Luka 3:4-18

⁴Ba jèe wii naa na tii kà *péroféta Isaia pâ: Pwa pwi âboro naa namaré na é tomara too: “Ée me Pwi Ukai! Pwabwàti ê naigé! Pwa ma bàracaari pwi ére na ée pâ wê!

⁵O pwaai pâ autâgòro; tébapuu nyi autoo; tébatàrù aucùu naigé; tébabàracaari aupâra kêe.

⁶Rà o côo pâ âboro pàtàma Pwi Ukai. É me nau pa-udòjè, wà Pwiduée Caa.” Ésaïe 40.3–5

⁷Wâru pâ âboro na rà medari Ioane, ba na é upwaarà naa nairiwâ. Â é ina tà pàra tàpé gée goorà pâ: «Guwà tèpa nari dòèa, ma tèpa pwâ! Wàilàapà na ina tàwà pâ, guwà o udò jii ê pitèimuru ma wârimuru, na ée mwa naa tàwà wà Pwiduée?

⁸Bwa! Guwà mara pwa cè tûâ cèna wâdé, târa ma o paari pâ guwà jèe pitòotéri ê wâro kàwà! Â gona guwà tà niimiri pâ, guwà udò, gée goo na wà *Abéraama, âna é pwi jojoorowà? Bwa! Piticèmuru naa goo. Ba wiàna nümee, â o pâri wà Pwiduée ma é bii ê pâ atü bèeni, ma rà o tèpa gòobàra Abéraama!

⁹«É jèe tà pwabwàti ê gi kêe wà Pwiduée. Â ée mwa tépàgà naa na wàé diri ê pâ upwâra na càcaa wâdé ê pâ pwêe, â ée mwa cîri naa na ânye!»

¹⁰Ê auwâru gée goo tàpé na rà têre Ioane, âna rà tawèerié, pâ: «Dà cèna o pâri ma bà pwa, ma bà o pitòotéri ê wâro kâbà?»

¹¹Â é tòpi tàra pâ: «Wiàna ârailu ârabwée'gà, â gà naa jèpwi tà pwina ticè têe.  wiàna pwa utimuru'gà, â gà naa tà pwina ticè têe.»

¹²Â pwa pàra tèpa *tò mwani wâripû, na rà me mwara, ba na é upwaarà wà Ioane.  rà tawèerié pâ: «Pwi a pwa pupûra, dà cèna o pâri ma bà pwa?»

¹³Â é tòpi tàra pâ: «Na guwà tò mwani wâripû ba kà tèpa Roma â guwà cibwaa popa ba kàwà cè mwani cèna piwéna jii ê âji wâripû.»

¹⁴Â wà mwara pàra tèpa coda, âna rà tawèeri Ioane pâ: «Â wàibà, âna o dà cèna bà o pwa?» Â é tòpi tàra pâ: «Guwà naaco pai pwa kàwà na èpà tà tèpa âboro. Guwà cibwaa pwa kûu tàra, â guwà cibwaa tacoo goorà, ba na rà naa mwani tàwà. Wâdé na guwà ipwàdée co goro ê wâriwà.»

¹⁵Êdiri tèpa âboro, âna rà tapacîri naa na ipwàdée cè pwina o tèepaa, â rà pitawèerirà jècaa pâ: «Gona wà Ioane, âna pwiri nye wàé kaa pwi *Mesia —wà *pwi a pa-udò na jè tapacîê gée na biu?»

¹⁶Â wà Ioane, âna é inapàpari tàra diri pâ: «Wâgo, âna go upwaawà goro jawé. Êco na wà pwina ée mwa me pwicò kôo, âna dau pwa pàtàmee jiio. Â càcaa pâriô, ma go tipi ê otàpwe goro ê du wâraâê ba é Pwi Ukai. Â wàé, âna ée mwa upwaawà goro ê Nyuâaê Pwicîri ma ânye.

¹⁷Â é jèe nye tà pwabwàtié, ba na é pitèi tèpa âboro. Â ée mwa naaitiri tàpé na rà wâdé jii tàpé na rà èpà, pwacèwii pai pinaaitiri ê pudòro upwâra jii ê parawée. Â é tòimiri ê pudòé, â é cîri parawée naa na ânye na ticè pwâadèreè.»

¹⁸Wâru pai pwa kà Ioane na wàrapwiri, târa ma é patùra ê Ba kà tèpa *Juif ma inapàpari tàra ê *Picémara Wâdé.