Ruk 7:11-43

¹¹Ihama gahan tit dah Jisas oh Nen ap mutuhnong sapora rima Jisaso orhe pinggit pisapat hano kuuhan ruumsan kat ihiro irair Nen ap mutuhnong pipari.

¹²Sus ap mutuh ohe doho gwatei kat oh koriyaoh kopen brer han hapat han tit hapur oh sein itperim popriptingopari. Sup uh ama brer ohwi papatin itap oh haputip oh ama brer saha oh ohe sein oh ama ap mutuh kuuhan ruumsan ihir sup uh tap sein oh popriptingopari.

¹³Imat popriptihan Hanipyah oh sup uhnong wandeipat hinhina isip tit deipat Go da er ham yimapra pongopri.

¹⁴Pora susa ihir atei ha kimiritingwe rim sein popripti gwarnong oh bes maringopri. Marinporhan sein popripti han ihir kimiritperhan oh Brera. Go da it apris masona pongopri.

¹⁵Potporhan arpin takapteng rim masas mengiro hangopri. Hatporhan Jisas oh sup uhe pat duupnong pisusa mandangopri.

¹⁶Imat pamsaporhan ihir wamara kas isip tit hapti Got ohe meng pot pisapti han ihir wanohe kasip isipsi han tit dire pati tei moh apirmuro. Got orhe han Juda dirnong napanggeitinmat apirmuro pora Got ohnong armi deingopari.

¹⁷Armi mara Jisas ohe ma ihah ohe meng oh Judia mong aptei apteio Judia mong ohe kakduup pati mong ohe aptei apteio oh gonsi gospot ama pipa oh.

¹⁸Jisas ohe ihat sapat ohe meng oh aptei aptei oh gospot saperhan Jon ohe pinggit pisapat han ihir amrama Jon ohnong ama potpa oh. Potperhan oh orhe han ihirnong

¹⁹Yot han gut nohe pat aprin potporhan ihit ohe pat duupnong saperhan Gin gut susa Hanipyah Jisas ohnong Go nure Oh apripramur rim naminhan pati han oh goda da nure minhan pati han oh kopen na apin pat dahamtinmur pora ama darhetip oh.

²⁰Por darhetporhan ihit Jisas ohe pat tei oh apingopari. Aprisa Jon tom patirpat han oh Gut Jisas ohe patnong susa ohnong Nure oh apripramur rim naminhan pati han oh goda da nure minhan pati han oh kopen na apin pat por dahamtinmur napor nadarherhe pongopari.

²¹Ama gipotpa sut oh Jisas oh tihan tihan sik hat pati kuuhan bapo mongsup oh ga at pat kuuhan bapo kin kwisi hat pati kuuhan bapo ama ihat pati han ihirnong yah mat pisapatin Jon ohe darher han yot ihit Jon ohe ma ri meng oh apris pongopari.

²²Potperhan Jisas oh ihitnong Gute nohe kuuhan ihirnong yah mat pisapatin wanahaya meng moh susa Jon ohnong potinmur. Ohe ma tamreipat ohe pe oh kin kwi hat pati kuuhan ihir kin watahayao buhdapat ma haputpa kuuhan bap ihir buhdapat yah ham tandeit sayao ina mong mong tohohet sapti han bap ihirnong it yah ina bok hayao nat ma kit patisi bap ihirhe it nat tem tanpur hanip meng amrayao hapuripti han ihirnong da pamsaporhan it da apris masayao borop hat pati kuuhan bap ihir Got ohe yah meng oh potperhan amrayao ihat saptingwerimur potinmur. Potporhan oh ha dahatinohmur.

²³Hanip bap gur nohe ma ihat sapatnong moh wanahama Moh arpin hande dasuh hande na daham Arpin han orhorwa daham tit dawi hat pati kuuhan gur amamsi hat pati kuuhan bap gurmur pongopri.

²⁴Potporhan Jon ohe darhetir han yot ihit it saperhan Jisas oh kuuhan ihirnong Jon oh ihat pat han ma hapat ha dahatingwe rim meng tit am deingopri. Gur Jon ohnong wamtiperim hanip timbas irat timbas mongnong wamar ma pipa oh kinhatin han pato daham wamar pipa. Gur wamar ma pipa oh bur dap tit inim oh amber anong anong deipat hatin dasi hat pat han tit patkin daham wamar pipada. Basra. Kasip ham tit dawi hat pat han ohnong wamtiperim pipamur.

²⁵Gure wamar ma pipa oh han kamah watah yahnap an patsi han tit patkin daham wamar pipada. Basra. Watah yahnap an pati han ihir ihtin dus na patimur. Ihir kakhan iraire yahnap ap ohwi patimur.

²⁶Ihan gure wamar ma pipa oh propet ohnong wamar pipada. Dawa. Gur propet ohnong wamar pipamur. Gure wamar ma pipa propet oh Krais ohe mandap amanhem amamen matin han orhe gon han propet ohnong wamar pipamur.

²⁷Ama han orhe boknong mar ma brak matpa meng oh Got oh Krais ohnong meng tit potporhan mamaru mat brak matpamur. Kaput nohe meng pot pison han tit ohri darhetipramur. Darhetporhan oh gwe mandap namanhem namamen matipramur potporhan brak matpamur. Ma brak matpa meng oh Jon orhe boknong tarpatir ohoh ihan orhe gon propet hat patmur.

