Luke 19:9-20

⁹Nil puth Jesus.an thaw nungant, “Nil piip God.angan keꞌ-ngul ngaantam-ngeeyow nintan way yot yump-yumpan, aꞌ putha kampan nungkaram al-alantaman thamp kan-ngul kon-ngathowan way thanan yump-yumpin. Niiy kan-kanam ngul kampan nungantam Abraham.antaman weemana, niiy puth kan-ngul God.an monkan-wak-wakaniy nunanga.

¹⁰Ngay pam inman nil piip God.angan kuchanya, ngay aak iikanakan ukangan ngay yipam wenk-wenkāng thant pam wanch al-alantan, than ngangk keꞌaman theeꞌin nungant piip God.antana, ngay yipam kaaꞌ-piichanathāng thanang way thanttam anpalan.”

¹¹Anpalaniya nil Jesus-a, putha pam wanch anangan nungantangan iiy-iiyin-a, than kan-ngul iiy-iiyin aak um Jerusalem.akan. Than aak thinth ngulan wamp-wampin-a, pam wanch al-alangan kan-ngul ngaantam-ngeey-ngeeyin thanttakaman, “Aak Jerusalem.angan-a, nil piip God.angan yip-yipam meeꞌ-engkanang meenathow nungamang nil moom piꞌan paththamana, aꞌ pam wanch yotam anangana yal-yalmathow thanang maꞌ nungantangan ngul iiy-iiyayna.” Aꞌ nil Jesus.angan wik kath inan ngul waaꞌ-waaꞌ thant,

¹²“Pam wuut piꞌana aak nungantam anpalan kech iiy aak thonaka, than yipam aak anganiya moom wuut piꞌan paththam king yumpayn nunang. Amanamaniya, nilana ngaantam-ngeey ngul koyaman kan-ngul iiyow aakakan.

¹³Aak kaꞌathamana keꞌaman yippak want aak nungantaman-a, than pam ten anangan workan iiy-iiyin nungant-a, nil ump thanang angan wampayn nungant, aꞌ nil wukal twenty dollars thon-thonantan theeꞌ-theeꞌ thant pam al-alantan. Aꞌ thaw ngul thant, ‘Ngay wukal inangan theeꞌang niiyant niiy yipam way min piiy-piiyāna aꞌ putha amanamaniy niiyaniya way min anangana sellimpungān thanang wukal piꞌan yipam yumpān ngathara.’

¹⁴Puth than pam wanch aak-kunch anangana kaangk keꞌ nungantam pam alantaman, yaꞌa. Thananiya pam wiy anangan wik thampang kuchin thanang aak-aakanakan nilan wun-wun. Than kan-ngulan wampin-a, thanan thawin thant, ‘Ngan kaangk keꞌ nunang pam inan moom piꞌanan iiyow nganta.’

¹⁵“Puth than pam wanch aakan punchanangana ep moom piꞌan king yumpin nunanga. Nil koyam ngulan iiy aak nungantamakan-a, aꞌ nil wik kuch thant pam ten al-alantan wampayn nungant nil yipam meeꞌmiy wunowa than wukal ngeen-ngeen nathan yumpin nungant.

¹⁶Pam thonam workan iiy-iiy nungantan-a, wamp nungant, aꞌ thaw nungant, ‘Ayyang moom-ang, two hundred dollars in nungkara. Nintan theeꞌan ngathar, twenty dollarsaman-a, ngay wukal piꞌan ngul yumpangana.’

¹⁷Nil puth mooman thaw nungant, ‘Yaa, an mina, nint pam min paththama! Ngay workan theeꞌangan nungkara, nint work minam iiy-iiyan ngathara. Yaa, ngay work wuut piꞌan ep ngul theeꞌāng nungkar. Aak imanaman ngula nintaniya moom piꞌan paththam iiy-iiyāna aak town ten anangan piꞌ-piꞌān thanang.’

¹⁸Aꞌ nil pam thon ngulan wamp nungant aꞌ thawant, ‘Ayyang, wukal nungkar ina one hundred dollarsana. Nintan theeꞌan ngathar, twenty dollarsaman-a, ngay wukal piꞌan ngul yumpangana.’ Nil puth moom nungantaman thawa,

¹⁹‘An mina, aak imanam ngulana nintaniya moom piꞌan paththam iiy-iiyān aak town five anangan piꞌ-piꞌān thananga.’

²⁰“Aꞌ amanamaniya pam thon ngulan wamp nungant moom-kunchantan aꞌ thaw nungant, ‘Moom-ang, wukal nungkaram in twenty dollarsa, nintan theeꞌan ngatha. Ngay puth work keꞌam iiy-iiyangan, ngay ingman piꞌ-piꞌang yuk hankyang kathangan nungka.