤠ᤹ ᤀᤡᤱᤃᤧᤗᤧᤰᤋᤢᤶᤛᤡᤶᤔᤠᤱ ᤂᤢᤏᤡ᤹ ᤜᤡᤶᤎᤠ᤺ᤱᤜᤠ᤹ ᤁᤧᤏᤠᤵᤋᤢᤶᤛᤡᤶ. ᤁᤖ ᤏᤢ᤺ᤒᤠ ᤀᤥᤛᤣ᤺ᤴᤎᤠᤰᤛᤡᤱᤔᤠᤖᤧ ᤗᤠᤃᤡ ᤁᤣ᤺ᤶᤒ᤻ ᤁᤣ᤺ᤶᤒᤠ ᤋᤢᤘᤠ ᤁᤧᤈᤥᤃᤢᤶ॥ ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤂᤢᤶᤍᤡᤱᤅᤡᤱᤃ ᤛᤧᤰᤂᤠᤛᤠᤱ ᤛᤠ᤹ᤖᤡᤰ ᤁᤡᤵᤔᤠ ᤁᤧᤄᤢ᤺ᤒᤠ ᤐᤥ᤺ᤱᤗᤥ॥))

¹⁵ᤂᤡᤏᤡ᤹ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤛᤣ. ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ᥄ ᤂᤡᤏᤡ᤹ᤃ ᤌᤡᤰ ᤔᤏᤠ᤺ᤴ ᤕᤜᤢᤍᤡ ᤛᤠᤶᤕᤥᤀᤥ ᤋᤠ᤺ᤵᤔᤠ ᤑᤠ᤹ᤀᤠᤱ ᤗᤠᤈᤣ᤹ ᤏᤢ ᤘᤠᤜᤱ ᤂᤠᤖᤠᤰ ᤗᤠᤶᤍᤡ᤺ᤰ ᤁᤧᤈᤥᤃᤡᤖᤥ. ᤜᤧᤰᤁᤩᤠᤱ ᤂᤧᤴ ᤔᤏᤠ᤺ᤴ ᤕᤜᤢᤍᤡ ᤛᤠᤶᤕᤥᤀᤥ ᤁᤧᤍᤠ᤺ᤖᤢᤶᤔᤠᤱᤃ ᤂᤧᤴ ᤂᤡᤏᤡ᤹ᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤂᤧᤔᤠᤕᤱᤛᤱᤅᤥ ᤂᤢᤶᤍᤡᤱ ᤁᤧᤄᤥ᤺ᤒᤠ ᤁᤧᤈᤥᤃᤢᤶᤗᤥ॥

¹⁶ᤂᤡᤏᤡ᤹ ᤔᤡᤰᤑ᤺ᤶᤒᤠ ᤗᤠᤶᤗᤥ᤺ᤒᤠᤛᤣ. ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ᥄ ᤀᤠᤳᤋᤡᤴ ᤔᤠᤱᤜᤡᤶᤔᤡᤸᤗᤧ ᤁᤢᤔᤡᤱᤅᤥ ᤔᤠᤱᤜᤧᤰᤛᤡᤱ ᤂᤧᤱᤃ ᤌᤣᤀᤠᤱ ᤔᤧ᤺ᤴᤗᤥ. ᤁᤖ ᤀᤠᤳᤋᤡᤴ ᤔᤠᤱᤜᤡᤶᤔᤥᤒᤠ ᤛᤠᤶᤔᤩᤠᤱᤅᤡᤸᤗᤧ ᤁᤢᤔᤡᤱᤅᤥ ᤔᤠᤱᤜᤧᤰᤛᤡᤱ ᤂᤧᤴ ᤁᤢᤒᤠ᤺ᤴᤏᤡᤸᤗᤧ ᤂᤣ᤺ᤱᤛᤡᤱᤗᤥ ᤗ᤹ᤖᤡᤰ ᤂᤡᤏᤡ᤹ ᤁᤧᤒᤠ᤺ᤳᤋᤢᤶ॥

¹⁷ᤂᤡᤏᤡ᤹ ᤔᤡᤰᤑ᤺ᤶᤒᤠ ᤀᤍᤱᤛᤣ᥄ ᤛᤠᤶᤔᤩᤠᤱᤅᤡᤴ ᤕᤶᤒᤠᤒᤡ ᤛᤠᤶᤔᤩᤠᤱᤅᤡᤴ ᤛᤣᤛᤣ ᤁᤧᤈᤥ᤺ᤰᤐᤠ ᤔᤠᤱᤜᤡᤶᤔᤡᤴ ᤕᤶᤒᤠᤒᤡ᥅