²⁸Ihat orhe gon propet hat pat ohoh ihan hanip bap gonsi gur Jon ohe hrepdapat hatwi patimur. Ihtin bap hat pati orhor ginnong oh gur norhe ma inahat napapatnong moh ma wandeipti oh Got ohe napapindin hrepnong naham napapindin danong oh gur wamar am haptimur. Jon ohnong nohe ma ihat sapatnong oh na wamat pat ohoh ihan oh gure hrepdapat hatin hat patmur pongopri.

²⁹Potporhan takis yan daripti han ihirsi; kuuhan bap ihirsi irair gonsi Jon ohe bes tei tom patirisuh kuuhan bap ihir ohoh ihan ihir Jisas ohe por meng amrapti Got orhe mama inahat napapat moh yahnapmuro potpamur.

³⁰Parisio sawa meng am hat pati hano ihir Jon ohe bes tei dir tom na waprohemur rim tom na washe han bap ihir Got ohe yah da ma Ihir mihat ha sashengwe por ma pinggipat danong oh ihir kom atpamur.

³¹Jisas oh Gin mama pati kuuhan gure ma pati da oh Nure da oh ihat pati ma hapat ha dahatingwe rim noh mameng moh naporit guragur dahatinmur.

³²Mamarumur. Brer ihiroh iraire tarmuriya tei oh kat brer ihirnong Gur amam ham ha birhitingwe rim nuhur waron meng matperhan gur garham na birhiyahe. Gur saheih ham ha yimtingwe rim nuhur saheih ham yimtiperhan gur garham na yimayahe poriptimur. Ire ma ihyanong na ihen ina ham garhaptiru hat orhor mama pati bap gur Jon nute boknonghe amaru nahat orhor napapti bap gurmur.

³³Imat ma napapti oh Jon tom patirpat han oh saheih da hatin hat apris den ruumsan na damo wain tom gap na damo hatporhan gur ohnong Er han mongsup ohe kasip ohsi patim ihapat han moho por gardeiptimur.

³⁴Hanip Brer nohhe aprisa den ruumsan deo wain tom gap deo hatporhan gur nohnong Den ruumsan dapat han moh ake yot hat patin ihpatkino. Wain tom mama dapat moh orhe danong timbas hatinmat ihpatkino. Takis yan er mat daripti hano er hat sapti hano ire tapnong hat sapat moh ihirsi yah han hatporim ihpatkino napor garnahaptimur.

³⁵Kat gur dasuh mengkin dahapti orhor Got orhe dakuu meng oh arpin dam timdiporhan gur wamar am hatiprimur pongopri.

³⁶Gahan tit dah tit Parisi bap ihir tit han tit Jisas ohnong Gin go ditadit tap hat sus nohe ap oh den diprohemur pongopri. Potporhan arpin ihit susa ohe ap ros tongnoma den dipari.

³⁷Den daptin ama ap mutuh oh er da hat sapat kuu tit Ama Parisi ohe ap oh den damo patiheri ritperhan uh amrama urhe gapgwesi yahnap tom gap kwei san tem panditpa san oh dara marim apingopri.

³⁸Aprisa Jisas ohe tongnom hios rit patim den dapat buh pe puh oh apris tandeingopri. Tandeipat yimangopri. Yimtiporhan kin tom oh Jisas ohe tong bas oh wanporhan urhe kak bat ohsi ahirdeingopri. Ahirdeipat tongdapat amam mara urhe gapgwesi tom san oh durker ohe tongnong amongopri.

³⁹Uh indeipatin Parisi Jisas ohnong den diperim ambur ohe apnong popir han oh wandeipat Mama han mohra arpin propetneng ohnong marim amam maro hapat kuu mauhnong uhe er hat sapatgwer danong oh am hapat uhnong baso pornengmur. Uhnong baso na por moh propet baskin dahah hangopri.

⁴⁰Ihat dahahhan Jisas oh ohe danong am hapat ohnong Nohan Saimona. Nohe gonong napotin meng oh tit patmur pongopri. Potporhan Saimon oh Mai. Gwe meng oh napotina pongopri.

⁴¹Potporhan oh Noh paham meng tit gonong napotiprohmur. Yot han tit patesheri. Ama han yot ihit tit han ohe yan tit ayan hat patesheri. Ayan hat ma pateshe oh tit han oh isipnap 500 kina ayan hat patesuhri; tit han oh 50 kina pok tit ayan hat patesuhri.

⁴²Ihat ayan hat patim ihit it ohnong apin yan oh timbas hat patin ohoh ohnong kinmat yan apin ina hat patinoh Gut nohnong yan napin oh de teidapat nohnong dat napripri ihan mandayamur por mandangopri. Ihtipari pongopri. Porpat Saimon ohnong Gin ama han yot ihitoh de han ohdapat yan hat ma pati han ohnong isip bopor matiproh. Go daham napotinmur pongopri.

⁴³Potporhan Saimon oh Nohe dahah oh yan isip hat pat han ohdapat Nohe yan isip moh namdao rim amam mar ruumsan bopor matiprohkin dahahmur pongopri. Potporhan Jisas oh Gwe ihat ma dahah han oh arpinmur pongopri.