San Lujc 7:11-43

¹¹Chi gudëd gojc zian, wej Jesús tijb luguiedx la Naín binë ree xbejnman, në zien ree ben ren.

¹²Chi bidxinman gajxh roꞌ guiedx guin, baguiaaman ziquieꞌch reeman tijb xingüt, tijbzi laax na̱j xiꞌn xniaax, najman bén bizëjb. Zien daꞌt ree bénluguiedx guin zinal laaman.

¹³Chi baguiaa Dad Jesús laaman, bayaman laaman, dxel rëbaman lojman: ―Ad roonl.

¹⁴Abiꞌ bibig Jesús baquiꞌman xcaj xingüt guin, dxel guzudxe ree bén zinë laax. Zianz rëbaman lojx: ―Xiꞌn, naj rni lojl: ¡Bixche!

¹⁵Dxel gureli xin guin, guzuloj caneex, zianz bayü Jesús laax loj xniaax.

¹⁶Chi baguiaa reeman zian, graczi reeman bidxeb guzuloj cuzaꞌt reeman Dios zagdxe, rëb reeman: ―Du loj ree ma gules Dios tijb bén zojbloj, bén rudëë xtiidx Dios loj ree bejn. Rëb tëë reeman: ―Ma biꞌt Dios din gagnë ree xbejnman.

¹⁷Abiꞌ guidib niz Judea në ree guiedx rigaꞌ niz yagaj gogbee ree bejn ni been Jesús.

¹⁸Gogbee Waj gra ree ni cayüjn Jesús, guial bagojn ree xbejnman laaman. Abiꞌ guneeman tioꞌp reeman,

¹⁹dxel guxhaalaman laa reeman loj Jesús din chignabdiidx reeman bal laacaman na̱j Cristo bén na̱j diidx guiꞌt, bén cabëz reeman, o cwëz reeman ben ren ya.

²⁰Abiꞌ bibig reeman, guneenë reeman laaman, rëb reeman lojman: ―Waj bén ruroobnijs bejn ree guxhaal dunujn lojl zudganabdiidxan bal lüjcan na̱j Cristo bén na̱j diidx guiꞌt, bén caylëjzan o yalëjzan ben ren ya.

²¹Hor ziigajc bayüjn Jesús zien daꞌt ree bénragxuu, në ree bén rdoob, nëtëë ree bén yuꞌ xindxab luxdoo, baxhal tëëman loj ree bénlutiaꞌp.

²²Dxel badxiꞌ Jesús xtiidx ree bén guxhaal Waj, rëbaman: ―Gol chej, gol chiguiedx loj Waj ni cuguiaadi në ni caguiejndi. Gol güjdx lojman guial ma ruguiaa ree bénlutiaꞌp, ma rajc rza ree bencoj, ma rayajc tëë ree bén goc guialguijdx la lepra, ma riguiejn ree bén nacwaꞌt, guiáad ree bengüt ma baban reeman, abiꞌ ree bénprob ma caguiejn reeman xtiidxzaꞌc Dios.

²³¡Xiquilbaa ree bén ad zucwëëzt chililadx naj!

²⁴Chi baza ree bén guxhaal Waj, guzuloj Jesús caneeman xcwent Waj loj ree bejn, rëbaman: ―¿Chu naladxidi na̱j bén biquiaadi loj yujbidx? ¿Naladxidi ya najman ziꞌc tijb biqui runiib bi?

²⁵¿O chu biquiaadi? ¿Tijb bén najcw lajd zagdxe ya? Lëjt ragbee guial bén rajcw ree lajd zagdxe, në ree bén naban zagdxe, lën palas zojb reeman.

²⁶¿Chu biquiaadi? ¿Tijb bén rudëë xtiidx Dios loj ree bejn ya? Per diidxliczi rnin lojdi, biquiaadi tijb bén mazri zojbloj guial loj tijb bén rudëë xtiidx Dios loj ree bejn.

