Luku 19:9-20

⁹Dopa leamopa Jisasame lao pituu, “Baa Apotakame tatanya mandipayaka dokonya anda dake pyoo nyepae katapelyamo.

¹⁰Endakalinya Ikiningi dokome endakali alu petae dupa kutao pyoo nyala epeana,” Jisasame lea-pyaa.

¹¹Dokaitame pii doko sepala Jisasa Jetusaleme tengesa dokonya ipatelyamo. Gotenya isingi doko indupaka panalapomona lao masiaminosa Jisasame kongali pii mende apata dapa lamaiya-pyaa:

¹²“Akali kenge singi mendeme yuu tependa mendakakaita pao kiŋi jetala pilyetona lao masia-pyaa.

¹³Dopa lao masetala baame baanya kendemane kingi ita mende epena latala mendai mendai lao muni kina kingi ita lapoma lao mokosoo maiya-pyaa. Maitala baame dokaita lamaiyoo, ‘Nyakamame muni atupa minao namba mendakaita pao katato gii dutupanya pisinisa pyakao kalyepape,’ latala pea-pyaa.

¹⁴Dopaka doko, baanya tata dokaitame baa kandao mona etete auu nakayapala akali mendapuame baa watao pena leami-pyaa. Pupala, ‘Akali dakeme naimanya kiŋi joo naima isoo nakatapyali lao masilyamanona,’ lao baa peamo yuu dokaita tange dupa lamaina leami-pyaa.

¹⁵“Dopa leaminoaka doko, baame yuu tependa dokonya katao kiŋi jetala dee pilyoo epea-pyaa. Ipupala pupae lao wamba baanya kendemane muni maiyamo dutupa epena latala akali mendai mendai lawame, ‘Nambanya muni utupanya potopesa akipate nyekeamipi lao kandatoo,’ lea-pyaa.

¹⁶Dokopa akali wambao epea mendeme lao pituu, ‘Akali Andake, embanya muni kina kingi ita lapo dolapo nambame minao pisinisa petakala potopesa andate lapoma nyekeona,’ lea-pyaa.

¹⁷Dokopa kiŋi dokome baa lamaiyoo, ‘Kalai yaka pyekee lamo! Emba kendemane epe! Embame kalai kuki dutupa nambame leoli pyoo auu pyoo isoo pii lamo dokonya embame nambanya yuu taono dupanya kingi ita mende isatale lao nambame emba-kisa setelyona,’ lea-pyaa.

¹⁸Dopa lateamopa kendemane lapo pyoo epea dokome lao pituu, ‘Akali Andake, nambame embanya muni kina kingi ita lapo dolapo minao pisinisa petakala potopesa andate mendai nyekeona,’ lea-pyaa.

¹⁹Dokopa kiŋi dokome baa lamaiyoo, ‘Embame nambanya yuu taono dupanya yuungi isatale lao nambame emba-kisa setelyona,’ lea-pyaa.

²⁰Dee kendemane mendeme ipupala lao pituu, ‘Akali Andake, emba akali tomba neleno nambame kandenge. Akali waka mendeme opale mende setao kalyamo ongo embame nyingi kandapi. Akali waka mendeme nee pokelyamo ongonya embame yukuoo nyingi kandapi. Tenge ongonya nambame emba paka kayapala embanya muni kina kingi ita lapo dolapo kotale dakeme yaki petala setakao kateona, ae silyamo kanda,’ lea-pyaa.