ᤗᤢᤁᤠ 19:9-20

⁹ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤐᤠ᤺ᤳᤋᤢ. “ᤀᤠᤀᤡᤴ ᤁᤴ ᤜᤡᤶᤛᤕᤱᤅᤡᤸᤗᤧ ᤛᤧᤴᤗᤵ ᤂᤥ᤺ᤛᤢᤀᤠᤱ ᤘᤠ᤹ᤖᤥ. ᤌᤣᤀᤠᤱᤓᤧᤸᤗᤧ ᤈᤰᤁᤤ᤺ᤴᤏᤠᤱ ᤀᤒᤪᤠᤜᤠᤔᤖᤧᤴᤏᤣ ᤁᤢᤔᤢ᤹ᤀᤡᤍᤠᤱᤛᤠᤖᤥ॥

¹⁰ᤔᤧᤴᤇᤠᤶᤛᤠ᤺ᤴ ᤗᤠᤕᤥᤀᤥ ᤁᤧᤔᤠᤒᤠᤜᤠ᤹ ᤁᤥ᤺ᤵᤔᤠ ᤏᤢ ᤜᤡᤱᤔᤠᤛᤡ ᤑᤠ᤹ᤀᤠᤱ ᤋᤩᤧᤒᤠᤖᤥ॥”

¹¹ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤕᤧᤛᤢᤖᤧ ᤘᤣ᤹ᤛ᤻ᤔᤠ ᤂᤧᤍᤠ᤹ᤎᤡᤰ ᤔᤧᤳᤋᤢᤛᤡ. ᤌᤣᤀᤠᤱᤓᤧᤸᤗᤧ ᤂᤢᤏᤡ᤹ ᤕᤖᤢᤛᤗᤧᤔ ᤏᤡ᤺ᤳᤋᤠᤱ ᤔᤧᤃᤧᤖᤧᤀᤠᤱ ᤔᤧᤘᤕᤧ. ᤜᤧᤰᤁᤩᤠᤱ ᤁᤢᤓᤠᤖᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤂᤡᤔᤥ ᤋᤠ᤺ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤀᤠᤱ ᤔᤧᤘᤕᤧᤖᤥ॥

¹²“ᤜᤠᤱᤃᤧᤶᤒᤠᤛᤠ᤺ᤎᤡᤰ ᤔᤠ᤺ᤱᤄᤠ ᤗᤠᤈᤣ᤹ᤀᤥ ᤜᤠᤱ ᤆᤥ᤺ᤰᤔᤠ ᤕᤢᤰ ᤂᤥ᤺ᤔᤠ ᤑᤠ᤹ᤀᤠᤱ ᤗᤠᤶᤍᤡ᤺ᤰ ᤆᤥᤃᤧᤖᤥ॥

¹³ᤂᤢᤏᤧ᤹ ᤐᤣ᤺ᤰᤔᤠᤏᤢ᤺ᤸᤗᤧ ᤋᤃᤡ ᤌᤡᤒᤥ᤺ᤱ ᤁᤢᤛᤣᤘᤠᤖᤥᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤗᤳᤇᤠ ᤗᤳᤇᤠ ᤛᤠᤶᤔᤩᤠᤱ ᤕᤠᤱ ᤐᤡᤖᤢᤛᤡᤖ ᤀᤰᤂᤣ ᤔᤧᤳᤋᤢᤛᤡ. ‘ᤀᤡᤱᤃᤠ᤹ ᤔᤧᤴᤏᤢ᤺ᤱ ᤔᤧᤴᤍᤠᤀᤣ ᤌᤠᤖᤡᤰ ᤁᤸᤗᤧ ᤗᤧᤱᤜᤱ ᤆᤥᤃᤧᤶᤔᤧ᤹ᤀᤥ॥’”

¹⁴ᤁᤖ ᤁᤢᤕᤰᤕᤢᤱᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤈᤡ᤺ᤳᤋᤢᤀᤠᤱ ᤁᤢᤀᤣᤃᤠᤱ ᤁᤢᤀᤣᤃᤠᤱ “ᤁᤴ ᤔᤏᤠ᤺ᤸᤗᤧ ᤀᤠᤏᤡᤃᤧ ᤛᤶᤍᤠᤱ ᤜᤠᤱ ᤆᤥᤃᤢᤒᤠ ᤛᤡᤖᤠ᤹ ᤔᤧᤎᤠᤱᤅᤡᤴᤗᤥ” ᤔᤧᤒᤠ᤺ᤳᤋᤢᤖ ᤀᤡᤱᤛᤠᤒᤠᤜᤠ᤹ ᤔᤧᤒᤠᤱᤄᤢᤛᤡ॥

