Luke 3:4-18

⁴John beena do jes like de prophet Isaiah done write down een e book say, “Somebody da holla een de wildaness say, ‘Oona mus cleah de road weh de Lawd gwine come. Mek de pat scraight fa um fa waak!

⁵All de walley mus be full op, an ebry mountain an hill mus ton ta flat groun. De crooked road mus scraighten, an de bad road mus be smood.

⁶An ebrybody een de wol gwine see how God da sabe e people!’ ”

⁷A whole heapa people come fa hab John bactize um. John tell um say, “Oona wickity, jes like snake! Who tell oona dat ef oona git bactize, oona kin git way fom de jedgiment wa God gwine sen fa punish oona?

⁸Oona mus do dem ting wa show oona done change oona way. Mus dohn tink say, ‘We de chullun ob Abraham.’ Dat ain gwine sabe oona. A da tell oona, God able fa tek dem stone yah an ton um eenta Abraham chullun!

⁹Now de ax ta de foot ob de tree. Ebry tree wa ain beah good fruit, God gwine cut um down an chunk um een de fire.”

¹⁰De crowd aks John say, “Wa we haffa do now fa git way fom God jedgiment?”

¹¹E ansa um say, “Anybody wa got two coat mus gii one ta de poson wa ain got none. Same fashion, ebrybody mus share wa e got fa nyam.”

¹²Some tax man too come fa hab John bactize um. An dey aks um say, “Teacha, wa we mus do fa sho we done change we way?”

¹³John ansa um say, “Mus dohn tek no mo money fom de people den de Roman gobment tell oona fa tek.”

¹⁴Some sodja dem aks um too, say, “An we, wa we haffa do?” E tell um say, “Mus dohn fight fa tek people money. Needa, mus dohn lie on people fa git money. Mus be sattify wid de pay oona git.”

¹⁵All de people beena hab high hope, da look fa sompin fa happen. An dey beena study dey head, da wonda ef John been de Messiah.

¹⁶John ansa um all say, “A da bactize oona wid wata. Bot de one wa hab heap mo tority den me gwine come. A ain fit eben fa loose e shoe. E gwine bactize oona wid de Holy Sperit an wid fire.

¹⁷E gwine jedge all de people an separate um op like a faama wa hab e pitfork een e han fa separate out de chaff fom de wheat. E gwine geda de good wheat an pit um een e baan. Bot de chaff, e gwine bun um een de ebalastin fire.”

¹⁸John preach ta de people, laan um plenty ting bout de Good Nyews an coax um fa change dey way.