Luku 23:31-43

³¹Indupa makande dapale dupa ita saka doko-kisa setelyamino doko tenda ita sapu dupa-kisa makande aipale mende kapa pao ipatape?” Jisasame lea-pyaa.

³²Yanda singi dupame Jisasa pyao kumasalanya laminao pao pituu akali mana koo miningi waka lapoma baa-pipa awapa pyao kumasalanya laminao peamiaka-pyaa.

³³Dokaitame yuu kenge Matenakulimanda lenge dokonya pao lai petala, Jisasa baa ita poko mendenya pyao yukuiyami-pyaa. Mana koo miningi akali dolaponya mende Jisasanya kingi tolae-kaita pyao yukuotala, mende doko koya-kaita pyao yukuiyami-pyaa.

³⁴Yukuoteaminopa Jisasame lao pituu, “Dokaitame masala nayao pilyaminona, Apane, embame dupanya koo dokonya yanu dupa nyala naenya kayape!” lea-pyaa. Yanda singi dupame kana yakane dupa pyasoo male pyooita miniamino akali dupame Jisasanya yonge pee dupa mokosoo nyiami-pyaa.

³⁵Gii dokopa endakali dupame kandatae kateaminopa Jutamanya isingi akali dupame Jisasa kandao lamba lao pituu, “Baame endakali waka dupa nisiana baa akali Goteme yapao nyepae kiningi Kataisa tamo kandao doko, baame baa tange nisinana!” leami-pyaa.

³⁶Dopa lateaminopa yanda singi dupame tengesa ipupala baa minakasoo waene kaa pipae mende nena lao maiyoo pituu, “Emba Jutamanya Kiŋi tamo kandao doko, embame emba tange nisa!” leami-pyaa.

³⁸Jisasa yukuotae kateamo ita poko dokonya ketae dosa pepa mende dapa lao pyatae katea-pyaa: ‘Dake Jutamanya Kiŋi dokona,’ lao pyatae katea-pyaa.

³⁹Dee akali kalai koo pingi lapoma pyao yukuiyamino dolaponya mendeme Jisasa kandao lamba lao pituu, “Emba Kataisa doko tamo kandao, embame emba tange nisetala, nalimba apata nisa!” lea-pyaa.

⁴⁰Dopa leamoaka doko, koo pingi akali mende dokome baa pyalanya lao, “Embame kenda pipae baame nyilyamo dopaleaka nyoo pituu Gote paka nakaelepe?

⁴¹Nalimbame koo piambano dokonya yanu nyilyambano doko kapa pelyamo. Dopaka doko, akali dakeme koo mende napiana,” lea-pyaa.

⁴²Dopa latala baame Jisasa lamaiyoo, “Jisasa, embame kiŋi jetala ipateno gii dokopa namba kame sala nayape!” lea-pyaa.

⁴³Dokopa Jisasame baa lamaiyoo, “Nambame emba kiningi langilyo! Indupaka Patandisayuu dokonya pao kalyambanona,” lea-pyaa.