¹⁵ᤜᤧᤰᤁᤩᤠᤱ ᤂᤧᤸᤗᤧ ᤜᤠᤱᤕᤢᤰ ᤂᤥ᤺ᤛᤢᤀᤠᤱ ᤏᤢ᤺ᤰᤂᤧ ᤋᤩᤧᤖᤥ॥ ᤀᤠᤸᤗ ᤂᤢᤏᤧ᤹ ᤕᤠᤱ ᤐᤡᤖᤢᤛᤡᤒᤠ ᤁᤢᤛᤣᤘᤠᤖᤥᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤗᤧᤱᤜᤱ ᤁᤧᤈᤥᤃᤢᤶᤔᤠᤱ ᤀᤠᤰᤂᤧᤶᤔᤩᤠᤰ ᤕᤠᤱ ᤁᤧᤎᤃᤢᤶ ᤑᤠ᤹ᤀᤠᤱ ᤛᤣ᤺ᤴᤍᤥᤛᤢᤛᤡ॥

¹⁶ᤌᤡᤰᤛᤡᤃᤣ᤺ᤰᤐᤠ ᤛᤣᤘᤠᤖᤥᤒᤠᤸᤗᤧ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ ᤁᤧᤕᤠᤱᤎᤡᤰᤁᤡᤸᤗᤧ ᤘᤣ᤹ ᤌᤡᤒᤥ᤺ᤱ ᤕᤠᤱ ᤌᤃᤢᤱᤅᤠᤱ ᤘᤠ᤹ᤖᤥ॥”

¹⁷ᤜᤧᤰᤁᤩᤠᤱ ᤂᤧᤸᤗᤧ ᤔᤧᤳᤋᤢ. “ᤏᤢ᤺ᤖᤧᤖᤥ ᤀᤠᤛᤣᤘᤠᤖᤥᤒᤣ. ᤛᤠ᤹ᤖᤡᤰ ᤏᤢ᤺ᤒᤠ ᤁᤧᤈᤥᤃᤢᤖᤥ᥄ ᤂᤧᤏᤧ᤹ ᤌᤡᤒᤥ᤺ᤱ ᤕᤧᤰᤕᤰ ᤛᤶᤍᤠᤱ ᤛᤢᤜᤠᤱᤃᤧᤶᤒᤠ ᤁᤧᤒᤥ᤺ᤱᤗᤥ. ᤌᤣᤀᤠᤱᤓᤧᤸᤗᤧ ᤆᤢᤰᤛᤠ ᤐᤠ᤺ᤴᤏᤥ ᤏᤛᤠ᤺ᤴᤛᤠᤒᤠ ᤁᤧᤒᤥ᤺ᤰᤂᤧᤖᤥ॥”

¹⁸ᤜᤧᤰᤁᤩᤠᤱ ᤏᤡᤛᤡᤃᤣ᤺ᤰᤐᤠ ᤛᤣᤘᤠᤖᤥᤒᤠᤸᤗᤧ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ ᤁᤧᤕᤠᤱᤎᤡᤰᤁᤡᤸᤗᤧ ᤘᤣ᤹ ᤅᤠᤛᤡ ᤕᤠᤱ ᤌᤃᤢᤱᤅᤠᤱ ᤘᤠ᤹ᤖᤥ॥”

¹⁹ᤜᤧᤰᤁᤩᤠᤱ ᤂᤧᤴ ᤔᤧᤳᤋᤢ. “ᤂᤧᤏᤧ᤹ᤀᤠᤱ ᤅᤠᤛᤡ ᤕᤧᤰᤕᤰ ᤛᤶᤍᤠᤱ ᤛᤢᤜᤠᤱᤃᤧᤶᤒᤠ ᤁᤧᤒᤥ᤺ᤱᤗᤥ॥”

²⁰ᤜᤧᤰᤁᤩᤠᤱ ᤛᤢᤶᤛᤡᤃᤣ᤺ᤰᤐᤠ ᤛᤣᤘᤠᤖᤥᤒᤠᤸᤗᤧ ᤔᤧᤳᤋᤢ. “ᤀᤠᤍᤠᤱᤒᤣ. ᤁᤧᤕᤠᤱᤎᤡᤰᤁᤡᤴ ᤒᤠ ᤁᤵᤔᤥ ᤘᤠ᤹ᤖᤥ. ᤁᤧᤕᤠᤱᤅᤡᤴ ᤀᤡᤱᤃᤠ᤹ ᤋᤣ᤺ᤳᤋᤥ ᤛᤢᤅᤢᤱ ᤆᤡᤰᤂᤢᤱᤅᤠᤱ ᤁᤳᤋᤢᤱᤗᤥ॥