Luku 7:11-43

¹¹Anama huteno henka Jisasi'a Nainie nehaza rankumate amage'ma nentaza disaipol naga'ane nevige'za, tusi'a veamo'za avariri'za magoka vu'naze.

¹²Ana kuma kasante nevigeno, mago fri'nea nera eri'za atirami'zma e'naze. Ana a'mofona magoke mofavregino, kento'a mani'negeno ana kumapi tusi'a vahe krefamo'za ana a'enena e'naze.

¹³Ramo ana a'ma ome negeno'a asunku hunenteno, zavira oto nehuno,

¹⁴anante eno sesenku'are ome avako nehigeza, zafa hu'za nevaza vahe'mo'za anante oti'naze. Jisasi'a anage hu'ne, nehazavemoka Nagra otio hu'na kagrikura nehue!

¹⁵Anama fri'nea ne'mo otino nemnino, agafa huno keaga nehigeno, Jisasi'a ana nera avazuhuno nererana ami'ne.

¹⁶Tusi koro nehu'za Anumzamofo agi erisaga hu'za anage hu'naze. Agatererfa kasnampa ne' amu'nontifina efore nehigeno! Anumzamo'a Agra'a vahe'a eno zamaza nehie hu'naze!

¹⁷Ama anazama Jisasi'ma hiazamofo agenkemo'a maka Judiane mika megaginea kumatmipina vuno eno hu'ne.

¹⁸Mono ti frente Jonima amage'ma nentaza disaipol nagamo'za makazama Jisasi'ma hu'neazamofo agenke'a ome Jonina asamizageno, tare amage'manenta'a disaipol ne'tre kehuno,

¹⁹Jisasi ome antahige'ogu huznanteno, Kagra egahiema hu'nea ne Mesaiaga tazama hunka taguvazi ne'pi, Rumofonku avega antegahuno?

²⁰Higeno ana netremoke e'ne anage hu'ne Jisasina asami'na'e. Mono ti fre Joni'a amanage huno hurantegeta kantahigenaku neo'e. Kagra egahiema higeta avegama ante'nona tazahu ne' Mesaiagafi, rumofonku avega antegahuno?

²¹Anakna fatgorera hakare rumofo rumofo kri eri'naza vea Jisasi'a zamazeri so'e nehuno, havi avamutmi zmagu'afinti hunezmanteno, rama'a zmurga asu hu'nea vahera zmazeri hari huzmante'ne.

²²Ana huteno anage huno kenona zanirera, znasami'ne, vuta nazano negeta nentahita ha'azana Jonina ome asami'o, zamavu asu hu'nea vahe'mo'za hari nehazageno, zmagia haviza hu'namo'za zmagia refatgo nehazageno, fogu kri erinaza vahera neganamrazageno, zmagesa ankanire vahe'mo'za nentahizageno, fri vahe'mo'za onetizageno, zamunte omne vahe'pina knare musenkea huama nehie.

²³Hanki iza'o Nagri'ma ha'ma reonantesimo'a muse hugahie.

²⁴Joninkema eri'ne e'na'a netremokea vutakeno, Jisasi'a agafa huno tusi'a veapi Joninku huno, ka'ma kopima vu'nazana na'a kenaku vu'naze? Jaho'mo hakema eri tagosi hu'nea zampi? I'o.

²⁵Hianagi Na'a ome kenaku vu'naze? Fru fru huno konariri'ane kukena hu'nea vahe ome kenafi? I'o, knare konariri'ane kukenama hu'za, so'e zampima nemaniza vahera, kini vahe nompi nemanize!

²⁶Hianagi na'a ome kenaku vu'naze? Kasnampa nepi? Izo tamage hu'na neramasmue. Ana ne'mo mika kasnampa vahera zmagatere'ne.

²⁷E'i ana nekura avontafepina amanage huno krente'ne, Ko, nagri ke erino vu vahera, huntogeno ugagota huganteno neviankino, agra kana variganteno vugahie. (Mal 3:1)

²⁸Nagra neramasamue, a'nemo'za kase zmante'nafintira mago'mo'e huno Jonina agatere'nea nera omni'ne, ana nehigeno Anumzamofo Kumapina osi hu'nemo, agrira agetere'ne.

²⁹Maka vahe'mozane havige hu'za takesi zgo eneriza vahe'mo'zanena ana nanekema nentahiza, Anumzamofo avu'avazamo'a fatgo hu'ne hu'naze. Na'ankure Joni'ma mono tifre zmantenegu ana hu'naze.

³⁰Hianagi Farisi mono vahe'mozane, kasegere ugagota hu'naza vahe'mo'za, Anumzamo'ma zamagri'ma zmaza hunaku retro hu'neazana zmefi humi'naze. Na'ankure zamagrira Joni'a mono tina fre ozmante'ne.

³¹Hagi na'ante huntena ama knafi vahe'mofo avu'avazankura avame kea hugahue. Zamagra nankna hu'naze hu'na hanue?

³²Zamagra mofavre'ramimo'za maketi kumapi mani'ne'za kehugantigama hiaza nehaze. Tagra konke tafe ronanagi, tamagra avoa noraze, zavite zgame hunanagi zavira notaze.

³³Na'ankure mono tifrente Joni eno, bretine waini tine nonegetma, tamagra hutma havi avamu agripi mni'ne hu'naze.

³⁴Vahe'mofo Mofavremo eno ne'zane tine nenegetma, tamagra hutma, keho ne'za nevava nehuno, waini ti neneno, takesi zago eneriza vahe ene kumi vahe'ene raru huno nemanie nehaze!

³⁵Hianagi knare antahintahizana Agri'ma avaririza vahepi eriama nehie.

³⁶Mago Farisi ne'mo, Jisasi ne'za agrane ome nesniegu agi higeno vu'ne. Farisi ne'mofo noma'afi ne'zane trate aza tununte anteno mni'ne.

³⁷Anante ana kumateti mago kumi a'mo, Farisi ne'mofo nompi Jisasima nezama nene kema nentahino, mago mananentake masave aravasta have tafempi me'negeno erino eno,

³⁸amefiga'a agare emaniteno, zavi neteno avunuteti agia sese nehuno, azokanu eri ho'mu nehuno, agia antako nehuno, mana nentake masave tagino agare frente'ne.

³⁹Hagi Jisasima ke higeno e'nea Farisi ne'mo anazana negeno, amanage huno agu'afina agesa antahi'ne, ama kasnampa ne'ma mni'neresina, kumi' hu'nea a'mo avako Agrira nehiankino, agafa'a keno antahino nehuno kumi are huno hisine.

⁴⁰Jisasi'a Saimoni antahintahia negeno kenona'a huno, naneke kasminaku nehue higeno, Saimoni'a huno, knareki Rempi hurami ne'moka amne kea huo.

⁴¹Magora nofihu zago netrea ne'mo'a, tare ne'tre zgoa znamine. Magomo'a 500ti zgo nofi huno erigeno, mago'mo'a 5fu'a zota erine.

⁴²Hanki ana zgomofo nona'a hu'ne amiga osakeno, knareki atre'o, huno huznante'ne. Iza agtereno ana zgoma nofitema netrea nekura avesinenteno tusi musena huntegahie?

⁴³Saimoni'a kenona anage hu'ne, nagesama antahuana rama'a zgoma nofi'ma hu'nemo'e. Higeno Jisasi'a huno, tamage hufatgo hunka hane.