¹⁸ᤂᤡᤏᤡ᤹ ᤀᤰᤂᤣᤗ᤹ᤖᤡᤰᤁᤠᤱ ᤁᤧᤒᤠ᤺ᤳᤋᤢᤶ. ‘ᤀᤠᤳᤋᤡᤴ ᤗᤧᤳᤋᤡᤱ ᤋᤥ᤺ᤶᤔᤠᤍᤧᤴᤏᤡᤸᤗᤧᤴ ᤔᤠᤱᤜᤧᤰᤛᤡᤱ ᤂᤧᤴ ᤌᤣᤀᤠᤱ ᤔᤧ᤺ᤴᤗᤥ. ᤁᤖ ᤀᤠᤳᤋᤡᤴ ᤗᤧᤳᤋᤡᤱ ᤋᤥ᤺ᤶᤔᤠᤍᤧᤴᤏᤥᤒᤠ ᤆᤥᤑᤠ᤹ᤗᤧᤴ ᤔᤠᤱᤜᤧᤰᤛᤡᤱ ᤂᤧᤴ ᤁᤢᤒᤠ᤺ᤴᤏᤡᤸᤗᤧ ᤂᤣ᤺ᤱᤛᤡᤱᤗᤥ॥’

¹⁹ᤂᤡᤏᤡ᤹ ᤔᤡᤰᤑ᤺ᤶᤒᤠ ᤔᤏᤠᤛᤣ. ᤆᤥᤑᤠ᤹ᤀᤡᤴ ᤕᤶᤒᤠ ᤒᤡ ᤆᤥᤑᤠ᤹ᤀᤡᤴ ᤛᤣᤛᤣ ᤁᤧᤈᤥ᤺ᤰᤐᤠ ᤗᤧᤳᤋᤡᤱ ᤋᤥ᤺ᤶᤔᤠᤍᤧᤴᤏᤡᤴ ᤕᤶᤒᤠᤒᤡ᥅

²⁰ᤂᤧᤸᤗᤧ ᤆᤥᤃᤢᤸᤗᤧ ᤀᤠᤳᤋᤡᤴ ᤗᤧᤳᤋᤡᤱ ᤋᤥ᤺ᤶᤔᤠᤍᤧᤴᤏᤡᤸᤗᤧᤴ ᤔᤠᤱᤜᤧᤰᤛᤡᤱ ᤂᤧᤴ ᤂᤧᤵᤔᤥ ᤁᤧᤖᤧᤰ ᤁᤧᤏᤧᤒᤠᤸᤗᤧᤴᤏᤠᤱ ᤔᤠᤱᤜᤧᤰᤛᤡᤱᤗᤥ॥

²¹ᤜᤧᤰᤁᤩᤠᤱ ᤀᤠᤳᤋᤡᤴ ᤔᤠᤱᤜᤡᤶᤔᤡᤸᤗᤧᤴ ᤔᤠᤱᤜᤧᤰᤛᤡᤱ ᤂᤧᤱᤃ ᤂᤧᤵᤔᤥ ᤁᤧᤘᤠ᤹ᤒᤠᤸᤗᤧᤴᤏᤠᤱ ᤔᤠᤱᤜᤧᤰᤛᤡᤱᤗᤥ॥

²²ᤀᤠᤳᤋᤡᤴ ᤛᤠᤱᤃᤪᤠᤶᤐᤣᤍᤠᤱᤅᤡᤸᤗᤧᤴ ᤔᤠᤱᤜᤧᤰᤛᤡᤱ ᤂᤧᤱᤃ ᤏᤡᤱᤘᤠ᤹ᤑᤢ ᤕᤢᤰᤏᤠ ᤏᤢ ᤂᤧᤵᤔᤥ ᤁᤧᤕᤢᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤴᤏᤠᤱ ᤔᤠᤱᤜᤧᤰᤛᤡᤱᤗᤥ॥