²⁷Wajn na̱j bén ruzaꞌt xtiidx Dios, lod rëb: Naj rxhial tijb bén ned lojl, bén güünchaaw xnejzil.

²⁸Rnin lëjt, loj graczi ree bénguidxliuj ad wayut bén rudëë xtiidx Dios loj ree bejn, bén mazri zojbloj guial loj Waj. Per majsi zian, bén ad zojblojt loj xguialrniabee Dios, laaman mazri zojbloj guial loj Waj.

²⁹Gra ree bejn, në ree bén ruquijx impuest bén baroobnijs Waj, chi biguiejn reeman ni rëb Jesús bigniaꞌ reeman guial rüjn Dios ziꞌc rayal.

³⁰Per ree bénfarisew con ree mextr rajc ley ad cwëjbt reeman nuroobnijs Waj laa reeman, zian ad guyënt reeman ni rën Dios par laa reeman.

³¹Rëb tëë Jesús: ―¿Xhienaag ganin lëjt na̱j ree bén rigaꞌ loj guidxliuj guie yan? ¿Chu na̱j ziꞌc laa reeman?

³²Laa reeman na̱j ziꞌc ree xindoo rguijt niz galay luguiedx, abiꞌ rbixdiaj reex rëb loj lasaꞌ reex: “Bacwejdxan par nuyaꞌdi, per ad bayaꞌtidi, badoolan ni naya ree, per ad biintidi.”

³³Din biꞌt Waj bén baroobnijs bejn ree, ad rawtaman ad rëꞌ tëëtaman vin, abiꞌ rëbidi xindxab yuꞌ luxdooman.

³⁴Yan biꞌt Bén guxhaal Dios, rawaman rëꞌ tëëman vin, abiꞌ rëbidi guial dád nalaman ruladxaman guiëꞌman, ruchajg tëëman béndol ree con ree bén ruquijx impuest.

³⁵Per xguialrigniaꞌ Dios, rguienan por ree xbejnman.

³⁶Tijb bénfarisew rëb loj Jesús din chitaw Jesús guin lidxaman. Abiꞌ bidxinman lidxaman gurejman xan mex.

³⁷Dxel tijb béngunaa dxuudx zojb gajc luguiedx guin. Chi gogbeeman cayaw Jesús lidx bénfarisew guin, bidxinnëman tijb lumejt yuꞌ perfum.

³⁸Dxel roonman gurejman lod nuzuj guiaꞌ Jesús, guzuloj caxhieꞌ nijs carii lojman guiaꞌ Jesús. Abiꞌ cucwiidxnë guidxguijcaman laan, cayawaman xid guiaꞌman curoob tëëman laan perfum guin.

³⁹Chi baguiaa bénfarisew guin zian, beenman xgab: “Balgui zian wali bén guin najman bén rudëë xtiidx Dios loj ree bejn, zagbeeman chunin cuquiꞌ laaman xhie tëë naag naban béngunaa guin, najman bendxuudx.”

⁴⁰Dxel rëb Jesús loj bénfarisew guin: ―Simón, yuꞌ tijb ni ganin lüj. Badxiꞌ bénfarisew guinan rëbaman: ―Gunan, mextr.

⁴¹Abiꞌ rëb Jesús lojman: ―Tijb bén rudëëd milia rguiꞌn ree bejn, ral tioꞌp ree bejn lojman. Tijbaman nuzëëb gaaygayuu denario, zatijbaman nuzëëb tüꞌpchiin.

⁴²Grop reeman ad beent gan naguijx lojman, per bén badëëd milia guin rëbaman loj reeman guial ad zaguijxt reeman ni nuzëëb reeman. Yan guna, ¿chu loj grop reeman mazt guiën laaman?

⁴³Badxiꞌ Simón laan, rëbaman: ―Par naj, bén bazëëb mazri zroꞌ guin. Dxel rëb Jesús: ―Waliquil.