²³ᤂᤡᤏᤡ᤹ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤛᤣ. ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ᥄ ᤂᤡᤏᤡ᤹ ᤀᤡᤰᤋᤠᤵᤐᤥᤗᤠᤶ ᤏᤠᤶᤛᤢᤏᤠ. ᤛ᤺ᤵᤑᤠ ᤏᤢ ᤜᤡᤶᤆᤧᤶᤓᤧᤴ ᤜᤧᤰᤋᤱᤒᤠ ᤔᤠᤖᤢᤰᤜᤠ᤹ᤖᤧᤴᤏᤠᤱ ᤌᤡᤒᤥ᤺ᤱᤗᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤒᤡᤖᤢᤶ. ᤁᤖ ᤏᤢ᤺ᤖᤡᤰᤁᤠᤱ ᤂᤠᤛᤧᤴ ᤁᤧᤴᤈᤥᤃᤢᤶᤛᤡᤶᤔᤡᤴ. ᤘᤣ᤹ ᤔᤏᤠᤜᤠ᤹ ᤗᤢᤱᤔᤠ᤹ ᤁᤧᤴᤍᤢᤰᤋᤢᤶᤛᤡᤶᤔᤡᤴ. ᤜᤧᤰᤁᤩᤠᤱ ᤏᤛᤠ᤺ᤴ ᤁᤧᤴᤈᤥᤃᤢᤶᤔᤡᤴᤗᤥ॥ ᤁᤴ ᤏᤠ᤺ᤵᤔᤠᤀᤣ ᤁᤧᤒᤥ᤺ᤱᤒᤠ ᤛᤠᤶᤕᤥᤌᤡᤶᤒᤠ ᤐᤠ᤺ᤴᤜᤠ᤹ ᤁᤧᤴᤏᤠ᤺ᤳᤋᤢᤶᤔᤡᤴᤗᤥ॥ ᤂᤡᤏᤡ᤹ᤃ ᤌᤡᤒᤥ᤺ᤱᤗᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤒᤡᤖᤢᤶᤔᤡᤸᤗᤧ ᤁᤴ ᤏᤢ᤺ᤖᤡᤰᤁᤠᤱ ᤂᤠᤛᤧᤴ ᤆᤥ᤺ᤰᤔᤠ. ᤘᤣ᤹ ᤔᤏᤠᤜᤠ᤹ ᤗᤢᤱᤔᤠ᤹ ᤋᤢᤰᤔᤠᤛᤡ ᤏᤢ ᤏᤛᤠ᤺ᤴ ᤆᤥ᤺ᤰᤔᤠ ᤁᤧᤗ᤹ᤒᤠ ᤛᤠᤶᤕᤥᤌᤡᤶᤔᤥᤒᤠ ᤏᤠ᤺ᤵᤔᤠᤀᤣ ᤁᤧᤒᤥ᤺ᤱᤒᤠ ᤐᤠ᤺ᤴᤜᤠ᤹ᤀᤠᤱ ᤆᤥᤃᤧᤶᤔᤧ᤹ᤀᤥ॥

²⁴ᤂᤡᤏᤡ᤹ ᤔᤡᤰᤑ᤺ᤶᤒᤠ ᤗᤠᤶᤗᤥ᤺ᤒᤠᤛᤣ. ᤂᤡᤏᤡ᤹ ᤛᤡᤰᤆᤠᤜᤠ᤹ ᤁᤧᤛᤠ᤺ᤰᤋᤢᤶ ᤁᤧᤗ᤺ᤳᤋᤢᤶᤛᤡᤶ. ᤁᤖ ᤀᤢᤔᤣ᤺ᤴ ᤁᤧᤗᤖᤢᤶᤗᤥ॥

²⁵ᤂᤡᤏᤡ᤹ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤛᤣ. ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ᥄ ᤂᤡᤏᤡ᤹ᤃ ᤂᤥᤷᤕᤠ᤺ᤴ ᤏᤢ ᤆᤧᤳᤌᤩᤠ᤺ᤴ ᤗᤠ᤺ᤰᤁᤠᤳᤗᤰ ᤘᤠᤃᤧᤜᤵᤋᤢᤶ. ᤁᤖ ᤛᤡᤃᤠᤱᤃ ᤀᤡᤱᤃᤠ᤹ᤖᤰ ᤆᤠᤱ ᤌᤢᤅᤢᤱ ᤁᤧᤗ᤹ᤒᤠ ᤏᤡᤱᤘᤠ᤹ ᤆᤥ᤺ᤰᤔᤠᤴ ᤏᤢ ᤔᤏᤠᤜᤠ᤹ ᤁᤧᤏᤠᤵᤋᤢᤶ ᤁᤧᤍᤠ᤺ᤖᤢᤶᤛᤡᤒᤠ ᤐᤠ᤺ᤴᤜᤠ᤹ᤖᤧ ᤁᤧᤍᤡᤶᤛᤡᤀᤠᤱ ᤁᤧᤘᤕᤡ᤹ᤖᤥ॥

²⁶ᤔᤡᤰᤑ᤺ᤶᤒᤠ ᤑᤖᤡᤛᤡᤛᤣ. ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤂᤥᤷᤕᤠ᤺ᤴ ᤁᤢᤛᤡᤃᤠᤱ ᤘᤠᤜᤵᤋᤧᤶᤔᤧ᤹. ᤜᤧᤰᤁᤣᤗ᤹ᤖᤡᤰ ᤗᤠ᤺ᤰᤁᤠᤳᤋᤠᤱ ᤛᤣᤛᤣ ᤐᤥ᤺ᤱᤗᤥ॥